ఉన్న దానిలోనే దానం.

ఉన్నదానిలోనే అన్నదానం.

       సూళ్ళూరుపేటకు షుమారు 60కి.మీ దూరంలో"మల్లాం" గ్రామంలో స్వయంభువుగా వెలసిన శ్రీవల్లీ,దేవసేనాసమేత సుబ్రహ్మణ్యస్వామి దేవాలయం ప్రాచీనమైనది. అందు మనోహర శిల్పసౌందర్యం చూపరులను కట్టి పడేస్తుంది.
       ఆలయనిర్వహణాధికారులు భక్తులు దైవదర్శనం చేసుకొనేసమయంలోనే "అయ్యా అందరు స్వామివారి ప్రసాదం తీసుకొనివెళ్ళండి" అని చెప్పటం వారి అన్నదానవ్రతానికి నిదర్శనం. ప్రస్తుతం అన్నదానం మంగళ,ఆదివారాలలో జరుగుతుంది. దాతలు అధికంగా విరాళాలిస్తూ ఉంటే ప్రతిరోజు అన్నదానం నిరతాన్న దానంగా మారుతుంది.

     స్వర్ణ దానంబు లిచ్చును స్వర్గ సుఖము
     వస్త్ర దానంబు ప్రఖ్యాతి వరలజేయు
     భూమిదానంబు వలనను పొందుయశము
     అన్నదానంబు సర్వంబు నమరజేయు.

 మంగళ,ఆదివారాలలో భక్తులు షుమారు200మందివస్తారు. ఆరోజును దృష్టిలో పెట్టుకొని అన్నదాతలు తగిన ద్రవ్యం చెల్లిస్తారు. అన్నము, ఇతరపదార్థములన్నీ సిద్ధమై భక్తులు క్యూలో నిల్చినను వెంటనే భోజనము వడ్డించరు. ఆరోజునకు ద్రవ్యముదానమిచ్చిన దంపతులువచ్చి అన్నమున్న గిన్నెకు (అన్నపూర్ణాదేవికి )హారతిచ్చి అగరువత్తులు వెలిగించి ధ్యానించి వారు ప్రారంభించిన తదుపరే క్యూ లోని వారికి పెడతారు. సాధారణంగా ఈరోజుల్లో ఇలాంటి స్థలాలలో తిని అన్నదానానికి ద్రవ్యం ఇవ్వనివారెవ్వరు ఉండుటలేదు. కారణం "మనం తినే అన్నం ఎవరో ఇచ్చినదే"అనే స్పృహ తప్పక ఉంటుంది. "అన్నం పరబ్రహ్మ స్వరూపం" ఒక్క పదార్థం కూడ వృథాచేయకూడదు. తింటేమనం తినాలి లేకుంటే పేదలకు పంచాలి. మనం తినటానికి తక్కువ ప్రాథాన్యమిచ్చి పేదలు తినటానికి ఎక్కువ ప్రాధాన్యమివ్వాలి.

           దాన గుణమది యుత్కృష్ట ధర్మమెపుడు
           మనము తిన్నది యెంతైన మట్టిపాలు
           పరులకిడునది శక్తి మై భక్తి తోడ
           నధికతరమైన ఫలితంబునందజేయు.

మనమీనాడు ఏదేవాలయానికి వెళ్ళినా అన్నదానం జరుగుతున్నది. అది నిరంతరాయంగా జరగటానికి మనం చేతనయినంత సాయం చేద్దామా? కాదనెందుకంటారు మరి చేయికలపండి...

జో అచ్యుతానంద జో జో ముకుందా . 10.04.19.

జో అచ్యుతానంద  జో జో  ముకుందా! 
అన్నమయ్య లాలి పాట. దాని భావము .
     ఈ రోజులలో పసిబిడ్డలు యిండ్లలో పడుకోవటానికి ఊయలలు లేవు. ఏడ్చే పాపల రోదన ఆపటానికి తల్లులకు లాలి పాటలు రావు. సెల్ యుగము కనుక పసివాడు ఏడుపు రాగం ఆలపించగానే , తల్లి ఏమాత్రం కంగారు తొట్రుపాటు లేకుండా సెల్ లో లాలిపాటల యు ట్యూబ్ ఆన్ చేస్తుంది . అన్నమయ్య లాలీ, జోల పాటలు ఆన్ చేసి వినిపిస్తే వినటానికి బాగానే ఉంటాయి. కానీ సంపూర్ణముగా అర్ధం అయ్యేది ఎందరికి.? ముఖ్యం గా ఈనాటి మేటి సెల్ ఫోన్ దేవతగా భావించే నవయుగ, నవ నాగరిక మాతృ మూర్తులకు చక్కగా అన్నమయ్య భావం అర్ధం కావాలనే సదుద్దేశం తో భావాలు వ్రాస్తున్నాను. ఆస్వాదించండి.  
ఒక తల్లి తన కుమారుని పరమాత్మునిగా (రామ, గోవింద ) గా నెంచి నిద్ర పుచ్చే ప్రయత్నం గా ఉయ్యాలను ఊపుతూ , పరమాత్మను ఆతడు ఏ రూపంలో   ఈ దేహం లో  ఉంటాడో , దేహ స్వభావము ఏమిటో? ఈ దేహం లో పరమాత్మ ఎలా ఉన్నాడో ? ఏమి చేస్తే ఈ జీవికి దర్శనమిస్తాడో? ఆధ్యాత్మిక తత్త్వాన్ని వివరిస్తూ అన్నమయ్య తాను గాంచిన (తన దేహం లోనే )పరమాత్మ స్వరూపం వివరించి సాధన మార్గాలను కూడా తల్లి పాత్ర ద్వారా చెప్పిస్తాడు. 
1. తొలుత బ్రహ్మాణ్డమ్ము   తొట్టి గావించి , నాలుగు వేదములు గొలుసు లమరించి !
   బలువైన ఫణి రాజు పాన్పు గావించి , చెలియ డోలికలోన చేర్చి లాలించి !!  జో , జో !  
  భావము : ఓ ! ఆనంద రూపియగు అచ్యుతా! ముకుందా! పరమానందా! జో జో అంటుందా అమ్మ. ముందుగా డోలిక (ఉయ్యేల ) వర్ణన .  ఊయేల తొట్టి బ్రహ్మాన్డము, 4 గొలుసులు  4 వేదాలు (1.ఋగ్ 2. యజుర్ 3.సామ. 4 అధర్వ ). పాన్పు (ప్రక్క) ఫణి రాజు . (ఆది శేషుడు) . ఇటువంటి  ఊయల  లో  3 లోకములనేలు మిమ్ములను ఉంచి  యూపుట  నా పూర్వ జన్మ పుణ్యమే.  
2. తొమ్మిది  వాకిళ్ళ దొడ్డి లోపాలను , క్రూరులగు ఆరుగురు, సాధులైదుగురు 
   అంతట ముగ్గురు మూర్తులున్నారు. తెలివి తెలిపేవాడు దేవుడున్నాడు  !! .   జో , జో ! 
  భావము : ఈ దేహము 9 వాకిళ్ళ దొడ్డి . అనగా ... తెరచిన నవ రంధ్రాలు ( నేత్రాలు 2, చెవులు 2. ముక్కు 2 నోరు 1 , మలము 1. మూత్రము 1.) దొడ్డి వాకిళ్లు  రక్షణ లేనివి . క్రూరులు 6 గురు . ( కామ , క్రోధ , లోభ , మోహ, మద , మత్సరములు) సాదు లైదుగురు . ( జ్ఞానేంద్రియములు . కన్ను ముక్కు చెవి నాలుక చర్మము ) ముగ్గురు మూర్తులు ( సత్వ రజస్ తమో గుణాలు ) తెలివి తెలిపే దేవుడు అనగా జ్ఞానేంద్రియములను అదుపుచేయగల జ్ఞాని ఆయాత్మ శక్తి . ఒకడున్నాడు . 
 3. వీథినొక బాటలో విదితంబు చేయ , వేటలో భేరి మృదంగములు మ్రోయ 
     కోట కోటగాండ్రంత కోలాటమేయ, పేటలో లేని ప్రభువు దొరతనము  చేయ . జో జో !!
  భావము : వీధిలోని ఒక బాటలో ఒక శుభ వార్త వినిపింప , పేటలో భేరి మృదంగములు మ్రోగినవి . కోటలో అందరు కోలాటమాడగా పేటలో లేని ప్రభువు తన దొరతనం చూపాడట. ఈ శరీరమునకు ప్రభువైన ఆత్మ తన అధికారం చూపుతున్నాడని  భావము . ( ఈ భావము కొంత సందేహముగా ఉన్నది ) 
 4. పట్టవలె ఆరుగుర్ని పదిలంబుగాను , కట్టవలె ముగ్గుర్ని కదలకుండగను .
   ఉంచవలె ఒక్కర్ని హృత్కమలమందు , ఉండవలె పండువలె నిండుగాను. జో జో !!
భావము :  కామ క్రోధాది ఆరుగురు  దొంగలను స్వాధీనం చేసుకోవాలి . సత్వరజ స్తమో గుణములను వాటి స్థాయిలో ఉంచాలి . ఒక్క పరమాత్మనే హృదయ కమలంలో ఉంచితే నీవు పండువలె నిండుగా ఉంటావు.
 .5. నీ ముక్కు , నీ చెవ్వు, నీ కన్నుదాన్నే , ఏమి తెలిపారు ఒరే నీ వెవ్వరన్న ?
     ఏమయ్యి తిరిగేటి ఎరుక నెరుగవు , నీ కామ్యమైన దృశ్యము నీవు కనవు . 
భావము :నీవు ముక్కు కన్ను చెవులు ఉన్న దేహానివా? (ఆత్మవా?) లేక దేహములో దాగిన పరమాత్మవా?  ఏమై తిరుగుతున్నావో నీవెరుగవు . నీ కవసరమైన పరమాత్మను నీవు చూడవు . ( నీలోని దైవాన్ని చూడవు )
 6. షడా ధారములు దాటి శిశువును భేదించి , శాస్త్రార్థముల సద్గురువును పూజ చేసి 
    నేతి నేతి  వాక్యముల నేతి  గావించి, ఆతూర్య తుర్యముగ నీవు  వెల్గ .  
.భావము : షడా ధారములు (  మూలాధార, స్వాధిష్ఠాన, మణిపూర, ఆహిత, విశుద్ధ, హంక్షములు (సహస్రారము ) అను షట్ చక్రములు దాటి  వీటి ఫలితమైన శిశువును (వేయి రేకుల మొగ్గను ) దాటి,శాస్త్రార్థముల సద్గురువు నుపాసించి (న +ఇతి =నేతి.. యిది కాదు  )  ఇది కాదు ఇది కాదు అనే తర్క వాక్యము ప్రకారము భగవంతుడు తప్ప వేరేదియు కాదు  అని నీవు ప్రకాశింపవలెను . 
7. ఏల యేడ్చెదవు నీకేమి కావలెనురా?, మేలైన గురుబోధ పాలు త్రాగరా 
    స్త్రీలలో చేరి దుర్బుద్ధి చెందకురా, ఆలించి ఆత్మలో అనుభవము కనరా! . 
భావము : నాయనా ఎందుకేడుస్తావు ? నీకేమి కావలె? మేలైన గురుబోధ అనే పాలు త్రాగు . స్త్రీలలో చేరి చెడుబుద్ధి అలవరచుకోవద్దు . నీ మనసు లగ్నం చేసి ఆత్మానుభూతిని పొందు . 
 8. అదిగో ఆకాశమే అడ్డ దూలంబు,కుదురైన కమలమే  గురు పీఠకంబు 
    పదునాల్గు స్తంభాల బంగారు చేర్లు, పరమాత్మ నిన్నిపుడు పట్టి యూచేరు . 
  భావము : పదునాల్గు స్తంభాల బంగారు చేరులు (త్రాళ్లు )కలిగిన నీ ఊయలకు ఆకాశమే అడ్డ దూలము. కుదురైన కమలమే నీకు గురు పీఠ . నిన్నెల్లప్పుడు  భగవంతుడే పట్టి  యూపుతుంటాడు . 

9.తన వాసన త్రయంబు తొట్టెగావించి , మనసునే దొడ్డ దూలమ్బవత బూని 
   పదునాల్గు స్తంభాల బంగారు మేడ ,పరమాత్మ నిన్నెపుడు పట్టి యూచెదరు .  
 భావము : వాసన త్రయము (లోక వాసన , శాస్త్ర వాసన, దేహ వాసన ) లను తొట్టిగా చేసి , మనసు అనే దూలము ఆధారముగా పదునాల్గు స్తంభాల మేడలో పరమాత్మ  నిన్నిపుడు ఊపుతున్నాడు .  
 10. యుక్తిచే ఎరుక మూర్తి గుర్తు పట్టి , ,సొక్కేటి  ఇంద్రియముల త్రొక్కి పట్టి 
      పట్టేటి తన సుఖము బాగుగా ఎత్తుకొని , ఆనంద భరితులైనారు . 
 భావము : పూర్వ జన్మ జ్ఞానమును(ఎరుక) యుక్తిగా గుర్తు పట్టి , ఎగిసి పడే ఇంద్రియములను త్రొక్కిపెట్టి ఎవడు ఉంటాడో వాడే సుఖము చెందును . ఆనంద భరితుడై ఉండును. 
 11. ఓంకారమను మేటి ఒక తొట్టిలోన , తత్త్వమసి మాట చలువలు గప్పి 
      ఎరుకలో పాపడిని ఏర్పాటు చేసి , ఏడు భువనముల వారు కలయ యూచెదరు. 
భావము : నాయనా గొప్ప ఓంకారమనే  ఉయ్యాల తొట్టి లో (తత్ = ఆ, త్వం = నీవే , అసి = నేనై  ఉన్నాను ) తత్వమసి = ఆ భగవంతుడే నేను . అనే మాటల వస్త్రము కప్పుకొని  ఆ జ్ఞానము లోనే పాపాయిని ఏర్పరచి , ఏడు లోకముల వారు  నిన్నే భగవంతుడని    యూపెదరు . 
 12. ఇడా పింగళ  గంగా యమునల నడుమ, తిరువేణి మద్యము తీరుగా కనుమా !
      పర పశ్యంతి అంతరంగమున , ప్రణవమే సుప్రకాశమై వెలుగుగా !
భావము : ఇడా ,పింగళ, సుషుమ్న  అనునవి మానవ దేహమున సంచరించు అత్యంత ప్రధాన నాడులు . ఇవి క్రింది నుండి మీదకు ప్రసరిస్తాయి.  ముక్కు ఎడమ వైపున ఉండునది ఇడా , కుడి వైపున ఉండునది పింగళ . కుడి ఎడమలకు మధ్యన ఉండి బ్రహ్మ రంధ్రమును ఆవరించి యుండునది సుషుమ్న నాడి . గంగ యమునల నడుమ పవిత్రమైన సరస్వతి నది ఉన్నట్లే ఇడా పింగళ నాడుల మధ్యన గల బ్రహ్మ రంధ్రమును కనుమా !అనగా పరమాత్మ స్థానమును కనుగొనుమని అర్ధము.  పర , పశ్యంతి, మధ్యమ, వైఖరి  అను 4 పదాలు పరబ్రహ్మ తత్త్వ విచారణలో వాడు పదములు. విత్త నము మొలకెత్తుటకు సిద్ధముగా నుండుట (పర ) మొలక కనబడుట (పశ్యంతి) ఎదిగి వృక్షమగుట  (మధ్యమ) పూలు కాయల నిచ్చుట (వైఖరి.) ఈవిధమైన మనసుతో ప్రణవము చక్కగా ప్రకాశిస్తూ వెలుగుతుంది . 
 13. కంటి మింటి ఏక సూత్రమైనావు , కంటి పాపాల నడుమ నంటి ఉన్నావు 
       అంటి అంటి నీ జీవములందు కొన్నావు , రెంటి జంటనే నడుమనే అంటి ఉన్నావు . 
భావము : నీ కంటికి ఆకాశానికి ఒకే సూత్రముగా ఉన్నావు. కంటి పాపాల మధ్యన అంటి ఉండి ప్రాణం పోసుకొన్నావు . (పూర్వ జన్మ, ఈ జన్మల నడుమ అంటి ఉన్నావు. )

 14. సజ్జనుల సంగతికి సాధువైనావు , దుర్జనులు సంగతికి దూరమైనావు 
      రణ విశ్వ కర్మాన ప్రణవమైనావు . గండు తుమ్మెద వోలె ఘనుడవైనావు . 

భావము : నీవు సజ్జనుల స్నేహముతో సాధువై , దుర్జనులకు దూరమై, బ్రహ్మ (విశ్వ కర్మ ) కార్యములలో ప్రణవమై గండు తుమ్మెదవై ఆనందంగా మధువును జుఱ్ఱు కొనుచు ఘనుడవైనావు. 





  

సామెతలు జీవిత సత్యాలు .

సామెతలు జీవిత సత్యాలు . 






లక్ష్మీదేవి వచ్చేటప్పుడు తాబేలు లాగా,  పోయే టప్పుడు కుందేలు లాగా ఉంటుంది. ఇది  ఒక సామెత. 
  నాకు  ఒకనాడు ఆర్ధికంగా బాగా యిబ్బంది కలిగి మా బంధువు దగ్గరకు వెళ్లి కొద్ది కాలములోనే తిరిగి  వడ్డీ తో సహా చెల్లించే షరతు మీద ఋణము అడిగాను.  ఆ  సందర్భంలో ఆయన డబ్బుకు బదులుగా  ఈ సామెత చెప్పాడు .    అది నాకు స్వానుభవంలోకి వస్తున్నకొలది ఆయన నాకు జ్ఞప్తికి వస్తున్నాడు. అవును లక్ష్మీదేవి చంచలమైనదే . కానీ నా అనుమానం  ఆమె రాక పోకలలో ఎందుకు వ్యత్యాసం ఉండాలి? అని. నాకు కలిగిన భావన ఏమనగా ... ఆమె వస్తుందనే విషయములో మన ఎదురు చూపులు  చాలా ఎక్కువగా ఉంటాయి.  త్వరగా రావాలని పరవళ్లు త్రొక్కుతుంది మనసు. నిరాశ లో ఆమె రాక చాల నిదానంగా ఉన్నట్లు భావిస్తాము.( రాబడి విషయములో కూడా  మనకు చిన్న చిన్న మొత్తాలుగా  మాత్రమే ధనమ్ వస్తుంది ) అందుకని ఆమె రాక తాబేలు లాగా ఉంటుంది   సహజముగా ఎదురు చూపులు లేకుంటే మనసు ప్రశాంతముగా ఉండి   ఎపుడు వచ్చినా  యిబ్బంది లేదులే అని పట్టించుకోము . ఇక ఆమె వెళ్ళేటప్పుడు అనగా మనము ఖర్చు చేసే విషయం లో పెద్ద మొత్తం ఒకేసారి ఖర్చు పెడతాము . అందువలన మన దగ్గరనుండి ఎక్కువ మొత్తము బయటకు వెళుతుంది. మరి వేగముగా వెళ్ళినట్లే కదా .  
      ఇక డబ్బు విషయములోనే కాక వనితా, పుస్తకాలను పరులకు యిచ్చే విషయములో  ఒక మహాకవి  చెప్పిన శ్లోకం ఒకటి గుర్తుకు వస్తున్నది. 
   శ్లో . పుస్తకం వనితా విత్తం పర హస్తం గతం గతః 
        పునరాయాతం చ జీర్ణం, భ్రష్టా చ ఖణ్డశః   .... అని వచించారు. 
భావం. పుస్తకము, వనిత, ధనమును పరులకు , కొంతకాలము ఉపయోగము కొరకు యిస్తే ఆ మూడు వస్తువులు యథా తథముగా తిరిగి రావట. ఒకవేళ వస్తే పుస్తకము జీర్ణమై, వనిత భ్రష్టమై, విత్తము  ముక్కలు ముక్కలుగా వస్తాయట. ఇది కూడా నాకు అనుభవమే అయినది. దానిని పంచుకుందాం. 

 నేను  పీ, ఓ ,యల్( ప్రొఫెషనల్ ఆఫ్  ఓరియంటల్ లెర్ నింగ్ )(విషయము సంస్కృతము, వ్రాత ఆంగ్లము)   పరీక్షకు హాజరు కావలసిన రోజులలో(1973) ప్రశ్నలు సమాధానాలు ఉన్న కాపీలు  రెండు నాదగ్గర ఉన్నాయి . ఒక కాపీని ఒక సుప్రసిద్ధ పండితునకు యిచ్చి అయ్యా దయచేసి దీనిలోని తప్పులను సరిచేసి ఇవ్వండి అని ప్రార్ధించాను. వారు సరేనని దానిని తీసికొని నేను కాళ్ళు అరిగేటట్లు ఎన్నిసారులు తిరిగిన మరల నాకు తిరిగి యివ్వలేదు. వారి సన్నిహితుల ద్వారా నాకు తెలిసిన సమాచారం ఏమిటంటే నా పుస్తకం ఆ పండితుల వారు తమ ప్రియురాలికి ఇచ్చారట.  నాలో సహనం నశించి ఆ మహా పండితునకు  పై శ్లోకం చదివి వినిపించి ,, ఈ శ్లోకమును ఆ కవి మీ బోటి వారి అనుభవం తినే చెప్పి ఉంటారు అని నిర్మొగమాటంగా చెప్పాను.  పుస్తకము విషయములో యిది నా పట్ల గతం గతః  అయినది. చివరకు ఆ కాపీ లేకపోయినా నేను ద్వితీయ శ్రేణిలో కృతార్ధుడనైనాను దైవానుగ్రహం వలన . 

షష్టి పూర్తులు , సహస్ర చంద్ర దర్శనశాంతి హోమాలు అవసరమా? ఆడంబరాలా ?

షష్టి పూర్తులు , సహస్ర చంద్రదర్శన శాంతిహోమాలు అవసరాలా ? ఆడంబరాలా ? 

   ప్రపంచ దేశాలు మన దేశానికి మోకరిల్లేది మన ఆర్ధిక సంపదను చూచి కాదు , ఆధ్యాత్మిక సంపద చూచే . అది మనకు వేద ప్రమాణమైనది. అనంతమైనది. మానవుని ఆనంద  జీవనమునకు రెండు మార్గములున్నవి.             1. సంసార రహితుడై ముని వృత్తి తో మోక్షమును వెదకుట.(ఇది అలౌకికా నందము ) 2. సంసారాపేక్షతో కన్యను వెదకి పాణిగ్రహణము చేసికొని సత్సంతానముతో ఆరారోగ్యభోగ భాగ్యములతోబాటు కష్టనష్టములను అనారోగ్యముల ననుభవించుచు పరమాత్ముని తలచుకొను జీవనము. (ఇదిలౌకికానందము) మనము ఆరోగ్య భోగభాగ్యాలతో నుండవలెనన్న తప్పక దైవబలము మనకు కావలసినదే. టానిక్కులు త్రాగి , వ్యాయామాలు చేస్తే సరిపోయేదానికి ఆ కనపడని దేవుని తో పనే ముంది ? అని అడిగే వారికి  నా శతకోటి నమస్సులు. ఈ చర్చ ప్రస్తుతమప్రస్తుతము. 
     కొందఱు మన సంప్రదాయాలను తక్కువగా చూచి హేళన చేస్తూ షష్టి పూర్తి, సహస్ర చంద్రదర్శన శాంతి హోమము మొదలగు క్రతువులు ఆడంబరమనే అనవచ్చును. కానీ నమ్మిన వారికి  నమ్మినంత మహాదేవ. వాని వలన తప్పక ప్రయోజనము కలదని నా విశ్వాసము . శాస్త్ర వచనము . మనిషి పుట్టినదాది మరణము వరకు తెలిసో , తెలియకో పాపపుణ్యములు చేస్తాడు . పుణ్య ఫలముగా సుఖములు , పాపఫలముగా కష్టముల ననుభవిస్తాడు . పుట్టిన సంవత్సరము  నుండి మరల అదే  సంవత్సరము వరకు 59 యేండ్లు నిండి 60 కి వస్తాడు . అప్పటికి జీవితాన  ఒక ఆవృత్తి పూర్తి  అవుతుంది.  దీనినే  ఉగ్రరథ శాంతి , లేక షష్టి పూర్తి  మహోత్సవమంటారు.  ఈ సమయంలోనే భగవంతునకు కృతఙ్ఞతలు చెప్పి మన పాపముల పరిహారము కొరకు చేసికొను విన్నపములే ఈ శాంతిహోమములు . క్రతువులు. ఈ క్రతువులే చేయనవసరం లేదు. ఏ అనాథ  శరణాలయాలకో , పేదవారిదగ్గర కో  కూడా వెళ్లి వారికి తగిన సహాయమందించినా  పాప పరిహారమే అవుతుంది. కాకుంటే బంధువర్గమంతా కలసియుండుటకు ఇదొక మార్గము.
    ఏకాదశ రుద్రులందరికి తెలిసిన వారే. వీరుకాక రుద్రులు శతాధికముగా ఉన్నారు. రుద్రుడు లయకారుడు. మన పాపములను లయము చేయుమని రుద్రుని కోరుతూ కార్తిక మాసములో ఏకాదశ రుద్రాభిషేకం కూడా చేస్తాము.  రుద్రులలో కొందరు శాంత, మరి కొందఱు ఉగ్ర స్వభావాలతో ఉందురట. అట్టి వాడే ఉగ్రరథుడను రుద్రుడు. 60. ఏండ్లు నిండిన వారికి ప్రాణాపాయమో , అనారోగ్యమో కలిగించునట .దానికి పరిహారము గా  ఉగ్రరథ  శాంతి అవసరము. అట్లే 70. యేండ్లు నిండిన వారికి భీమరథ శాంతి , 78 ఏండ్లకు విజయరథ శాంతి , 83.యేండ్ల 4 నెలలకు .( 1000  పూర్ణిమలు ) సహస్ర చంద్ర దర్శనమహోత్సవము, 100 సంవత్సరములు నిండిన వారికి పూర్ణ శతాభిషేకము చేయించుకోవాలి. ఈ క్రతువులను కేవలము సంతామే చేయవలసిన అవసరము లేదని, స్వయముగా ఆ దంపతులే చేసికొన వచ్చునని విజ్ఞులు తెలియజేసారు. 
    మానవుడు  దైనందిన కార్యక్రమములలో మునిగి ఆలోచనలో ఉండి ఆచరించలేక పోయిన , దాన ధర్మాది కార్యములు , క్రతువులు ఈ సమయము లో బంధువుల ఆప్యాయతాను రాగముల మధ్యన చేసికొనిన పెద్దల , వేద విదుల, పండితుల దీవనలు లభించి ఆ దంపతులకు మెరుగైన ఆయురారోగ్యములు , భోగ భాగ్యములు చేకూరును. ఆధ్యాత్మిక భావనలు పెరిగి దైవకృప అధికమగును.  చరమాంకమున ఏ ప్రాణికైనను కావలసినది అదేకదా . 
      శరీరమాద్యం ఖలు ధర్మ సాధనం ... అనగా శరీరమే అన్ని ధర్మ కార్యముల సాధనకు మూలమైనది . దానిని కాపాడుకొనుటకు జాగ్రత్తగా ఔషధ సేవ చేస్తూ తగిన వ్యాయామములు చేయవచ్చు ననుకొనిన, అవి మానవ ప్రయత్నాలే . ప్రతి మానవ ప్రయత్నానికి తప్పక దైవ సంకల్పం కావాలి. దైవిక కార్యక్రమములన్ని ఒక మహోన్నత లక్ష్యముతో ఏర్పాటు చేసినవే నిస్సందేహముగా. 
   ది . 27.12 2018. న నాకత్యంత ప్రియతమాగ్రజుడు , సాహితీప్రియుడు అయిన శ్రీయుతులు పొన్నెకంటి భవానీపతి రావు గారి సహస్ర చంద్ర దర్శన శాంతి హోమమునకు వెళ్ళుట జరిగినది . 84 యేండ్ల వయసులో కూడ ఏంతో  ఓపిక , సహనము, భక్తి భావనాపూరితమైన చిరునవ్వుతో అపర భవానీపతి లాగానే కనిపించాడు. ఇక మా వదిన గారు హనుమాయమ్మగారు. అపర సాహితీమూర్తి , అవ్యాజ ప్రేమమయి, బంధుప్రీతి కల యిల్లాలు. వారి అన్యోన్య జీవన విధానము ఆదర్శప్రాయము. ఆమె పలకరింపులోనే ప్రేమానురాగాలు  తొంగిచూస్తాయి . వారి ప్రథమ పుత్రుడే చిరంజీవి శివ ప్రసాద్. ఆతని సదాలోచనను ఆతని భార్య ,  సోదర సోదరీమణులు, కుటుంబ సభ్యులందరు కలసి ఆమోదించి  సహస్ర రజత కమలములతో వారికి పాద పూజ( రజతములే కాక మామూలు వానితో చేసినను ) చేయుట ఆ దంపతుల పూర్వజన్మ సుకృత ఫలమో, తలిదండ్రులు  శతాధిక వసంతాలు ఆయురారోగ్యాలతో నుండి తమకు వెన్నుదన్నుగా నుండవలెనని సదాశయమో , ఆస్తుల కొరకు కన్న తల్లిదండ్రులనే  కసాయిగా  కడతేర్చు ద్విపాద పశువులకు  కొంత ఆదర్శము గా నుండు కొరకో , తలిదండ్రులపై అవ్యాజ ప్రేమానులాగాలో నిర్ణయించుట కష్టమే. ఏది ఏమైనను భవానీ పతి రావు అన్నయ్య , వదిన గారి వలన సంతానము , సంతానము వలన వారు  ఎంతో అభినందనీయులు. సదాశయము, సత్కార్యాచరణ, భక్తి భావనలు, దానధర్మములొనర్చుట, ధార్మిక జీవనము, సాంఘిక బాధ్యతలు మానవుని మహోన్నతుని చేస్తాయనుటలో సందేహములేదు . మానవ జన్మ సార్ధకతకు ఇంతకన్నా కావలసిన దేముంది?  . ఈ కార్యక్రమ చిత్రములు పైన కలవు  , వీడియోలను తదుపరి  పొందుపరచగలను . శుభం భూయాత్ .         

       

      

నాన్నా నీమాటే నాబాట.!

నన్ను ప్రభావితము చేసిన మా నాన్నగారి అనుభవపూర్వక అమూల్యామృత వాక్కులు.
1. సమయపాలన.....ఇది చేయకుంటే మనిషిలో క్రమశిక్షణ లోపిస్తుంది. ఆ లోపం చేస్తున్న పనుల మీద చేయబోయే పనుల మీద పడుతుంది. వ్యక్తి గత విలువ ఉండదు. కనుక ఎట్టి పరిస్థితుల్లోనూ తప్పరాదని చెప్పారు.
2. పెద్దలను గౌరవించుట. .... దీనివలన సాటివారిలో సాటిలేని గౌరవం పెరుగుతుంది. పెద్దల ఆశీస్సులు లభిస్తాయి. తద్ద్వారా మనకసాధ్యమైన పనులు నెరవేరతాయి.
3. నిజం చెప్పటం....ఇది అత్యంత కఠినమైన నియమం. చివరకు ధర్మరాజుకు కూడ అపప్రధ తెప్పించినది కూడా ఇదేకదా. అందరు ఇదే చెబుతారు. కాని పాటించేవారు? గో రక్షణ, స్త్రీ పురుష మాన ప్రాణ రక్షణలందు బొంక వచ్చునని మహర్షులు పలికారు. ఆవిషయంలో నాన్నగారిని అనుసరిస్తాను.                 4. నిశిత పరిశీలన..... ఏవిషయమునైనా పరికించి చూడటం కాకుండా పరిశీలించి చూడటం. ఇదే ఎక్కువగా విజ్ఞానాన్ని సంపాదించిపెడుతుందని , బుద్ధి పెరుగుతుందని చెప్పేవారు.పరిశీలనలో ఎదుటివారి మనోభావాలను కూడ తెలిసికొనవచ్చును. ఇదే ఆంగ్లేయులు చెప్పే "ఫేస్ రీడింగ్". ఆయన ఒకనాటి అనుభవాన్ని కూడ(ఒక మోసకారిని పసిగట్టిన విషయం) నాతో పంచుకున్నారు.
5.చిరునవ్వు....... ఏదైన ప్రత్యేక మైన బాధలో ఉంటే తప్ప ఏనాడు ముఖంలో చిరునవ్వు చెరగనీయవద్దు. అందరు అలా ఉండేలా ప్రయత్నం చెయ్యి.
చిరునవ్వు అందరిని ఆకర్షిస్తుంది. అలరిస్తుంది. బంధువులను, స్నేహితులను
చిరు నవ్వుతో పలకరింతమని చెప్పేవారు.
6. ఎదుటివారి మనసు గాయపడకుండ మాట్లాడుట......
     ఇది చాలా అవసరమైనది. నిత్యజీవితంలో ప్రతిక్షణం ఎదుర్కోవలసిన సమస్య. ఆనందంగా మనం ఉంటూ ఎదుటివారు కూడ అలా ఉండేటట్లుగా చూడటం. ఇది మన ఆయువును పెంచుతుంది.
7. అతి సర్వత్ర కూడదు... ఏవిషయంలోనైన అతిగా ప్రవర్తించే వారిని నమ్మరాదని చెప్పేవారు. ప్రేమైనా, ద్వేషమైనా అతి పనికిరాదు.
8. నలుగురితో మంచి..... అందరితోను ఎల్లవేళల మంచిగానే ఉండాలి. మరీ అది అసాధ్యమైతే కనీసం నలుగురితోనైనా మంచిగా ఉండాలి. చివరి మజిలీకి వారే అవసరమౌతారు.
9. నమ్మకం....   క్రొత్తవారిపట్ల నమ్మకం నిశిత పరిశీలనతోనే ఉండాలి. గ్రుడ్డి నమ్మకం పనికిరాదు. స్వభావాన్ని అంతో ఇంతో అంచనా వేసి దానిని బట్టి నమ్మాలి. మెరిసేదంతా బంగారం కాదనేవారు.

        మా నాన్నగారు(సూర్యనారాయణ) నాకు చెప్పగా వాటినే నేను నీకు చెబుతున్నాను.అన్నారు. నేను కూడ ఆ నవ రత్నాలనే అక్షరం తేడా లేకుండా నా కుమారునకు చెబుతున్నాను. నేను వాటిని తు.చ. తప్పక పాటిస్తున్నాను.

     తాతగారికి, నాన్నగారికి కృతజ్ఞతాంజలులు.

సాహితీ స్రష్ట "సుచంద్ర"

సాహిత్యం అంటేనే హిత సహితం అని అర్థం. హితం ఎవరికి అని ప్రశ్న వేస్తే ..సర్వ జనాళికని చెప్పాలి. సాహిత్య ఆలోచనా లోచనం కలవారు ఒక్కొకరు ఒక్కొక రచనా పద్ధతిని అనుసరిస్తారు. ఛందోబద్ధ పద్య నిర్మాణం, స్వచ్ఛ, స్వేచ్ఛ ,  విశాల భావ వ్యక్తీకరణకనుకూలంగా ఉండే లలిత లలిత భావ నిర్భర పద జాలంతో మనోహర భావనా సాహితీ సామ్రాజ్యము నేర్పరచుకొని తద్ద్వారా రసిక జనులనాకర్షిస్తు, కవిలోక తల్లజునిగా పేరుగాంచుట ఒక వరం. అట్టి భగవద్దత్త వర ప్రసాది కీ.శే.(నమ్మ శక్యం కావటం లేదు.) "సుచంద్ర". సుసర్ల చంద్రశేఖర శాస్త్రి.(వచనమైతే భావ ప్రకటనకు ఎక్కువగా స్వేచ్ఛ ఉంటుంది అని వారు భావించేవారు.)వీరు ఖమ్మం జిల్లా కవులు, మొదలగు గ్రంథాలు, శతాధిక కవితలు, మనోహర వ్యాస విన్యాసాలు ప్రచురించిన కవిచంద్ర "సుచంద్ర".కవితామృతం, సేవించటం, సేవింపజేయటం అలవాటైతే చెప్పేదేముంది? ఆలోకమే వేరు. వేరొకరు తట్టి లేపాల్సిందే.అక్షరం ఉన్నంత కాలం అక్షరాలలో దాగి ఆయన ఉంటారు. కవికి, కవితకి మరణం లేదు.

           ఈయనకున్న లక్షణం తాను భావనా ప్రపంచంలో తేలటమే కాక కవితను, కవులను ప్రోత్సహించి, తనకు కావలసిన విషయాన్ని రాబట్టుకోవడంలో దిట్ట.

          నేను ధూళిపూడి లో పనిచేస్తున్న రోజులలో రక్తసంబంధీకమైన కుటుంబంగా మారింది "సుసర్ణ" వారి కుటుంబం. వారికి గ్రామదేవత తాళ్లమ్మ ఆరాధ్య దేవత, పర దేవత. నేను పాఠశాలలో కొలువు నుండి విరమించబోయే ముందే ఒక నిర్ణయం తీసికొన్నాను. అదే "ధూళిపూడి పూర్వా పర్వాలు.

              నన్ను "సుసర్ల" సోదరులందరు ఆప్యాయతానురాగాలతో, సొంత బావగారి వలెనే ఆదరించి గౌరవిస్తారు, వయోభేదం లేకుండా. ఒక రోజు "సుచంద్ర" గారి నుండి ఒక కోరిక. "బావగారు! నాకు మన గ్రామదేవత తాళ్లమ్మ ను స్తుతిస్తు శతకం కావాలి"అని. దానిని సుగ్రీవాజ్ఞగా భావించి 25 రోజులలో 108 పద్యాలు వ్రాసి చూపించాను. బావగారి కళ్లలో నేను ఆనాడు చూచిన ఆనందానికి అవధులు లేవు. "శహభాష్ బావగారు"అన్న పదం దశ దిశల ప్రతిధ్వనించింది. ఆనాటి నుండి కలిసినప్పుడెల్ల "బావగారు! ఏమైనా వ్రాస్తున్నారా? అనేదే ప్రథమ ప్రశ్న అయింది. ఆ ప్రోత్సాహం నాకొక మహత్తర శక్తిని, భావనా పటిమను ఇచ్చేది. ఏది యేమైనా బావగారు అని అనగనే .....తరువాత పదమైన ఏమైనా వ్రాస్తున్నారా? అని ఆయన అనక పోయినా నాకలా వినిపించేది. దాని ఫలితమే  "వాల్మీకి రామాయణము"నకు నా(తెలుగు సేత అయిన) "సూర్య శ్రీరామ"మేమో!!!

   2016 జూన్ లో జరిగిన ధూళిపూడి శతవసంత శోభలో పాల్గొని పూర్వ విద్యార్థిగా, అపూర్వ భావనిర్భర కవిగా ,విజృంభించారు, ఆరోగ్యం సహకరించకపోయినా.

       ఈ సాహితీ సింధువును  ఇంకా యెంతో తరచ వచ్చు. కాని ఒకే సారి నా వలన కావటం లేదు.
        అశ్రుతర్పణాలతో....అంజలులు సమర్పిస్తు......

ఆంద్ర భాషామ తల్లికి కట్టాలి రక్షా బంధనం . 29.08.2015

 ఆంద్ర భాషామ తల్లికి కట్టాలి రక్షా బంధనం . 29.08.2015
కీ. శే . గిడుగు రామమూర్తి పంతులుగారి జయంతి సందర్భముగ
  శ్రావణ పున్నమికే  రక్షా బంధనం చేసుకోవటం ఒక సంప్రదాయం గ వస్తున్నది .సొదరీ సోదరులు పరస్పరం రక్షణ కోరుతూ  చేతికి కట్టే సూత్రమే ,యిది. ప్రేమ మనిషిని మనీషిగా చేస్తుంది . దానిని పెంచి, పంచాలి. అలాగే మాతృ భాషామతల్లికి కూడా మనమందరం  రక్షా బంధన చేయవలసిన దుస్తితి వచ్చింది . ఋణం తీర్చుకోవాలంటే కట్టక తప్పదు. అంటే ఏదో అద్భుతం చేయనవసరం లేదు . వీలైనంత తెలుగులో మాట్లాడితే చాలు  సంతోషిస్తుంది మన ఆంద్ర మాత.
      తెలుగు మాటలు నాలుగు పలుకు గలను
      తెలుగు స్వారస్య మెంతైనా తెలుప గలను
      తెలుగు తనమును భావాల నిలుప గలను
      తెలుగు  కవి వారసుండనై వెలుగ గలను.
      అమ్మ నీపాద పద్మంబు నహరహంబు
      కొలుచు చున్దును సదమల కూర్మి తోడ
      ఆంద్ర భాషామ తల్లికి హారతిచ్చి ,  
     రక్ష బంధన గూర్తును రమ్య గరిమ .    అని అంటీ చాలు మన భాషామతల్లి పొంగి పొతున్ది.
     

అమ్మ పిలిచింది భయం లేదు రారా యని. 23.08.2015.

                         అమ్మ పిలిచింది భయం లేదు రారా యని.

                           23.08.2015.

నేనే స్వయముగా కారు నడుపుకొంటూ వెళ్లి బెంగుళూరు లోని వైష్ణవీ మాతని దర్శించుకోవాలని నాకు ఉబలాటం . వెళ్ల లేనేమో నని భయం. నిత్యం భయానికి, ధైర్యానికి మధ్య .పోరాటం జరుగుతూనే ఉంటుంది .ఏది ఎక్కువ శాతం ఉంటే అదే జరుగుతున్ది. మన భయమేమిటంటే , అపజయం పొందుతామేమో అని ..అపజయము, విజయము అమ్మ స్తన్యం త్రాగే టప్పటి నుండే మొదలు. అమ్మ ఆశీస్సులే విజయానికి మూలమ్.అపజాలే విజయాలకు సోపానాలు . అందుకే ధైర్యే సాహసే లక్ష్మీ అన్నారు పెద్దలు. అమ్మ వైష్ణవి ని కొంచెం ధైర్యం ప్రసాదించమని అడిగాను, ఆమెని దర్శిం చుకోవటాని కే. ధైర్యం యిచ్చింది అమ్మని దర్శించి క్షేమం గా వచ్చాను.

                ధైర్య మన్నది సతతంబు కార్య విజయ ,
                హేతు వగునోయి మిత్రమ సేతు లంఘ
                నంబు నవలీల గావించె హనుమ నాడు .
                పిరికి తనమును మదినుండి పెరుక వలయు .

అబ్దుల్ కలామ్.

                                               అనన్వయ అబ్దుల్ కలామ్.
అనన్వయము నూరు అలంకారములలో నొకటి. అన్వయము  అంటే సాదృశ్యము, పోలిక, ఒక వ్యక్తి గాని, వస్తువు గాని , వేరొక దానిలా ఉంటే ఆ యిద్దరు వ్యక్తులనో, వస్తువులనో పోల్చవచ్చు . ఆ మనీషిని గురించి పోలిక చెప్పాలంటే ఎక్కడా దొరకక పొతే వారిని అనన్వయ వ్యక్తులుగా చెప్పవచ్చు. సాగరం ఎలా ఉంటుందని ఎవరైనా అడిగితే  ఇలానే సమాధానం చెబుతారు. అందుకే సాహితీ వేత్తలు, సాగరః సాగరోపమా  అన్నారు రామ  రావణ యోర్యుద్ధం రామ రావణ వత్. అటువంటి పోలిక లేనందు వలన అలా అన్నారు.
            ఆ కోవకు చెందిన ఒక మహోన్నత వ్యక్తి , జాతి రత్నం రాలిపోయింది భారతావనినే కాక సర్వ ప్రపంచాన్ని కన్నీటి లో ముంచి. అనిర్వచనీయ ప్రతిభాశాలి , సుగుణ శీలి , సమున్నత మానవీయ సత్కార్యాచరణ సుమములను , యువకుల హృదయ మధు వనంలో పూయించు తోట మాలి. నింగి దురాన్ని చెరిపి, మనం శాస్త్ర విజ్ఞానం తో దానిని సులువుగా తొంగి చూడవచ్చునని నిరూపించిన సాంకేతిక శాస్త్ర విజ్ఞాని , కీర్తి శేషులు అబ్దుల్ కలాం  గారు.
            ఆలోచన, ఆచరణ , ఆత్మీయత, ఆరాధనా భావం, అంకిత భావం, అందరిని అలరించే అమృత హృదయం , సేవాతత్వం, బంధు ప్రీతి , మా తృ ప్రేమ , భ్రా  తృ ప్రేమ , చిరు నవ్వు చెరగని మోము , పని చేయుటలో ఆనందాన్ని అనుభవించటం , యెంత ఎదిగిన ఒదిగి ఉండటం , ధనార్జన పట్ల నిరాదరణ , విజ్ఞాన ధనార్జన పట్ల మిక్కిలి ఆసక్తి, ఇటువంటి కోట్ల గుణములు రాసి పోస్తే ఒక అబ్దుల్ కలామ్.
   

పదవులకు మనిషి వలన గౌరవం రావటం , తేవటం కొందరి వలననే జరుగుతుంది . రాష్ట్ర పతి పదవికి అందాన్ని , హుందా తనాన్ని , తెచ్చిన మహనీయులలో అబ్దుల్ కలాం ఒకరు .
         సమాజంలో ఏ క్రొత్త మార్పు రావాలన్నా , అది తప్పక బాలలనుంది, యువకుల నుండి వస్తుందని నమ్మి వారిని నిరంతరం , తన మృదు మధుర భావ గంగా జాలం తో తడిపి వారి మనసులను , ఆలోచనలను , పరమ పవిత్రం జేసి ఆచరణ వైపు అడుగులు వేయించిన స్పూర్తి దాత అబ్దుల్ కలామ్.

        సాగర తీరం లో జన్మించి    విద్యా విజ్ఞాన సాగరం మధించి, అందు అమృతాన్ని సాధించి , దానిలో రామ ఈశ్వర తత్వాన్ని రంగరించి, రస రమ్యం చేసి , ఆ అమృతాన్ని సర్వ ప్రపంచానికి పంచి న మోహనాకారుడు కలాం ;దైవం ఎక్కడో లేడని, పసి హృదయాలలో , వారి బోసి నవ్వులలో , ఉన్నాడని నమ్మిన మానవతావాది , మా  నవతా వాది, కలాం . హిందూ మతమైన , మహమ్మదీయ మతమైన , మరే మతమైన , సర్వ జన సమ్మత మైనదే మతమని నమ్మి మానవ శ్రేయస్సుకు  మకుటాయమానం గా నిల్చిన మానవతావాది కలాం. తన దేశం ఆధ్యాత్మికం గానే కాకుండా , వైజ్ఞానికంగా కుడా , హిమోన్నత శిఖరాలను , దేశాంతరాలను దాటాలని , కలలు కని, ఆ కలలను సాకారం చేసి , పృథ్వి , అగ్ని, వంటి క్షిపణుల ద్వారా , నిరూపించిన స్రష్ట కలామ్.
        మనం కలలు కనటం గురించి చెబుతూ  ఒక ఉన్నత లక్ష్యాన్ని కలగా కని, దానిని  నిజం చేసుకోవటానికి , అహోరాత్రులు కృషి చేయుమని, కలలు కల్లలు కాకుండా ,నిజాలు కావాలనే తపస్సు , చేయుమని తపన బడ్డాడు కలాం . త్యాగానికి మరో రూపు ఆయన . ఇన్ని సుగుణాల కలబోత , కలనేత, కలల నేత , మన డాక్టర్ అబ్దుల్ కలాం గారు కాక మరెవరు ఉంటారు చెప్పన్ది. మనం వారి ఆశయాలకు రూపు దిద్దుదాం .
    కలలు కనుమన్న మాన్యుండు ఘను డె వండు
     నింగి దూరియు కనిపించు భ్రుంగి ఎవడు
    భారత రత్నంబు నాబడు భవ్యు డె వడు
    అతడె అబ్దుల్ కలాము విఖ్యాత యశుడు.  

    జలధి మించిన విజ్ఞాన శాస్త్రమున్న

       వినయము చిరునవ్వు వెలయు వేత్తయగుచు

        బాలబాలుర హృదయాల పరమగురువు

       ఆకలామును మించిన యమరుడెవడు?

కృషితో నాస్తి.

కృషితో నాస్తి దుర్భిక్షం, జపతో నాస్తి పాతకం.   నిరంతరం కృషి చేసే వారికి ఏనాడు దరిద్రము ఉండదు. తపో ధనులకు పాపముండదు.
                 కృషి అనే పదానికి , వ్యవ సాయము,  పని , ప్రయత్నం  అని అర్ధాలు న్నవి . వ్యవ సాయం చేసే , వ్యవసాయ దారునకు , నెల్లపుడు ఏదో ఒక పని ఉంటుంది .దాని వలన అతనికి ప్రత్యక్షం గానో, పరోక్షం గానో ఆదాయం ఉంటుంది .ఆదాయం ఉన్నప్పుడు దరిద్రానికి తావులేదు . అలానే తపస్సు చేసే తాపసికి పాపముండదు .                నిరంతరం కృషి చేయటం వలన ( ఏపని లో మనకు నైపుణ్యం కావాలో దానిని ) ఆ పనిలో ప్రత్యక నైపుణ్యం వస్తుంది . దీనినే ఆంగ్లం లో  వర్క్ యక్స్పీరియన్స్ అంటారు . పని అనుభవం  లేకుంటే , ప్రతి పని లోను మనం రాణించ లేము . మన మనసు చాల విచిత్రమైనది. పాపం దానిని ఎలా అలవాటు చేస్తే అలా పని చేస్తుంది .ఈ సమయానికే మనం అన్నం తినాలని నిర్ణ యించుకొంటే , మన మనసు ఆ సమయానికే ఆకలి కలిగించేటట్లు ఆజ్ఞలు జారి చేస్తుంది . . అలానే ఒక వాహనం నడపాలంటే దానిని ప్రతి రోజు ఉపయోగించి తీరాల్సిన్దె. కన్నులు , చేతులు , కాళ్ళు , అప్రయత్నంగా వాటి పని అవి నైపుణ్యంగా చేసికోనేవరకు వదలకూడదు .
                                                        పని .పొరపాట్లు
             పని చేస్తేనే మనం ఏ పోరపాటు చేశామో , ఎక్కడ చేసామో తెలుస్తున్ది.  పని చేయక పొతే మనకు పొరపాటు ఏమిటో తెలియదు. అయితే తెలివి గల వాళ్ళు చేయవలసిన పని ఏమిటంటే , చేసిన పొరపాటే మరల చేయ కుండుట అంటే క్రొత్తవి చేయమని కాదు. తినగా తినగా వేము తియ్యనుండు . అనగా యెంత కష్టమైన పని అయినా సులువు అవుతుంది  ఏపని అయిన సాధనము చేతనే సులభ సాధ్యమౌతుంది . ఇది నిత్య సత్యమ్.
         

త్రాగి త్రాగించాలి.

  త్రాగి త్రాగించాలి . పలికి పలికించాలి .( సూర్య శ్రీరామమ్ )

 'పిబరే రామ రసమ్:"   అన్నారు సదాశివ బ్రహ్మేంద్ర స్వామి  వారు .వాల్మీకి మహర్షి సంస్కృతంలో రామాయణం వ్రాసి దానిని అమృత కలశం గా చేసి అపురూపంగా అందరికి అందకుండా చేశారు.ఆ అమృతం ఆస్వాదిమ్చాలంటే సంస్కృత పాండిత్యం కావాలి మరి ఆ భాష రాని వారి స్థితి ఏమిటి . అమృతం వారికి అవసరం లేదా . దీనికి సమాధానంగా ఎందరో మహానుభావులు తెలుగులో పద్య, గద్య, చంపు , కీర్తన , అను అనేక రీతులలో మకరందాన్ని వారనుభవించి సామాన్యులకును అనుభవింప జేశారు . అమృతం ఎవరు  త్రాగితే ఆ రుచి వారికే తెలుస్తుంది . అందుకే నేను ముందు త్రాగి , నా శిష్యులచే , సాహితీ మిత్రులచే , హితులచే , సన్నిహితులచే  రామామృతం త్రాగిమ్చాలని , ఆశించాను . అమృత భాండమును వంచి కొన్ని బిందువులను త్రాగి , జీర్ణించుకొని , తెలుగు పలుకులలో , కొంత తేట పరచి , పంచి , ఆనందించాలనే నా తపన . తిక్కన గారు  " మధుర పదార్ధాన్ని , ఒంటరిగా తినరాదు, త్రాగరాదు. అడవులలో ఒంటరిగా నడువరాడు " అని చెప్పారు . అందుకే నేను మహర్షి పదములను , పాదములను  ఆశ్రయించి , అనుకరించి , అనుసరించి , నా జన్మ ధన్యమగునట్లు చేసుకొంటున్నాను . అందుకు కరదీపికలుగా  , మాన్యులు , డా, యం. కృష్ణమాచార్యులు గారు, డా. గోలి వెంకట రామయ్య గారు వ్రాసిన అనువాద గ్రంధము ఉన్నది  . వారికి నా కృతఙ్ఞతలు . వారి ఆశీస్సులతో కొన్ని తెలుగు పలుకులు పలికి , మాతృభాషాభిమానాన్ని చాటుకుందామని అనుకొంటున్నాను .  " బాణోచ్చిస్టం  జగత్ సర్వమ్ " అన్నారు పెద్దలు . ఈ రామ రసాన్ని (క్లాసులలో ) గ్లాసులలో పోసి అందరికి అందించాలని నా కోరిక.
   తొలి తెలుగు తొక్కు పలుకులను నాచే ముందుగ పలికించిన నా తలిదండ్రులకు  ఈ గ్రంధమును అంకితము చేయుచున్నాను . తరువాత నా పలుకులను సాహితీ ములుకులుగా ,, తీర్చి దిద్దిన ప్రతి ఒక్క గురుదేవునకు సాష్టాంగనమస్కారములు చేయుచున్నాను .
                        బుధజన విధేయుడు . పొన్నెకంటి .

గురు పూజోత్సవము సందర్భముగా 5.09.2014.

 (గురు పూజోత్సవము సందర్భముగా


శ్లో.  గురుర్ బ్రహ్మ , గురుర్ విష్ణుః , గురుదేవో మహేశ్వరః
       గురుస్సక్షాత్ పర బ్రహ్మ తస్మై శ్రీ గురవేనమః . )

  శ్లో. అజ్ఞాన తిమిరాన్ధస్య జ్ఞానాం జన శాలాకయా
      చక్షు రున్మీలితం యేన తస్మై శ్రీ గురవే నమః .

     మాతృ దేవో భవ, పితృ దేవో భవ ,ఆచార్య దేవో భవ, అతిధి దేవో భవ .

     జన్మ నిచ్చిన తల్లి ప్రధమ గురువు . నడక నేర్పిన తండ్రి ద్వితీయ గురువు .నడత నెర్పుతూ , జ్ఞాన భిక్ష పెట్టె వారు త్రి గుణ రూపులైన వారు తృతీయ  గురువులు. భగవత్ స్వరూపులైన  వారు , హిందూ సంప్రదాయానికి ప్రతీకలైన వారు, తురీయ గురువులు .                         ఎందరో మహాను భావులు అందరికి వందనములు .

  అకలంకంబగు నక్షరంబులను , సర్వార్ధ్హార్ధ సిద్ధం బుగాన్ ,
  సుకరం బయ్యెడి రీతిగా  మదికి సంస్తూయాత్మ పాండిత్యమున్,
  సకలంబున్ దయ జూపి నేర్పిన గురుస్స్వాముల్ విచారింప ..నా
  కొకరా యిద్దర ముగ్గురా నలుగురా ఉన్నార లెందెందరో  .

వృక్షో రక్షతి రక్షితః

వృక్షో రక్షతి రక్షితః ...

వృక్షములను మనము రక్షిస్తే అవి మనలను రక్షిస్తాయి. అవి  నిస్వార్థ జీవులు. త్యాగ జీవులు. మన మనుగడ, శ్వాస పైనే ఆధారపడి 

యున్నది. అలాంటి శ్వాసను ( ఆక్సిజన్ ) ప్రతి ఫలాపేక్ష లేకనే  యిచ్చి వాటి త్యాగమయ జీవితాన్ని రుజువు చేసుకొంటున్నాయి వృక్షాలు. అందుకనే ఒక మహాకవి , 

           పరోపకారాయ వహంతి నద్యః , పరోపకారాయ  దుహన్తి గావః ,

           పరోపకారాయ  ఫలంతి వృక్షః . పరోపకారార్థం  యిదం శరీరం.

(పరోపకారం కొరకే నదులు , ఆవులు , వృక్షాలు , మహాత్ములు .పాటు పడుతున్నారు ) అన్నాడు . మహాత్ములావిధం గానే ఉంటారు. వారు  మేలు చేసి మరచి పోతారు. వారిని  మరచి పోయినచొ  వారిపట్ల మనం కృతఘ్నులమే .  కొందరు చెట్టంత పెరుగుతారు కాని చెట్టుకున్నంత  జ్ఞానాన్ని , త్యాగ గుణమును   పొందలేరు. 

అది వారి వారి జన్మ సంస్కారం. అంతేకదా మరి.మనందరం అలా కాకుండా ఉందామా . 

వాక్ శుద్ధి

వాక్  శుద్ధి . 


భావనా పటిమ కలవాడే వాక్ శుద్ధి కలవాడు. భావానికి ప్రేరణ మనస్సు . త్రికరణ శుద్దులలో మనసు మొదటిది .  రెండవది వాక్కు  ,మూడవది కాయము . స్వచ్చమైన ఆలోచన సరళి , అంతే స్వచ్ఛతతో అలోచిన్చినదే 

వాక్కు రూపంలో వెలువరించడం , ఏ రెండిటికి సమాన   స్థాయిలో శరీరంతో పని చేయించడం . ఈ మూడింటి సమన్వయమే త్రికరణ శుద్ధి అనవచ్చును . త్రికరణ శుద్ధి కలిగి ఉండటమే దైవత్వము. సత్యవచనాన్ని పన్నెండు సంవత్సరాలు  విధి గ పాటిస్తే దైవత్వం వస్తుందని ఆర్యోక్తి . మరి నిరంతరం సత్య వాక్ పాలనా నియమం ఉంటె వారు దైవమే. దైవం అంటే ఆనంద నిలయం . అలాంటప్పుడు త్రికరణ శుద్ధితో ఆనంద నిలయ ప్రవేశ అర్హత సాధించటానికి ఎందుకు కృషి చేయ కూడదు ? అందరికి ఆనందం కావాలి . ప్రవేశ అర్హత కావాలి . అందుకే అందరం ప్రయత్నిద్దాం. రండి .