శుభాశీస్సులు. 1. పెండ్లి.2.పుట్టినరోజు.3.పం డుగ. 4. పదవీ విరమణ. 5. నూతన సంవత్సర.6.తెలుగు. 7.విశ్వావసు ఉగాది

      

              

 మంజు కి నిశ్చయ తాంబూలాలు . 

                                                              ఆశీస్సులు 

1. తేగీ.  నిశ్చయంబును పల్కిరి యెల్లవారు,అస్తుఅస్తంచు పల్కిరి అమృత ఝరిగ .       

             భావి జీవన సౌఖ్యాలు ప్రభలు నిండ , మనుమ మంజీర విభునితో మహిని నెపుదు. 

2. తే గీ . శుభము శుభమస్తు శుభమస్తు సురుచిరంబు, మంగళంబౌను మామక మానితులకు,

             భావి దాంపత్య సౌఖ్యంబు ఫలితమంది, శ్రీలు గురియును మంజీర చెలునికెపుడు. 

3.తే గీ.   కనులపండువు యగునట్లు కమలనాభు , కృపను మీరెప్దు వృద్ధియై కీర్తినంది,

             మించు సౌభాగ్య సిరులెల్ల మేదినంది, వారలు గావుత ఈ జంట వైభవముగ.  

                                                   పొన్నెకంటి సూర్యనారాయణ రావు

 

 

2. పుట్టిన రోజు శుభాకాంక్షలు.

చిరంజీవి కిరణ్ కి 36వ  జన్మ దిన శుభాకాంక్షలు

నీకు ప్రతి పుట్టిన రోజు మధుర మనోజ్ఞం, సుందర దరహాస భావనాసమాలోచనం కావాలని , ఏ దేశమేగిన పుట్టిన దేశాన్ని, అలానే తల్లి దండ్రులను , మానవత,మమతానురాగాలను హృదయ కుహరంలో భద్ర పరచుకోవాలని , అను నిత్యం సుఖ సంతోషాలతో ఉండాలని కోరుకుంటూ ......అమ్మ నాన్నగారు

 చి.ల.సౌ.ఇందిరకు సూర్యనారాయణ రావు

శుభాశీస్సులు. (రామేశ్వరం)

జీవనంబున నాకిల  చిత్రగతుల

చేతనత్వంబు గల్గించి స్నేహ భావ

మమర జేసిన లక్ష్మికి మాధవుండు

జన్మదినమది హర్షాన సాగునటుల

ఆశిషంబుల నిచ్చుత! అహరహంబు. 

 రవి శశిల పుట్టినరోజు 8.5.83.

ఈశ్వరేచ్ఛగ కవలలై యింపుదనర

రవియు శశియును తమకాంతులవనినింప

పొన్నెకల్లున బుట్టిరపూర్వయశము

పెంచిపోషింప పితరుల ప్రేమదనుప.

కన్నవారల శ్రేయంబు గాంచుకొఱకు

బంధుమిత్రుల లాలన పరగజూడ

లక్ష్యశుద్ధిగ జీవిక రాటుదేల

రాము డెప్పుడు మిముగాచు రమ్యరీతి.

  20.04.2020.(చి.ఫణికృష్ణ)కు పుట్టినరోజు
                  శుభాకాంక్షలు, శుభాశీస్సులు.
  సంస్కృతాంధ్రములను చక్కగపఠియించి
  యోగవిద్యలోన నుద్యమించి
  వీడియోల జేసి విజ్ఞాన ముంబంచు
  అనుగు బుత్ర!అందుమాశిషముల.

  జన్మ దినోత్సవంబున సకలజనుల
  ఆశిషంబుల నొందుమ! హ్లాదమొదవ
  ఆయురారోగ్య సంపదలందుకొనగ
  రాముడోముత నిన్నెప్డు రక్తిదనర!.

 చిరంజీవి శశిధర్ పుట్టినరోజు శుభాకాంక్షలు.

    శుభాశీస్సులు.

   జీవితంబున నాశయ సిద్ధి కొఱకు
   పాటుబడుచున్న కష్టమ్ము వమ్ముకాదు
   జయము నిత్యమ్ము ధైర్యంబుచాటునుండు
   ముందుకేగుడు జయమంద పూర్ణగరిమ.
                   మామయ్య గారు,అత్తయ్యగారు.

చిరంజీవి మహితకు పుట్టినరోజు శుభాకాంక్షలు, శుభాశీస్సులు.

   విజయ పథములు సతతంబు వేదికవగ
   నీదు ప్రజ్ఞ ను జూపించి నిలుపుమమ్మ
   ప్రథమస్థానంబు దక్కును భద్రమగుచు
   మహిత!సత్కార్యభావనల్ మరువకమ్మ!
                               తాతగారు, బామ్మ.

    శ్రీ. జొన్నలగడ్డ జయరామశర్మకు 

    పుట్టినరోజు శుభాకాంక్షలు.. 

    ది. 10.03.2021.

    పుట్టినరోజు పండుగలు పున్నమచంద్రిక లెల్లవారికిన్ 

    ఇట్టె కరంగిపోయినవి యేడులు డెబ్బదినాల్గు వేగమై

    పట్టుగ సాగగావలయు భావియు పంకజనాభు సత్కృపన్

    ముట్టినదెల్ల ముత్యమయి మోదమెయౌ జయరామసోదరా!

.జెజెయస్ కు స్నేహదీపం..  30.7.2020. 

     సీ.  చిరునవ్వు వెలయించి చిన్నపెద్దలలోన

                     స్నేహదీపముబెంచు చెలిమికాడు

             సతతంబు సుహృదిన్ సంఘమ్ము దలచుచు

                       సేవలనందించు చేతనుండు

             తేటతెన్గును వాడి తీయని మాటల

                      భాషను బ్రతికించు భావుకుండు.

            పెద్దల దర్శింప పేర్మిని గురువుగా

                       భావించి సేవించు పావనుండు

          అట్టి జయరామ నాముడత్యంత ప్రియుడు

          వేవసంతాలు సౌఖ్యాన వెల్గుగాత

          శ్రీలు వర్థిల్లి సతతంబు చెలగుగాత

          రామభద్రుని కరుణచే రహినినెపుడు. 

          

పుట్టిన రోజు శుభాకాంక్షలు పాట 

పల్లవి.        పుట్టిన రోజు పండుగ , పున్నమి వెన్నెల నిండగ   
చరణం .1.  సర్వ జన్మల ఉత్కృష్టంబౌ, సంస్కారంబుల సంతృప్తంబౌ
                 ఈ నరజన్మము భువిలో వరమై, పుణ్య కర్మముల పునీతసరమై
                 వచ్చెను మాధవుడిచ్చిన రీతిగా, తెచ్చెను మాతయె తన యొడికి
                 జగతికి వెలుగుల పంచును , నా సుతుడంచును
                 తండ్రియె మురియును   తన్మయుడై . !!   పుట్టిన రోజు పండుగ

          2.   బందుగులందరు బహు సంతసమున , భవ్యుడు వీడని పొగడగను  
                మిత్రులు మేలను స్నేహపరంపర , మెలగుట ధర్మము సాధనకు
                నిస్స్వార్ధంగా దాన ధర్మములె ,  కరముల కందము కాదనకు 
                సమాజ సేవయె  ప్రమోదమంటు , సల్పుట జీవన కర్తవ్యమ్ 
                దైవము సైతము దానినె  కోరును , తాత్విక చింతన వక్తవ్యమ్!! పుట్టిన రోజు పండుగ 

        3.    ఆరోగ్యంబగు  నా యువు పెరుగును ,  ప్రేమామృతహృదయముతో 
               దానిని మీరలు పొందగ నిత్యం, సర్వ భోగములందుట సత్యం .
               పుట్టిన రోజు  సార్ధక మౌచు , పున్నమి వెన్నెల విరియునులే 
               కుటుంబమంతా  కూరిమి నిండి కోర్కెలు మరి మరి పండునులే . 
               భావిజీవితము బంగారు మయమై , భద్రము మీకిల కలుగునులే!! పుట్టిన రోజు పండుగ .  

                        రామయ్య పుట్టిన రోజు. 1.07.2019.

"స్నేహదీపం వెలిగించు మనోల్లాసం కలిగించు" నా స్నేహితుడు రామయ్యగారి పుట్టినరోజు (1.07.2019)సందర్భంగా (భాగ్యనగరం , సఫిల్ గూడ పార్కు లో )అతనికి చిరు సత్కారం చేశాను పచ్చని శాలువతో. తన స్నేహం ఆ పార్కునుండే ప్రారంభమైంది సరససాహితీ గోష్టతో..అతడు అచటి "లాఫింగ్ క్లబ్ సభ్యుడు. సార్ధక సభ్యుడు. నిరంతరం చిరునవ్వులు చిందిస్తునే ఉంటాడు. అతని పలకరింపులోనే ఒక ఆత్మీయపులకరింపు. ఆత్మీయమైన పలకరింపు ఖర్చుతో  కూడినది కాదు. అది నేటి సమాజంలో కొందరికి ఎందుకు లోపిస్తున్నదో చాలా మందికి అర్థంకాని చిదంబర రహస్యం. పిల్లలు నేర్చుకోవడానికి మన కొందరు పెద్దల దగ్గర ఇలాంటి సంస్కారాలు ఏమీ ఉండటంలేదనటానికి చాలా బాధగా ఉంది. అందుకే పాత మంచిపద్ధతులు ఎంత దూరం చేసుకొంటే మనం అంత కుసంస్కారచక్రవర్తులమౌతాము. మనకు ఏమాత్రం పరిచయమైనా ముందు హాయిగా పలకరిద్దాం. జంథ్యాలగారు చెప్పినట్లు హాయిగా మనస్ఫూర్తిగా నవ్వగలిగే అదృష్టం కొందరికే సొంతం. అతడు నన్ను గురువు గారూ! అని సంబోధిస్తాడు, నేను లఘువునని తెలయక. నిజంగా గురు పదం మహోత్కృష్టమైనది. జీవనమార్గ నిర్దేశికమైనది. జ్ఞాన జ్యోతి తో అజ్ఞానాంధకారాన్ని పారద్రోలేది. నేనెప్పటికి లఘువునే. నా గురువులే గురువులు.
   స్వచ్ఛమైన, నిస్స్వార్ధస్నేహ దీపం ప్రతియొక్కరి గుండెగుడిలో వెలగాలి. అదే సమాజం సుఖంగా సంతోషంగా ముందుకు సాగటానికి దారి చూపుతుంది. నిజానికి స్నేహం రక్త సంబంధాలకన్నా అత్యంత విలువైనదని మనకు అన్ని ప్రామాణిక గ్రంథాలు తెలియజేశాయి. రక్తసంబంధాలబంధాలు జీవనయానంలో  తనవారికి కూడ పైసా ఖర్చు చేయాలన్నా లెక్కలు చూచుకొని లాభనష్టాలు తూచుకొని, చూచుకొని  లాభసాటిగా ఉంటేనే ఖర్చు చేస్తాయి. నిస్స్వార్ధ స్నేహం అలాంటి బేరీజులు వేసుకోదు. స్నేహితుని లాభ క్షేమాలను మాత్రమే కోరుకుంటుంది. స్నేహితుని శ్రేయస్సును నిరంతరం కోరుతు అతని లోపాలను సున్నితంగా తెలియజేస్తు సన్మార్గగామిగా చేస్తుంది. నిజమైన స్నేహం నిస్స్వార్ధం, నిర్మలం. బలం.
    పుట్టినరోజు సందర్భంగా రామయ్య మిత్రునకాశీస్సులు.

           చిరునవ్వు వెలయించి చిన్నపెద్దలలోన
                     స్నేహదీపముబెంచు చెలిమికాడు
           సతతంబు సుహృదిన్ సంఘమ్ము దలచుచు
                     సేవలనందించు చేతనుండు
           తేటతెన్గును వాడి తీయని మాటల
                      భాషను బ్రతికించు భావుకుండు.
            పెద్దల దర్శింప పేర్మిని గురువుగా
                       భావించి సేవించు పావనుండు
         అట్టి సద్గుణశీలి రామయ్య సఖుడు
         వేవసంతాలు సౌఖ్యాన వెల్గుగాత
          శ్రీలు వర్థిల్లి సతతంబు చెలగుగాత
          రామభద్రుని కరుణచే రహినినెపుడు.

             ఆస్నేహాన్ని మనందరం పంచుకుంటు పెంచుకుందామా! సర్వే జనాః సుఖినో భవంతు!

 🌹 జన్మదిన శుభాకాంక్షలు.🌹

  1. పుట్టినరోజు సంతోషం పదిమందితో పంచుకుని
       సార్థకత ఏర్పరచాలని కోరుకుంటు...
  2. పుట్టినందుకు మనవాళ్ళనే కాక సమాజాన్ని కూడఆనందంగా
       ఉంచేేందుకు ప్రయత్నం చేయాలని కోరుతు..
  3. అంగవికలురకు, పేదలకు ఆనందాన్ని పంచటమే
      నిజమైన పుట్టినరోజు పండుగ కావాలని కోరుతు..
  4. పుట్టుక ఎంత కష్టమో, దానిని సార్థకం చేసుకోవడం
       అంతకు మించిన కష్టంగా భావించాలని కోరుతు.
  5. తలిదండ్రుల ఆనందం ఇనుమడించాలంటే ప్రతి
       ప్రతిపుట్టినరోజున నీవొక మంచిపని చెయ్యాలి.
  6. చెప్పేమాటలు వాయులీనమౌతాయి. కాని సత్కార్యాలు
      సువర్ణాక్షర లిఖితాలు.సత్కార్యాచరణ కోరుతు...
   7. పుట్టినరోజు ను త్యాగానికి కానుగా సమర్పించు. జన్మ
         ధన్యం అవుతుంది. త్యాగజీవివి కావాలని కోరుతు..
   8. మనం లేని లోటు సమాజానికి కనిపిస్తే నీ జన్మ
        సార్థకమైనట్లే.  నీ ఉనికిని చాటాలని కోరుతు..

🌺 నూతన సంవత్సర శుభాకాంక్షలు.🌺

  1. గతాన్ని మరచి బుద్ధి ని తరచి భావికాలమంతా చక్కని లక్ష్యాలతో ముందుకు సాగాలని కోరుతు...
  2. ధనం కన్నా, విలువైన కాలాన్ని వమ్ముచేయక రాబోవు సంవత్సరం సద్వినియోగం చేసుకోవాలని కోరుతు...
  3. కలకాలం నైతికతకు నీరాజనాలు పలుకుతు భావికాలాన్ని
      స్వర్ణమయం చేసుకోవాలని కోరుతు...
  4. ఆనందానికి మూలం మనసు, దానిని సంతోషంగా ఉంచితే
      అంతా ఆనందమే.మీ కుటుంబమంతా ఆనందంగా ఉండాలని
      కోరుతు.
  5.  మంచి స్నేహిలను మించిన సంపదలేదు. అటువంటి   
     సంపదతో ఆనందం గా ఉండాలని కోరుతు.
  6. క్రొత్తసంవత్సరంలో మీరు ఎక్కే ప్రతిమెట్టు విజయానికి
       తొలిమెట్టు కావాలని కోరుతు...
  7. ఆశలవలయాలను పరిమితం చేసుకుంటు లక్ష్యాన్ని
      అపరిమిత స్థాయిలో సాధించాలని కోరుతు.
  8. ఊహల్లో తేలక ఉన్నస్థితిగతులకనుగుణంగా మెలిగి
      ఆదర్శజీవనం గడపాలని కోరుతు..
  9. ఘనకీర్తి కి మూలహేతువు నిస్స్వార్థసేవాభావం. అట్టి
      భావాలతో నిరంతరం విలసిల్లాలని కోరుతు.
  10. కరుణాపూరిత అంతరంగం అమృతత్త్వానికి ప్రతీక.
        అట్టి అమృతహృదయులు మీరు కావాలని కోరుతు.

                    

               3. పండుగ రోజు శుభాకాంక్షలు.

దీపావళి శుభాకాంక్షలతో

 సీ .  ఇంటింట శుభశోభ లింపార వలెనన్న

                   ప్రమిదల దాల్చిన ప్రమదవలయు

       కంటినిండుగ వెల్గు కనజేయవలెనన్న

                       విమల దీపకళిక వెలుగవలయు

       మింటికి మంటికిన్ మేల్జేయ వలెనన్న

                       అణుబాంబు ప్రేల్చుటలాపవలయు

        వింటిని సంధించు వేత్త కావలెనన్న

                        ధీరసత్యగ నీవు మారవలెను

   తే. గీ .అపుడె దివ్యదీపావళి యందగించి

           జాతి సుఖసౌఖ్య భోగాల సారమరసి

           విశ్వశాంతికి సరియైన వేదికగును

           పరమ సంతోషకారక పర్వమగును.

    ఉ . తోరణ పద్యదీపములితోధిక రీతి వెలుంగజేయు నీ

          కారణజన్ములైన కవిగాయకమండలి కాంతిపుంజముల్

          నేరుగ వాణిపాదముల నిశ్చలభక్తి స్పృశించుచుండగా

          తీరగు పర్వమై వెలసె ధీవరు భావమహేంద్రచాపమై.

3.11.2013

కవిపండిత మిత్రమండలికి  దివ్య దీపావళి శుభాకాంక్షలు.

చెడుగు చీకట్ల నిరతంబు చీల్చివేయు       

వెలుగు రేఖలు జీవన వేల్పులనగ

మానవాళి కి లభియించె మహితగతిని

దీప మాలిక పేరిట దివ్య వరము. 

రాక్ష సంబైన పనులకు శిక్ష నునిచి 

రమ్య ,సౌజన్య భావాలు రాణకెక్క

మహిని నరకుని నరకి మాన్య సత్య;

కంటకంబును దొలగించె వింటి చేత 

దీపమన్దున శ్రీలక్ష్మి దేవి యుండి

పాప హరణంబు గావించి పరమ పుణ్య

హేతు వగుచును ప్రజలెల్ల హేల మెలగ

వరము లిచ్చును క్రీగంటి కరుణతోడ       

పరమ జ్యోతియె చీకట్ల పారద్రోలు

చీకటనగను పాపాల చింతలేను

అమ్మ కరుణయె దీపమై యవతరించ

జగతికంతట వెల్గులై జయముగూర్చు

నరక రాక్షస తత్త్వంబు నరుడు వదల

దీపకాంతిత హృదియె దేదీప్యమగును

అమ్మ చిరునవ్వె దీపమై యహరహమ్ము

వెల్గుచుండును ప్రతియింట విస్తృతముగ

అసురతత్త్వమె అమవస యందు నేను

మోద సమభావ కరుణలు పున్నమగును

మోము చిరునవ్వు సతతంబు ప్రేమమయము

శుభము గల్గుత!మీయింట ప్రభలునిండి

        

         గణేశ్ చతుర్థి శుభాకాంక్షలు.

          కరిముఖ! గణేశ ! గౌరీ

          వరదివ్యముఖాబ్జనేత్ర !వందేయనఘా!

          పరిపరి వేడెద దేవా!

          పరిమార్చుమదుష్ట రుజల పాపవినాశా!

 

   

                         దీపావళి శుభాకాంక్షలు.

      1.దీపాల కాంతి రేఖలు మీ భావిజీవిత భాగ్య రేఖలు కావాలని

          ఆశిస్తు....

      2.అక్రమాల అంధకారం పై సద్గుణాల వెలుగే

         దీపావళి. అలాంటి విజయం మీ సొంతం కావాలని కోరే..

      3.మీ అదృష్ట చక్రం విష్ణు చక్రంలా తిరుగుతు, కీర్తి ప్రతిష్టలు

        తారాజువ్వలా మిన్నంటాలని కోరుతు.

  4.దీపావళి టపాసులుఆటంబాంబులు కాల్చండి,పేల్చండి. కాని చేతుల్లో కాదు.

         మీ క్షేమం కోరుతు...

      5.అజ్ఞానాంధకారం కాల్చేస్తే కావలసినంత వెలుగువస్తుంది.

      6.కారుచీకట్లపై విజయమే కాంతిపుంజం.మీ కెల్లప్పుడు విజయమే 

         కలగాలని కోరుతు. 

      7.ఒక్క ప్రమిద చాలు కోట్ల చీకట్లను చీల్చటానికి. మీ జీవితం వెలుగులు

         విరజిమ్మాలని కోరుతు. 

      8.ఆనందమనే మతాబును వెలిగిస్తేనే కాంతులీనుతుంది. మీయింట 

         కాంతులు నిండాలని

      9.చీకటికి విరుగుడు చిఱుదివ్వే. వెలిగించి వెలుగులు

         పంచాలని కోరుతు.  

    10.ప్రతిరోజు దీపావళి రోజే కావాలని.

 కృష్ణాష్టమి శుభకామనలు. 

సీ:   తులసీదళమునకె తూగి భక్తియొకటె

                      సూత్రమ్మటంచును చూపినావు

        చీరలు దొంగిలి శృంగారమోహాలు

                            సారంబుగాదని చాటినావు

        అటుకుల కాన్కకే యైశ్వర్య మందించి

                            స్నేహభావంబదె నిల్పినావు

        అన్నాయటంచును నాక్రందనలజేయు

                          ద్రోవది కష్టంబు తొలచినావు.

       తే.గీ:వేదవేదాంతసారమ్ము మోదమలర

               గీత రూపాన వెలయించి కృపనుజూపి

              ధరణిప్రాణులయందున దాగియున్న    

              నందనందన శ్రీకృష్ణ !వందనములు.!!

 శ్రీకృష్ణ జన్మాష్టమి శుభాకాంక్షలు. 3.09.2018.

  కం: కన్నయ్య దయను బొందగ
        నెన్నెన్నో మార్గములను నెంచగవచ్చున్
        వెన్నయ్య గృహముజేరగ
        చెన్నైన పదములలరుట చిత్రం బయ్యెన్.
 ఉ:   తలచినతోడనే మనసు తన్మయమందగ భక్తి భావమున్
        పిలచినవారి యిండ్లకటు ప్రేమగవచ్చెడు నల్లనయ్య-ఆ
        జిలిబిలి పాదయుగ్మముల జేరెను మాదు గృహంబులోనికిన్
        కలిగెను సార్థకంబిటుల కన్నయ దర్శనభాగ్యమిచ్చుటన్.
 కం:  కన్నా యనగను బలుకును
        తన్నామము బలుకలేక తలచిన మెచ్చున్
        వెన్నన్ మ్రెక్కెడు దేవర!
        అన్నా! నీ పాద స్పర్శ యబ్బురమందున్.

         భోగిమంటలకాంతులు భువినినిండి,
         మాననీయత  సరదాలు మదులపండి,
         కనుము పశువుల క్షేమంబు కాంచుచుండ,
         పెద్ద సంక్రాంతి వచ్చెను ప్రియముతోడ.
        

 ముక్కోటి శుభాకాంక్షలు.
               
    ముక్కోటిపర్వదినమిది
    మ్రొక్కుమ పాపాలువోయి మోక్షమునందన్
    అక్కజరూపుడుశ్రీహరి
    దిక్కగు నిరతంబుమనకు దేదీప్యుండై.

4. పదవీ విరమణ. కృష్ణ కిశోర్.

                            షడ్వర్ణ ఆశీస్సుమాలు. 

       కృష్ణకిశోర్ ఉద్యోగ విరమణ సందర్భముగా. 

   1.సీ: "సీతామహాలక్ష్మి" చిన్నారి "కృష్ణ"వై

                         స్వర్ణపురిన్నీవు జననమంది

            "అన్నపూర్ణమ్మ"కు నానందహేతువై

                         పెంపుడు బిడ్డగా పెరిగినావు

             శారదసత్కృపన్ సంస్కృతాంధ్రాలలో

                       ననువైన పాండిత్యమరసినావు

             "కూచిపూడి"లో కోవిదుడవగుచు

                          చిన్నపెద్దలలోన మన్నినావు

    ఆ.వె:  బాలబాలికలకు బంగరుబాటగా

              సుగుణ వర్తనమును జూపినావు

              "కృష్ణమాయ"తోడ గెల్పును సాధించు 

               నీకు నాశిషాల నెమ్మినిత్తు.

   2.  ఉ:  పండితవంశమందు నవపల్లవమట్టుల తొంగిచూచి-మేల్

              మండిత శాఖయై విమల మానిత పూర్ణ సుమంపు తేజమై

              దండనుజేరి శారదకు దాసుడవై ముదమందినావుగా

              అండగనుండు నామె యిక హాయిగ నీవిల ముందుకేగా.

   3.  ఉ:  ఉత్తమ విల్వలంగన మహోన్నత మార్గము నీతిమార్గమే

              ఉత్తమబోధకుండను మహోత్తమ భావపరీమళంబులన్

              చిత్తములోన గల్గి వరసేవకుడంచధికార్లు మెచ్చుటల్

              ఇత్తఱి శ్లాఘనీయము; మహేశుడు గాచుత!మీ కుటుంబమున్.

   4.  ఉ:  ముప్పది వర్షముల్ పరమ మోదముతోడుత వాణిసేవలన్

              గొప్పగజేసి సద్యశము కూర్మినిబొందితి వాత్మశక్తిమై 

              చెప్పుట వింతగాదు ఘనశ్రేయమునందగ భావికాలమున్

              అప్పరమేశు సత్కృపను హాయి దలిర్ప సుఖంబునుండుమా!

  5.  సీ :  "మల్లన"పాత్రలో మధురమంజులమైన 

                             సోయగంపు నటన జూపినావు

               "అక్షర రత్న"మై యద్భుత శతకంబు 

                            గా "కిశోర్వాణి"యన్ కావ్యమల్లి

                అందరివాడుగా హాస్యరసము పంచి 

                            పాటవంబునుజూపి ప్రబలినావు

                 వక్తగా నెదుగుచు వైభవంబలరంగ

                            సాహిత్య సభలలో సాగినావు

       ఆ.వె:  "రామలక్ష్మి"తోడు రమ్యభావార్ద్రమై

                  నీదు కీర్తికాంత నింగికెగసె

                  సారవంతమయ్యె సంసార రంగమ్ము

                  నీకు నీవెసాటి నిర్మలాత్మ!

    6.  చం : "మధురకవీశ్వరా!"మనుమ!మన్మలు నీదగుమన్మరాండ్రతో

                 మధురమనోహరంబయిన "మాధవు"సేవను దివ్యభావనన్

                 సుధలనుజిందు జీవితము చూపరులద్భుతమంద నిచ్చలున్

                 పథమది మారిపోవునిక ప్రాజ్ఞులు మెత్తురు సత్యవాక్కులన్.

        తేది: 27.04.2021.                     ప్రేమతో అన్నయ్య

        మల్కాజిగిరి., హైదరాబాదు.    పొన్నెకంటి సూర్యనారాయణ రావు.

        ఫోన్:9866675770.                             ఎం.ఏ.,(తెలుగు)   

5. నూతనాంగ్ల సంవత్సర శుభాకాంక్షలు.

       

   హర్షము నందజేయుచు మహాద్భుతరీతి హృదంతరాళముల్

  వర్షపుజల్లుకున్ దనిసి వైభవమందెడు పంట  కైవడిన్
  ఘర్షణలేని యోచనల గౌరవమొప్పెడు కార్యసాధనల్
  ఆర్షసుసాంప్రదాయముల నడ్డకరమ్మిటు లాంగ్లవర్షమా!

   జనవరి పేరపుట్టితివి చక్కగ పెద్దరికంబుజూపగా
   అనయము నన్నిమాసములు హాసము సౌఖ్యము సంపదాళినిన్
   వినయముతోడనిచ్చికడు విజ్ఞత ప్రాణులుసంతసింపగా
   గనుమిక మాసమా పరమ గారవమొందెదవీవు నెయ్యమై.

    క్రొత్త వత్సర మన్నను కోర్కెలెన్నొ
    తీర గలవంచు జనులెల్ల నోరుదెరచి
    చూచుచుందురు వర్షమా సుంతదయను

    జూపుమాపట్ల నిరతంబు జోతలిడుదు.  

6. తెలుగు వారికి శుభాకాంక్షలు.  

.తెలుగు భాషాదినోత్సవము సందర్భముగ అందరికి శుభాకాంక్షలు.

             ఆంధ్ర భాషామతల్లికి కట్టాలి రక్షాబంధనం .

  శ్రావణపున్నమికే  రక్షాబంధనం చేసుకోవటం ఒక సంప్రదాయముగ వస్తున్నది. సోదరసోదరీమణులు పరస్పరం రక్షణకోరుతు  చేతికి కట్టే సూత్రమే యిది. ప్రేమ మనిషిని మనీషిగా చేస్తుంది. దానిని పెంచి పంచాలి. అలాగే మాతృభాషామతల్లికి కూడా మనమందరం   రక్షాబంధన చేయవలసిన దుస్తితి వచ్చింది. ఋణం తీర్చుకోవాలంటే కట్టక తప్పదు. అంటే ఏదో అద్భుతం చేయనవసరం లేదు . వీలైనంత తెలుగులో మాట్లాడి,నాలుగు మాటలు తెలుగులో వ్రాస్తే చాలు  సంతోషిస్తుంది మన ఆంధ్రమాత.

    తే.గీ. తెలుగుమాటలు నాలుగు పలుకగలను
            తెలుగు స్వారస్యమెంతైన తెలుపగలను
            తెలుగుదనమును భావాల నిలుపగలను
            తెలుగుకవి వారసుండనై వెలుగగలను.
  తే.గీ. అమ్మ నీపాద పద్మంబు నహరహంబు
          కొలుచుచుందును సదమలకూర్మితోడ                                 
          ఆంధ్రభాషామతల్లికి హారతిచ్చి
          రక్ష బంధన గూర్తును రమ్య గరిమ 

.
              అని అంటే చాలు మన భాషామతల్లి పొంగి పోతుంది.
                              తెలు(గు వాడు

1. సీ . తిక్కన్న కవితలో తియ్యని మధుధార
                           తనివిదీరని భంగి ద్రావుచుండ
           పోతన్న భక్తిలో పూర్ణత్వమున్బొన్ది
                       సతతంబు హరిసేవ సల్పుచుండ
           పొన్నగంటి వారి చెన్నైన తెను(గులో
                   అచ్చ తెను(గు కావ్య మలరుచుండ               
           శ్రీనాథుసీసాల శేషంబునుంచక
                            గుటగుట త్రాగంగ కోరుచుండ
    తే.గీ. తెల్గు వానికి లోటేమి తెల్పుమయ్య
            తిక్కనార్యుని, శ్రీనాథు తీరులన్ని
            పొన్నగంటితో కలగల్పి పొదివి పొదివి
            ముద్దు మురిపాల తెలు(గున మురియగలరు.
 2. సీ.  గళమెత్తి, కలమెత్తి గంభీర భావాలు
                      పదిమంది నలరించి పల్కువాడు!
          నమ్మిన సత్యంబు నవనిధులిచ్చినా
                        వదలని ధీరుండు వజ్రసముడు!
          ధర్మపాలనమందు దారిద్ర్యమొదవినా
                          హ్లాదాన జీవంబు నందువాడు!
           దేశరక్షణమన్న ధీరతజూపించి
                       త్యాగంబురూపించు తపనవాడు
    తే.గీ. వాడి గల్గిన పలుకుల వరలువాడు
             ఒంటి పోరుకు నెదురొడ్డి ఓర్చువాడు
            మిన్ను మన్నును లీలగా మెదపువాడు
            తెలుపవలెనా! యింకను తెలు(గు వాని! .
   తే.గీ. దేశ దేశములందున ధిషణ జూపి
            తనదియైనట్టి శైలిన తనరుచుండి
            తెలు(గు వెలుగులు  విశ్వాన తేట పరచి
            కీర్తి కాంతను చేబట్టు మూర్తి యితడు! . 

 వర్ణనాంశము...తెలుగు భాష.     
      
    పూర్ణబిందువు లోపల పొదుగబడుచు
    అక్షరాక్షర శోభల నలరుచుండి
    పదము పదమునసౌలభ్య మొదవుచుండి
    పలుకు పలుకున తేనియలొలుకు భాష.1.

    దేశభాషలందు తెలుగు లెస్సయనుచు
    కృష్ణ నృపునిచేత తృష్ణదీర
    పొగడబడినయట్టి ముచ్చటౌ బాసరా
    తెలుగు పూలతోట  వెలుగు బాట. 2.

     అవధాని గళంబందున
     వ్యవధానము సుంతలేక వరదగ పద్యాల్
     నవరస నిర్భర ధారా
     కవనంబున నొదుగు భాష కమ్మని తెలుగే.3.

     అమ్మ పాలలోని నద్భుతామృతమెల్ల
     దేశ భక్తురుధిర ధీరతనము
     భారతీయ మహిళ పావిత్ర్యమంతయు
     కలిపి జూడ తెలుగు కానుపించు. 4.

సమస్య: 

    సారసమంబుజంబు జలజాతము వారిజమబ్జమెన్నగన్

   కోరినపద్యముల్ సరస కోమలభావమలంకృతుల్ సదా

   తీరగు సంధులున్ మరియు తేటసమాసపు తీరుతెన్నులున్

   సారవిశేషసంపదగ సాగుచునున్నవి యర్ధసామ్యమన్

   సారస మంబుజంబు జలజాతము వారిజ మబ్జమెన్నగన్.

తెలుగు భాషాదినోత్సవ శుభాకాంక్షలు.

  తే.గీ :  తెలుగుపద్యాలు చదివిన  తేనెలూరు  

            తెలుగుపదములు సర్వదా ధిషణ పెంచు, 

            తెలుగు భావాలు నిరతంబు ధైర్య మిచ్చు .

            తెలుగుతనమది ఆధ్యాత్మ స్థితిని బెంచు.

 తే.గీ:  తెలుగు వెలుగులు గగనాన వెలుగవలయు.

           తెలుగు భాషకు పట్టంబు నిలుపవలయు. 

            తెలుగు తెలుగంచు ప్రభుతయు మెలగవలయు.

            తెలుగున కపుడె గౌరవ తీరు బెరుగు .

                   తెలుగు కవిత్వం... ఆధునికత..

ఆ.వె: కవిత మదిని సతము కదిలించుటే కాదు

          సంఘసేవకూడ సలుపవలయు

          గిడుగు వారి సేవ కీర్తించుటేగాక

          వ్యావహారికంబు వాడవలయు.

 ఆ.వె: తెలుగు భాషలోని తీయందనంబును

          తేటతెలుగు కవిత యూట పగిది

          పంచవలయు నెపుడు వర్ధిల్ల తరములు

          కష్టసుఖములందు కదనుత్రొక్కి.

 ఆ.వె: ఏసమస్యనైన నేరీతి తీర్చుటో

          యూహచేసి కవితనుంచవలెను

           ప్రజలకొఱకు కవిత పరిమళభరితమై

           నండనుండవలయు నహరహమ్ము

సీ: మధురపదార్ధాల మాధుర్యమంతయు

                      కలిపిన సారంబు తెలుగుభాష

        బోసినవ్వులలోని పున్నమి వెన్నెలల్

                తెఱచి చూపెడుభాష తెలుగుభాష

        సంగీత సాహిత్య సౌమనశ్యాలెల్ల

               పులుముకొనినది మా తెలుగుభాష

        దేశభాషలయందు దేదీప్యమానమై

             పలువురు స్తుతియించు తెలుగుభాష

    ఆ.వె: పద్యమైనగాని వరగద్యమేగాని

             పలుకు పలుకులోన కులుకులొదవి

            నవ్యశోభలీని దివ్యత్వముంబంచు

             అక్షరాక్షర సుధ లమరు భాష.

తెలుగు భాషామ తల్లిని యావత్ ప్రపంచం కాపాడుకోవాలనే సదుద్దేశం తో  . లక్ష్మీనరసింహ స్వామివారి సన్నిధి. న     చాల ఘనముగా జరిగినవి. ఎందరో    కవితామతల్లులు  వతంసులు, దిగ్గజములు , తల్లజులు,  కిశోరములు పాల్గొన్నారు. వ్యాసంగం 30గమ్. 30.ని.30 సె. సాగినది. అందరకు అర్హతా పత్రములు, జ్ఞాపికలను యిచ్చి గౌరవించారు. ఈ రీతిగా నరసింహ స్వామీ ప్రసాదం లభించినది. అటువంటి అదృ స్టానికి, నేను(పొన్నె కంటి సూర్యనారాయణ రావు, జొన్నలగడ్డ జయ రామ శర్మ, నోచుకోన్నాము . మరపురాని సాహితీ అనుభవమ్.          

.ప్రపంచ తెలుగు   కవితోత్సవములు. అక్టో బర్ 17.18. తేదీలు 

విశ్వశాంతి గేయమునకు తెనుగు.

  సర్వులకు శుభము కలుగుగాక! శాంతి కలుగుగాక!
  సర్వులకు ఎల్లవేళల స్నేహ, సోదరభావములు కలుగుగాక!

          యావత్ప్రపంచ దేశముల మధ్యన
          స్నేహభావము కలుగుగాక!
          సమస్త మానవాళి మనసులలో
          స్నేహభావము కలుగుగాక!

  సత్య పరిశీలన, యోగసాధన కలుగుగాక!
  ఎల్లకాలములందు స్వయం శిక్షణ,
  ఉత్తమ గుణరక్షణ నిలుచునుగాక!
  జీవనప్రయాణంలో అపరిచితులమధ్యను కూడ
  స్నేహభావం కలుగునుగాక!

  త్రికరణశుద్ధిగా ఏడడుగులు నడచి స్నేహం చేస్తే
  హృదయాలలో స్థానం ఏర్పడుతుంది.
      సమస్తప్రపంచము భారతీయజన
      సమైక్యత,సమతలనాదరించుచు
      విశ్వశాంతి మార్గమును అనుసరించుగాక!

      ఇది సర్వ జనులు ఆమోదించు
       క్షేమకర మహాయోగము.

  (ప్రక్కన గాయకులు): ॥అలాగే అగుగాక!॥
      ఇది సమస్త దేశములామోదించు
       విశ్వశాంతి స్వరరాగము!
     ఇది సమస్త దేశములామోదించు
     శాంతిప్రదమైన ఒక యోగము! ॥ అలాగే అగుగాక!॥
     సర్వులకు శాంతి, శుభములు కలుగుగాక!!

గురుదేవులు రవీంద్రనాథ్ ఠాగూర్ భావాలకు ఆంధ్రానువాదం.

తే.గీ. దయయు ప్రేమైక గంథముల్ తనివిదీర
         నింటనింపిన బోనేల నీశు దరికి?
         పూజసేయంగ వేవేల పూలతోడ
         భక్తి తత్త్వంబునెఱిగిన ప్రాజ్ఞులకును.
భావము.. ఓ మానవా!దయ, ప్రేమ అనే సుగంధాలను నీ యింటిలో

తే.గీ. మనసునందలి గర్వంబు మచ్చరంపు
         చీకటుల ద్రుంచ యత్నంబు సేయవలయు
         కాంతివంతము నీకది క్రాంతిగూర్చు.
         దీపముంచగబోనేల దివ్యుకడకు ?

తే.గీ. శిరము వంచగ నేటికి శివుని గుడికి
         తోడివారికి వినయాన తోడునిలచి
         తప్పు జరిగిన నిలువెల్ల తాపమంది
         పూర్ణమైనట్టి జ్ఞానివై ముందుకేగు.

తే.గీ. పూనుకొనగను పేదల పుష్టికొఱకు
         యత్నముంజేయ దళితుల హాయిగోరి
         యువత ప్రగతికి సతతంబు నూతమీయ
         గుడికిబోనేల మానవా మడులుగట్టి?

తే.గీ. నీదు కాఠిన్య వచనాల బాధజెంది
         కుములువారిని దరిజేరి కూర్మిదనర
         క్షమనువేడుము సరియగు క్షణమునందు.
         వేడనేలకో శివుని నీ గోడుదెలిపి?

విశ్వావసు ఉగాది (2025..26) పద్యములు.(తిరుమల

                నాదనీరాజనం)  30.03.2025.

 సీ|| ప్రాణికోటి మదిని పరమాత్మయై వెల్గు., 

                         తేజంబు నీవెగా తిరుమలేశ!

సకలంబు భ్రమయైన సంసారబంధాల., 

                      తీరుమార్చగగల్గు తిరుమలేశ!

కాలగమనరీతి కనిపింప నీయని., 

                        చిద్విలాసపు హాస! శ్రీనివాస!

భక్తి తత్త్వపు నిజభావనల్ జూపిన., 

                అభయంబు నిచ్చెడి యమలతేజ!

తే.గీ. స్వామి! సప్తగిరీశ! “విశ్వావసు”వన.,

         నీవె, ఎన్నిజన్మలకైన నిర్ణయాత్మ

         కుండవు మహితమూర్తి! వైకుంఠవాస! ., 

         జగతి గావుమయ్య సతముప్రగతిజూపి..1.

సీ|| ఏడేడు లోకాల నెచ్చట జూచినన్.,

           కలిమాయ తప్పించు ఘనుడవీవె.

      అలమేలు మంగమ్మ యలుకలు దీర్చుచు., 

                 నవ్వించి కవ్వించు నటుడవీవె.

      భక్తుల హృదయాలు పండించి నిండించి., 

                         పరవశించెడు ఘనపాఠివీవె.

       లడ్డుకంబులనిచ్చి లాలస జూపించి.,

                     దరిజేర్చు కొనునట్టి హరివి నీవె.

తే.గీ. క్రొత్త పంచాంగ మందున కూర్మితోడ .,

        నీదు కరుణనుజూపించి నిర్మలాత్మ!

        అన్ని రాసుల వారికి తిన్ననైన., 

        కనకవర్షంబు గురియించు కమలనాభ! 2.

సీ|| కొండలలోన పుంస్కోకిలంబులతతి ., 

               చైత్రమాసపుసౌరు చాటుచుండె

    తుమ్మెద రాగాల తోషణ గానాల .,

                    మల్లెతోటలలోన మారుమ్రోగె

     చిత్తజు పదునైన మెత్తని బాణముల్ .,

              గుండె లోతులలోన గ్రుచ్చుకొనియె

      వాసంత లక్ష్మియే వయ్యారముల్ జూపి .,

                      చిలిపిప్రకృతితోడ చేయిగలిపె

తే.గీ. ఈ ‘‘యుగాది’’ని నిట్లుగా నీశ్వరయ్య! .,

        మార్చివేయుట కీవెగా మంచిగురువు

        పరమకారుణ్య సౌజన్య! వరద! మాకు .,‘‘

        విశ్వవసువు’’న శుభముల విసరుమయ్య 3.

సీ|| వేంగమాంబాదేవి విష్ణుభక్తికిమెచ్చి ., 

                 అన్నదానమిచట నమలు పరచ

      వృద్ధులు పంగులు వికలాంగులెల్లరు .,

                శీఘ్ర దర్శనములు చేయుచుండ
     గోసేవ జేయుచు గోవులనన్నిటన్ .,

                  తనివార ప్రేమను దనుపుచుండ

     తిరుమల క్షేత్రంబు దేదీప్యమానమై .,

                     ఘనపు టుగాదిగా కాంతులీనె

తే.గీ. నిత్యకల్యాణమిచ్చట నిర్మలాంగ., 

        పచ్చతోరణమైచను పరమపురుష!

        నీదుపాదంబులే సాక్షి నిజము నిజము ., 

       ధన్యమాయెను మాజన్మ ధరణినాథ!  4.

సీ|| షడ్రసో పేతమై సకలజ నాళికి ., 

             పలురుచుల్ చూపించు పండుగిదియ

      క్రొత్తవస్త్రాలతో కోలాహలమునిండి., 

                 ప్రతియింట వనలక్ష్మి వరలుచుండ

      పంచాంగ పఠనాన భావిని దలచుచు ., 

                         కష్టసుఖంబులు కలలుగనుట

       ఆదాయ వ్యయములు సాదాగనుండుటన్ .,

                              జీర్ణించుకొనలేని జీవితాలు

 తే.గీ. మానసికమైన దైహిక మార్పులన్ని ., 

         నీదు కరుణాంత రంగమే నిశ్చయముగ

         నిజము కదటయ్య లోకేశ! నీరజాక్ష! ., 

         కాక, రుచులును ప్రతిభలు కలుగుటెట్లు?5.

   సీ|| నాదనీరాజన వేదసమర్చనల్ .,

                  నిత్యసంపూజిత నెలవు మీకు

         భక్తదర్శనములు పల్లాండు దీవనల్ 

                  పరవశంబునుగొల్పుప్రభలు మీకు

         మాడవీధులద్రిప్పు మానితసేవలే 

                    నిత్యకల్యాణముల్ నీకునెపుడు

          తిరుమల గడపిన దివ్యక్షణంబులే., 

                   వైకుంఠమునుజేరు వరుసమెట్లు

 తే.గీ. మాకు దక్కిన భాగ్యంబు మదనజనక! .,

         కలియుగంబున వెలసిన కైటభారి

         ఏడుకొండల మా సామి వేడుకొందు., 

         పాదపద్మములంటుచు ప్రతిదినంబు..6.

   సీ|| ఆదిశేషునిపేర యమితకీర్తినిగాంచి., 

                     “శేషాద్రి”యయ్యెను సేవ కొరకు

         నీలాంబరీ దేవి నీలాలనిచ్చుటన్., 

                        “నీలాద్రి”యైనిల్చె నిన్నుగొల్వ

         అంజనాదేవియె ఆత్మనిన్ దలచుచు., 

                 “అంజనాద్రి”యనగ యలరెనాడు

        వృషభాసురుని గర్వ విచ్ఛిత్తి జేయుటన్.,

                   “వృషాద్రి”యైచనె వినయమొప్ప

         నారాయణాఖ్యుడన్ నవవిధ భక్తుడే., 

                  “నారాయణాద్రి”యై నభముదాకె

          గరుడవాహనమది కంజాక్షుసేవింప .,

            “గరుడాద్రి”యయ్యెను ఘనముగాను

          వివిధపాపంబులన్ వీగగ జేయుటన్.,

                 “వేంకటాద్రి”గ మారె విభవమొప్ప

తే.గీ. నామజపముల శక్తిమై నడక తోడ ., 

        ఏడుకొండలు భక్తితోనెక్కి వచ్చి

       నిన్ను దర్శించు నరునకు నీరజాక్ష!.,

       సప్తజన్మల పాపాలు సమసిపోవు..7

సీ|| తీర్థయాత్రనుజేయ తిరుమలనెంచుటే.,

                   పూర్వజన్మలలోని పుణ్యఫలము

      తలనీలములనిచ్చు ధర్మంబుపాటింప., 

                        దర్పహీనుండైన దాసుడనుట

       కోనేటినీటను గ్రుంకులాడుటయన్న.,

                    జాహ్నవీతటిలోన స్నానమగును

       బాలాజి చెంగటన్ భక్తినుగాదికై.,

                          అక్షరార్చనసల్ప మోక్షదంబు

తే.గీ. అన్నిగ్రహముల కరుణకు నంజలించి., 

         ప్రకృతిశోభకు నిలువెల్ల పరవశించి

         మానితావకాశ మిడిన మాన్యులకును., 

         వందనమ్ములు శ్రీకర చందనములు..8.

సీ.:    శ్రీదేవి తో నీవు చిద్విలాసుడవౌచు

            భువియంత దిరుగాడ పులకరించు

         పంచబాణుని గురి బ్రహ్మాస్త్రమై తోచి

                   అనురాగ రాగాలనలర జేయు

          పాదపంబులు పూర్ణ పల్లవ శోభలన్

                    పచ్చదనంబును బరచుకొనును

         శృంగార భావముల్ చిత్తాన మొలకెత్తి

                     సౌంజ్ఞల సరసాల సాగుచుండు

  తే.గీ: ఆదిపురుషా ! కమలనాభ! యమలచరిత!

          చేతనత్వము నీదివ్య సృష్టి యనుచు

         చేసిచూపితివయ్యరో!శ్రీనివాస! 

         కాలచక్రంపుటాకు నుగాదియనగ..9

సీ:    వేపపూతయు నుప్పుబెల్లంబు కారముల్

                      పులుపు వగరు లెల్ల పొందుపరచి

        గా జులచేతితో ఘనమైన ప్రేమతో

                నోర్పుగా నొకటిగా నూరినూరి

        నళిననేత్రుని ముందు నైవేద్యమిడకున్న

              రుచియురాదు మరియు శుచియులేదు

 తే.గీ: భక్తి తాత్పర్యభావముల్ రక్తిదనర

         వింతలేహ్యంబు విష్ణు నైవేద్యమిడిన

        అమృతతుల్యంబు రుచులు మహత్తరములు

        శ్రీనివాసుడ!నీలీల చెప్పదరమె?..10

                                          నమస్సులతో....‘‘సూర్యశ్రీ’’  

చి.ల.సౌ. దుర్గ 48 వ పెళ్లి రోజు శుభాకాంక్షలు,

             శుభాశీస్సులు. ది.12.05.25.

సీ. ఏసీబి క్లబ్బులో నెట్టి కార్యంబైన

           ముందంజతో జేయు ముద్దుగుమ్మ!

    స్త్రీసాజమైనట్టి చిర్నవ్వు పువ్వులన్

            ముఖ్యప్రసంగాల బూయజేయు

    కర్తవ్యమెంతటి కష్టంబుగానున్న

              లౌక్యంబు జూపించి లాగివేయు

     సాహితీమూర్తిగా సమరసభావాల

              పరిమళభరితమౌ పాటబాడు

తే.గీ. ఆటపాటలతోటగా నలరజేసి

        క్లబ్బు సభ్యులనందరి కదలజేయు

        దుర్గ సత్యనారాయణు తోడుగోరి

        పంచుకొనె జీవితంబును పరమముదము

        ఆయురారోగ్యములసర్వు  లరుగాత!

             శుభాశీస్సులతో....సూర్య శ్రీ.

          పొన్నెకంటి సూర్యనారాయణ రావు.

జీ సుభాష్ చంద్రబోస్ గారి వజ్రోత్సవము. ది.11.12.24.
"హరికథాపితామహుని"గా నద్వితీయ
ఖ్యాతి గన్న" వేంకటనాథు"కాంతి రేఖ
ఘన"సువర్ణ"కు నోముల కలల పంట
జీ " సుభాష్ చంద్రబోస"ను జేతయితడు
రాము కరుణను రంగాన రమ్యగరిమ
డెబ్బదైదేండ్లు పండించె నిబ్బరముగ
వేగవచ్చి "వజ్రోత్సవ"వేడుకలకు
ఆయురారోగ్యభాగ్యాల నమరునట్లు
దీవనాళిని పంచుడు దివ్యులవలె.
చీరాల కాలేజి చిన్మయతేజమై
      ప్రిన్సిపాల్ పదవిని వీడెనెవడు?
అస్సామునందున నసమాన ప్రతిభతో
      నంజలుల్ గైకొన్న ఆంధ్రుడెవడు?
రసశాస్త్రమున్నేర్చి రమ్యసాహిత్యమ్ము
      పూజించి భావించు పుణ్యుడెవడు?
"మోడ్రనార్కెటెకు"గ ముద్దుగా బిలిపించు
       కొన్నట్టి యాత్మీయ గురువెవండు?
"హార్వర్డ్"స్కూలులో నత్యుత్తమాచార్య
      బిరుదమందిన ఘన పురుషుడెవడు?
"జువెల్ ఆఫ్ ఇండియా" సుకుమారబిరుదంబు
      నందిన సమ్మానితాంధ్రుడెవడు?
అర్ధాంగి, బిడ్డల యసమాన ప్రేముడిన్
     సతతమందిన మాన్య సరసుడెవడు?
ఎంతగా నెదిగినన్ అంతె యొదిగియున్న
      డెబ్బదియైదేండ్ల డింభకుండు
సరసుడైనట్టి "సుభాషు చంద్రబోసు"
కాక వేరొండు గురువుగా కలడెయిలను?
అతిశయోక్తిది కాదయ్య అసలు నిజము
విజ్ఞులందరు దీవింప వేగరండు!

 "చిరంజీవి బుచ్చివేంకటప్పేశ్వరశర్మ"కు డెబ్బదియవ 

వసంతోత్సవ శుభాకాంక్షలు, శుభాశీస్సులు.15.8.25

కోటి భావాలకవితల గ్రుమ్మరించు

గోటి నొక్కుల చిత్రాల మేటిజూపు

రాటుదేలిన రాగాల రక్తిబెంచు 

శక్తి నీకిడె పరమేశ చక్రవర్తి! 

దాని బలమున గతమంత ధైర్యసాహ

సాలు స్నేహాలు ప్రేమలు సల్పుచుండి

"డెబ్బదివసంతముల" నెల్ల నిబ్బరముగ

గడపినావయ్యరో "బుచ్చి!"కరము ముదము.

భార్యగ "ప్రమీల" బంధంబు పర్వమనగ

సంతసంబున మణులుగా సంతు వెలిగె

మీకు నీ వసంతోత్సవ సాకుతోడ

గౌరవంబును రెట్టించె ఘనముగాను.

"రాము"కరుణను మీరెల్ల రాగబంధ

బంధితులయి "నూరేండ్లు" సద్భావమొప్ప

హాయినుండుడు భాగ్యులై యహరహమ్ము

కీర్తికాంతయె మీదగు కేలుబట్టు.

"ఆంజనేయుండు,శ్రీరాము" నాజ్ఞతోడ

సర్వ విధముల మీకిడు సంపదాళి

వారి సన్నిధి యుతృష్ట వారధగును

విజయ చిహ్నాలు కోరకె వెల్గుజూపు. 

చి.ల.సౌ.హిమజ పెండ్లికి ఆశీస్సులు.

శ్రీలకునాలవాలమగు శ్రీహరికోమలి సంపదాళిచే

బాలగణేశుమాత సురవందిత సంతతమంగళమ్ముచే

లీలగ వాక్సుధల్ చిలుకు లేమ సరస్వతి జ్ఞాన భిక్షచే

హేలగ దంపతుల్ యిల మహేంద్రుని భోగములందుగావుతన్!

"హిమజ భరతుల" బంధంబు హేలసాగి

అర్ధనారీశు తత్త్వాన నలరుచుండి

చన్నవఝల వంశంబు సారకలిత

భవ్య వృక్షమై వేయేండ్లు వరలుగాత!.

రెండువంశాల విఖ్యాతి లేమవలన

వృద్ధి యన్ సూక్తి కలదమ్మ ; పృధ్వియందు

దాని సార్ధకపరచుచు తపముభంగి

పంట పండించు సంతోషమింటికెగయ

భరతభూమిజ ! "హిమజ!" భరతురాణి!

తల్లిదండ్రుల మానసవల్లివీవు

అన్నదమ్ముల ఆశల కన్నవీవు

పుట్టినింటికి సంపూర్ణ మోదమట్లు

మెట్టినింటనుకూడను మెలగుమమ్మ!

నీదు కుంచెనుండి నిర్మలభక్తుడౌ

హనుమ వెలసె రాము హత్తుకొనుచు

నాదు మనము పొంగె నవ్యభావఝరుల

"సూర్య" దీవనలందుమా సుందరాంగి!!.

         హిమజాభరతులకల్యాణం, సప్తపది. అక్షరాక్షతలు.

         శుభముహూర్తము: ది.08.10.2025(శనివారము)

                            రాత్రి.గం.10.16.ని.లకు

హిమవన్నగరాట్సుత తన

    ప్రమథాదిగణంబుతోడ బయనముగాగా

    ఉమతో నేని శంభుడు

    హిమజాకల్యాణమునకు హేలగ వచ్చెన్

మమత జూపించి జగమేలు మాన్యతముడు 

    నోమ మండపమందున గోముగాను

    పాటిసేయుచు వచ్చె దీవనలనీయ,

    సఖ్యమెంతైన వృద్ధియౌ 

    ఆశిషంబులనీయగ నాత్మభవుడు

జాబిలి తలపై దాలిచి 

     సాభాగపు గౌరితోడ శంభుడు వచ్చెన్

     నీ భాగ్యమేమి జెప్పెద!

     సౌభాగ్యపుదీవనాళి సామియొసంగున్

భ  రతభూమిని జన్మించ పరమవరము

     పుట్టి ఉద్వాహమాడుట పూర్ణఫలము

     వేదమంత్రాలసారంబు విదితమవగ,

     జీవితంబును సాగింప క్షేమకరము

ర  త్నసాదృశ్య కన్నియ లలిత హిమజ!

    నేటినుండియు విజ్ఞాన పేటివగుచు

     బహుముఖమ్ముల కార్యాలు పంచుకొనుచు

     భరతు హృదయానురాగమున్మెరయుమమ్మ!

తుల లేని సంతసంబున, నిలలో ననురాగసీమనేలగవలయున్

      తలలో నాల్కగ నిర్వురు, వలిపపు భావాలతోడ వర్ధిలుటొప్పున్

పెండ్లి మండపమందున ప్రియముగూర్చు

       చిన్ని దంపతుల మనము శ్రేయమెలర

       భోగభాగ్యాల నిరతంబు పొందునట్లు

       ఆయురారోగ్యసంపద లందునట్లు

       అక్షతలు జల్ల రండి! మహాత్ములార!

 మల్కాజిగిరి     శుభాశీస్సులతో.... అమ్మమ్మ ,తాతగారు.

 భాగ్యనగరం             పొన్నెకంటి సూర్యనారాయణ రావు

                                     "              ఇందిరాదేవి