నిషిద్ధాక్షరి..

     పద్యాలతోరణం... నిషిద్ధాక్షరములు.. ర,య,మ,న.
        సూర్యస్తుతి. 15.05.2020.

        పగటి దైవంబ! జీవుల వాంఛితాల
        గాంచి కాపాడుచుండెడో కాలవిదిత!
        పృధివి పులకించు జాడ, సంసృష్టి జూడ
        కాంతి దాతకే వీలగు  కచ్చితంబు.

       

            పద్యాలతోరణం..4.06.2020. మీపొన్నెకంటి.
            ప,వ,న,జ.అక్షరాలు నిషేధం.. ఆంజనేయస్తుతి.

            హృదయ కమలమందు శృంగారరాముడు
            కరుణ దాగియుంట, కలలు సత్య
            మౌచు,  సీత కాంచు మార్గంబుకుదిరెగా
            సూర్య శిష్య! కీశ!శుభ్రచరిత!
         
           లంకాభీకర కీశా!
           లంకిణి మదసం హరణ!విలక్షణశూరా!
           అంకిత శ్రీరామచరణ!
           సంకటముల దీర్చుమయ్య సద్గుణగణ్యా!

       పద్యాలతోరణం..8.6.2020.
      స,ర,ల,క...నిషేధం గా...లక్ష్మీ దేవి స్తుతి.

     శుచియందు గజమునందున
     వచియించెడు భాషయందు వైభవమందున్
     ఉచితజ్ఞునవ్వు నందున
     పిచుమందపుభూజమందు వెన్నుని యువిదే.

       గ,ణ,ప,త...నిషేధాక్షరాలు.. గణపతిస్తుతి..
     
       ఎలుకవాహనమెక్కి మమ్మేలు సామి
       కరిముఖుండ!విఘ్న హరుడ!కావుమయ్య!
       నీదు దీవన లేకుండ నీశుడైన
       విజయమందడు వెనకయ్య! వేదవేద్
   

     ప,ర,వ,త..నిషేధాక్షరాలు... పార్వతి స్తుతి.
        గణనాథుగన్న జననీ!
        గుణసంభాసీ!సదమల కోమలి యంబా!
        కణకణము జగము నిండిన
        ఫణిభూషణుసాముజాణ! ఫాలాక్షుసఖీ!

              ప,ర,మ,శ. నిషేధము....పరమేశ స్తుతి.
       
          అభవ! ఓలతాంతాయుధు హంత!నాగ
          భూష ణా!భూత నాధా!విభూతి నొసగి
          కావ దయసేయు సాధుసంకలిత భావ!
          భానుడ! సదయ! కాలాంత! భవ్యగుణుడ!

          హ,న,మ,త...నిషేధాక్షరాలు.. హనుమంతునిపై పద్యం.

           

         కపిపుంగవా!సరస వా

         గ్విపుల వచోవిభవ కీశా! వీరాధీరా!

         కృపజూచి కావరావా!

         అపురూప వరప్రభావ వ్యాఖ్యాలోలా!

       శ,ర,మ,త...అక్షరాల నిషేధంతో...రామునిపై పద్యం. 

    భానుకులజుని సుగుణుని పాదధూళి

    నావ సోకిన లలనయై పోవునంచు

    కాళ్ళు కడిగియె యెక్కించి కదలిపోయె

    గుహుడు యోచించె జ్ఞానియై గుట్టునెఱిగి.

ఆటవెలది..ప్రతి. పా. మొదట..రా..రావాలి. రామ పదం ఒకేసారి రావాలి. 

    రాగభావచయము రంజిల్లుమోముతో

    రాచఠీవి వరలు రమ్యగుణుడు

    రాక్షసాంతకుండు రంగైన దైవము

    రాము సుగుణధాము రసననిలుపు.

నిషిద్ధాక్షరి: త,ర,మ,స..లు లేకుండ. శ్రీహరి స్తుతి. 

  దీనావన గోపాలా!

  నేనెందున వెదకువాడ నిశ్చల బుద్ధిన్

  గానగ నుంటిని హృదినే

  గానవిలోలా! దయాళు! కనబడు దేవా!

నిషిద్ధాక్షరి: య,ర,ల,వ...నిషేధం..విష్ణుస్తుతి. 

   మాపతీ! మధు సూదనా!మదనజనక!

   ఖగపతీ!ముని జనగణ జ్ఞాన సింధు!

   మమ్ము సతతంబు కాపాడు మమతతోడ

   నిన్ను పూజింతు సద్భక్తి సన్నుతాంగ! 

   

     

      

అమ్మ..10.05.2020.

                     అంశం. "అమ్మ". 10.05.2020.
        అమ్మ పాదారవిందములకు ప్రణామములతో
         మాతృదినోత్సవము..సందర్భంగా..
                 
   సీ:జననంపు హేతువై జగమున యశమీను
                    మామంచి దేవత మాతృమూర్తి
      పేగునబంధించి ప్రియమార కాపాడు
                    మామంచి దేవత మాతృమూర్తి
      గుర్తుబట్టుటనేర్పి కోరినవ్వులబంచు
                    మామంచి దేవత మాతృమూర్తి
      నవ్వనేర్పునెపుడు నవ్వులపాల్గాక
                    మామంచి దేవత మాతృమూర్తి
      అత్తతాతనిపించి యడుగులువేయించు
                    మామంచి దేవత మాతృమూర్తి
      తొక్కుబల్కులనేర్పి తోడుగ రెట్టించు
                    మామంచి దేవత మాతృమూర్తి
       ఓంకారమునునేర్పి యుత్తమగురువైన
                     మామంచి దేవత మాతృమూర్తి
       సంస్కార సద్గుణ సౌమ్యత్వములనేర్పు
                     మామంచి దేవత మాతృమూర్తి.
 తే.గీ:మాతృదేవత మనకున్న మహిని సర్వ
        భోగభాగ్యాల దేలెడు పున్నెమబ్బు
        పరగ  మమతసమతలంద ప్రాప్తిగలుగు
        అమ్మలేదన్న మాటెప్డు నమ్మలేము.

        ఆ.వె:అమ్మతోడు!అమ్మ యండగనుండగ
                నన్ని యున్నయట్లు హాయిగొలుపు
                ఆమెలేక జగతి యంధకారమెగద
                అమ్మ పదమెమనకు నమృతమయము.

అంతర్జాతీయ మహిళా దినోత్సవము

సందర్భంగా మహిళామళులెల్లరకు

శుభాకాంక్షలు.. 

 స్త్రీ మూర్తి సృష్టి కర్తగు

 స్త్రీ మూర్తియె త్యాగవర్తి  శేముషిదాతౌ

 స్త్రీ మూర్తియౌను జగమది

 స్త్రీ మూర్తికి వందనాలు చేయుము నరుడా.

జయరాం..స్పందన.

జయరాం ఉత్పలమాలకు స్పందన.

  కమ్మని కంఠమందు కవిగాంచినభావమె ద్యోతకంబయెన్.

  రమ్మని తోరణంబునకు రాగసురాగసుధాంబుధిన్సదా
  మమ్ముల ముంచితేల్చుడని మానితరీతినిస్వాగతింపగా
  నెమ్మినిబల్కితిన్సురభినేస్తుని మాటను గౌరవించుచున్
  కమ్మని కంఠమందు కవిగాంచినభావమె ద్యోతకంబయెన్.

   పద్యంబల్లగ వాయువేగమున  నీ పజ్జన్సదాతిర్గుటే
   హృద్యంబౌ పదగుంభనమ్ము రసముల్శోభాయమానంపు,నై
   వేద్యంబై రసనాగ్రరాణిదయచే విద్వాంసులేమెచ్చగా
   చోద్యంబందగనబ్బెనాకు సఖుడా శుభ్రాంశుతేజోనిధీ.

    [08/05 7:59 pm] జె జె. యస్: స్పందన
        ~~~~~~~
పదము పదమున కవియొక్క భావనలను
కంటి ముందట చూపె నీ  గానసరళి
తెలుగు కవితల నున్నట్టి తీయదనము
కలము గళముల నింపుగా మిళితమయ్యె .
[08/05 8:47 pm] suryanarayana rao ponneka: భావస్వారస్యమున్నట్టి పదములెంచి
   రసముచిప్పిలురీతిని వ్రాయుచున్న
   నీదు పద్యాలపరిమళ మెట్టిదన్న
   వేల మల్లెలొకసారె విచ్చినట్లు.
 
       ఈనాటి నాదత్తపది పూరణపై..

     ఆంగ్లపదములగూర్ప నాయాస పడితి
     భావమందిన పొసగవు పదములన్ని
     పదము కుదిరిన స్వారస్య మదనుతప్పు
     ఎట్లొ కూర్చితి గణములనీశుకరుణ.
[08/05 8:49 pm] suryanarayana rao ponneka: వేలమల్లెలు గుంపుగా విచ్చినట్లు.

      పద్యాలతోరణం.. పై చిత్రమునకు (ఆవు ఒడిలో పులి)
     నా స్పందన..మీపొన్నెకంటి..22.05.2020.

  మునులున్ సిద్ధులు యోగులెల్లరును సమ్మోదంబులింపారగా
  మనముల్కల్మషదూరమై కరుణ సన్మార్గంబటంచున్సదా
  దినముల్గడ్పిన భారతావనిని సందేహంబులేలన్సఖా
  ఘనమౌ ధేనువు గుండెకద్దుకొనె వ్యాఘ్రంబున్ మహోత్సాహియై.

   పద్యాలతోరణం.. కన్నయ్య..లేగ.చిత్రమునకు
     నా స్పందనలు...మీపొన్నెకంటి.30.05.2020
 
    రంగు రంగులబుజ్జాయి రమ్యమైన
    నీలవర్ణుని యొడిలోన తేలిపోయె
    మోహనాంగుడ ద్దానిని ముద్దుజేసి
    అమ్మ తాననునట్లు సమ్మోదమొసగె.
 
    గోపకాంతలు నేనెప్డు గోలచేతు
    నంచు చాడీలు చెప్పుదురమ్మతోడ
    వారినిందలు సత్యమా ? పల్కుమనిన
    లేదులేదంచు తలద్రిప్పె లేగదూడ.

     పద్యాలతోరణం.. గాంధీజీ చిత్రమునకు
       నా స్పందన.మీపొన్నెకంటి.8.06.2020.

     శాంతిపథమది శస్త్రమై సాగిసాగి
     దేహమంతయు వ్యాపించె దివ్యమగుచు
     విశ్వమానవ శ్రేయమే వేడికొనుచు
     జాతిపితయయ్యె గాంధిజీ జయమునంది.

     శాంతికాంగ్ల పదము సర్వకాయమునిండె
    గాంధితాత జూడ కారునలుపు
    హింస మనకునెపుడు హేయంబటంచును
    పలికి గాంధి మిగుల ప్రగతిగూర్చె.

    లీలామోహను బంధము

     హేలగ నను జుట్టివేయ హృదయంబెల్లన్

     పాలనుగలసిన జలముగ

     లీలంగడు తెల్లనాయె లేదితరంబున్.

     నేటి తెలుగు కవిత ...ఒక యువకవి మానసిక స్థితి.

   సంధులనిన నేడు సదవగాహనలేదు

   ఏసమాసపటిమమేమిలేదు

   భావపుష్టి జూడ పరిమితంబౌనుసూ

   తెలుగు కవితలన్న దిగులుపుట్టు.

ముందునుయ్యి వెనుక గొయ్యి...ఈ పదాలు అలాగే ఉంచి 

భారతార్ధంలో ..ఆటవెలది.

కృష్ణ మానభంగ దృశ్యంబు గాంచుచు

రాజుకెదురు చెప్ప రవరవపడు

ద్రోణ భీష్మ కృపుల దుస్థితి గమనింప

వినుడు**ముందునుయ్యి వెనుకగొయ్యి**

స్పందన: కందమునుగూర్చి కందములో...

   పందిని బొడిచిన బంటగు

   కందము నందముగవ్రాయ కవిపుంగవుడౌ

   పందెముతో కందాలను

   వందలు వేల్జెప్పుకవికి వందనశతముల్.

     
    

నవ్వుల దినోత్సవం.3.05.2020

నవ్వుల దినోత్సవం శుభసందర్భమున
         అందరికి నవ్వుల శుభాకాంక్షలు.03.05.2020
                            మీ పొన్నెకంటి.

     ఉ : కొందరు నవ్వినన్ జగతి కుక్కుటముల్ధర కేరినట్లగున్
           కొందరు నవ్వినన్ నిజము కుండలు బ్రద్దలె యైనశబ్దముల్
           కొందరు నవ్వినన్ పరమ గూఢనిగూఢప్రవృత్తి ద్యోతమౌ
           కొందరు నవ్వినన్ సరిగ గుర్తును బట్టగలేము నవ్వనిన్

           కొందరు నవ్వినన్ బహుళ గుంభనమై పరమార్ధమైచనున్
           కొందరు నవ్వినన్ చెలగి ఘోరవికారపు చేష్టదోచెడిన్
           కొందరు నవ్వినన్ ప్రబల కోపప్రకోపము గీతదాటెడున్
           కొందరు నవ్వినన్ సరస కోమలి వాలుగ చూచినట్లగున్

           కొందరు నవ్వినన్ గడుసు కోడలు భర్తను బిల్చినట్లగున్
           కొందరు నవ్వినన్ ముదురుగోపిక ముద్దులమూటలౌనుగా
           కొందరు నవ్వినన్ కఱకు కోరలుగల్గిన శేషుఫూత్కృల్
           కొందరు నవ్వినన్ మదిని  కోర్కులు తీరక నేడ్చినట్లగున్.

           కొందరు కొందరంచునటు కూరిమి చాలని నవ్వులేలకో
           అందరు నిర్మలాత్ములయి హ్లాదముగూర్చెడి భంగినవ్వరే
           మందగునయ్యదే పరమ మారినిసైతము పారద్రోలగన్
           విందగు జీవితాన కడు వేడుకగూర్చును మానవాళికిన్.

           నవ్వ నేర్చిన రోగముల్ నయము నయము
           సన్న నవ్వులు విసిరిన జయముజయము
           నవ్వగల్గిన జీవియే నరుడునరుడు
           జీవితాంతము సతతంబు చేయుమయ్య!
           

కవితా రీతులు

సభాయైనమ:

కొందరు పలుకుల రవ్వలు
కొందరు గువ్వలు పదముల కువకువలాడన్
కొందరు కవితల దివ్వెలు
కొందరు మువ్వలు కవనపు కూర్పునజాణల్..

కొందరు దోరపు సిగ్గులు
కొందరు మీసములుదువ్వు కొంటెతనంబుల్
కొందరు కోమలి నవ్వులు
కొందరు కోరిన సరసపు కొప్పున మల్లెల్..

కొందరు వీణాతంత్రులు
కొందరు నాదస్వరములు, కొందరు తాళాల్
కొందరు మద్దెల దరువులు
కొందరు గంటలు చదువుల కోవెలలందున్..

కొందరు దిగ్గజములు, యిం
కొందరు సింగపుకొదమలు, కొందరు చిరుతల్,
కొందరు కవనాశ్వంబులు,
కొందరు మణులున్న ఫణులు, కొదవదిలేకన్..

కొందరు జలపాతంబులు,
కొందరు చిరుగాలితెరలు, కొందరు జల్లుల్,
కొందరు వాగులువంకలు,
కొందరు భాషాబ్ధిఁబుట్టు క్రొంగెరటంబుల్..

కొందరు నాటిన విత్తులు,
కొందరు పదపల్లవములు, క్రొవ్విరులిటనిం
కొందరు మాగిన ఫలములు
కొందరు వ్యాకరణక్షేత్ర కోవిదులిందున్..

కొందరు అర్థాబ్జభవులు,
కొందరు సత్యంపు భావ కువలేశయులున్,
కొందరు శబ్దేందుధరులు,
కొందరు శతకోటి సూర్య గోపీఠంబుల్..

కొందరు మంత్రాక్షరములు,
కొందరిపలుకెంతొసొంపు కోమలమందున్,
కొందరి తలపులు తేనెలు,
కొందరి చిరునగవెచాలు కోటిశుభమ్ముల్..

అందరికందరె యిచ్చట,
సందడిసేయుదమురండి! సాహిత్యసభన్,
ముందుకు సాగుదమింకను,
వందనశతములనిడెదను వాణికి మీకున్..

🙏🙏🙏

న్యస్తాక్షరి.. పద్యాలతోరణం.

పద్యాలతోరణం వారి న్యస్తాక్షరి.
  1పా.1వ అక్షరం..తో., 2వ పా.2వ అక్షరం..ర., 3వ పా. 3వ
   అక్షరం.ణ., 4వ పా. 4వ అక్షరం.ము..(కురుక్షేత్ర సంగ్రామం)
                     పూరణ....మీ పొన్నెకంటి.

 "తో"రపు విల్లుతో ఘన మదోద్ధత కౌరవసేన మించ-న
 వ్వా"ర"ణయూధమున్నిలిపి వంతులవారిగ జంపుకొందరున్
 మార"ణ"హోమమున్జరుప మాయలుపన్నిరి వ్యూహకర్తలున్
 ఈరణ "మూ"హసేయపరమేశ్వర! కృష్ణుడె హేతుభూతమౌ.

    పద్యాలతోరణం... దత్తపది..సీతాస్వయంవరం
      చంపకమాల....నా పూరణ..మీపొన్నెకంటి.12.05.20.
       1.వ.పా.1వ.అక్షరం.."క"
       2.వ.పా.2వ.అక్షరం.."మ"
       3.వ.పా.3వ.అక్షరం.."ల"
       4.వ.పా.4వ.అక్షరం.."ము"
  చం: "క"మలదళాయతాక్షి ధరకానుక,సీతస్వయంవరార్ధమై
         అ"మ"లినతేజుడై జనకుడంచితరీతి సభాంతరాళమున్
         భ్రమ"ల"నుదీర్చి యీధనువు భంగముజేసినవాడె ప్రేముడిన్
         గమన"ము"శ్రేయమై తనకు కౌతుకమొప్పెడు భర్తయంచనెన్.

    పద్యాలతోరణం..5.06.2020.   న్యస్తాక్షరి. 
     క,చ,ట,త,ప..ఒక్కొక్క అక్షరం పాదాదిన ఉండునట్లు
     తెలుగు భాషా సౌందర్యము..మీపొన్నెకంటి.

    "క"రము మనోహరంబయిన కంజదళాక్షుని చూపులోయనన్
    "చ"రణపు శైలిగల్గినది, సౌరభముల్విరజిమ్ము పూలతో
    "ట"రహి పదంబులన్నియును డంబముతగ్గని రిక్కలౌచునున్
    "త"రములనుండివెల్గి యవధాన శతంబుల దేశదేశముల్
    "ప"రుగులువెట్టె నా తెలుగు భాషనుమించిన భాషలేదిలన్!

           మీయభిమానపు హారము
           వేయుట తగుపల్కులమ్మ వీణియకెపుడున్
           పాయని కూరిమితో నా
           ప్యాయత చూపింపమీరు పరవశమౌదున్.

          1.పా.   1.వ.అ....ప.
     2.పా.   2.వ.అ....వ.
     3.పా.   3.వ.అ....న.
     4.పా.   4.వ.అ....ము.
    న్యస్తాక్షరి...  చంపకమాల...రైతు గురించి.
        పొన్నెకంటి సూర్యనారాయణ రావు.
 చం:"ప"వనపుస్పర్శచే మొయిలు ప్రబ్బినమోదపుపుల్కరింతల
       న్న"వ"నికి దాహమార్చి కడుహ్లాదముగూర్చగ రైతుసోదరుల్
       జవ"న"ముబెంచి దుక్కులను చక్కగ దున్నగ మూరుతంబుకై
       నవక"ము"తో గుణించు వర నైష్ఠికు శాస్త్రినిజేరిరంతయున్.

      న్యస్తాక్షరి

        1 - 3 తం., 2 - 2. ద., 3 - 14. నా. 4. - 5 న. 

                     శివపార్వతులు - మత్తేభం.

  

  విది"తం"బౌనటె? నీదు తత్త్వమిక నావిజ్ఞాన లేశంబుచే

  స"ద"యా!యీశ్వర!పాహిపాహి శివ!విశ్వాత్మా!మహేశా!విభో!

  నదియౌ గంగను జూటమున్ మలచి నీ "నా"ట్యంబునంబార్వతిం

  బదిలంబౌ"న"టులుంచినావుగదరా పజ్జన్ మనోభీష్టతన్.

1వపా1వ అ.."అ"..2వపా2వ అ.."రు"..3వపా3వ అ.."ణ"

     4వపా4వ అ.."ము"....సూర్యుని గూర్చి, చంపకమాల.

    

   "అ"రయగ తూర్పుకొండల మహాద్భుత రోచులనింపివైచుచున్

    క"రు"ణదలిర్ప జీవులకు కామిత దాయగు కర్మసాక్షి., యా

    చర"ణ"విహీనుడౌ రథపుసారథి యైనయనూరు సాయమున్

    ధరకు "ము"దంబొనర్పగను దా జనుదెంచును ధర్మమూర్తియై.

    "అ"రయ సుమంగళీముఖమహాద్భుత కుంకుమ రేఖయోయనన్

    మ"రు"నటు దగ్ధమున్సలుప మారిన నీశు త్రినేత్రమోయనన్

    కరు"ణ" కపీశభావమున కమ్మని ఖాద్య ఫలంబునాబడున్

    మెరసి "ము"దమ్ము,భ్రాంతినిడు మిత్రుని వేడెద నెల్లవేళలన్.

 స.ర.స్వ.తీ. యతిస్ధానంలో నాలుగు పాదాలలో ఉండాలి.

       ఆ.వె. సర్వవేదరాశి! సహజసుందరగాత్రి
       రమ్య వాణి!నాదు రసన నిలచి!
       సాధుజనులుమెచ్చు స్వరదానముంజేసి
       తేట తెలుగు పలుకు తీరునిమ్మ!

    1.పా.10వ అక్షరం.(ప.) 2.పా.4వ అక్షరం.(ప.) 3.పా.13వ అక్షరం (ప.)      4.పా.16వ అక్షరం (.ప.) శ్రీహరి వర్ణన. ఉత్పలమాల.

   

    భారము నీదెయన్ననిక పద్మ విలోచన! రాక్షసాంతకా!

    ఘోరపు పన్నగంబు తన కోరలు చాచుచు చంపజూచినన్

    తారణజేయుచుందువల తప్పక పన్నగశాయి! శ్రీహరీ!

    కూరుతు పుష్పమాలికల కోరికమీరగ పక్షివాహనా!

న్యస్తాక్షరి. ఆటవెలది..యతిస్థానాలలో; చం, ద, మా, మ. సూర్యస్తుతి.

   శరణు శరణు మిత్ర చంపకుమమ్ముల

   తగినవేడి తోడ దయనుజూపు

   మహితతేజమంత మాపయి జూపగ

   మనగగలమె మేము మహినిక్షణము.

న్యస్తాక్షరి: రా,జ,ధా,ని,  అక్షరాలు పాదాదిన...తేటగీతి..రామాయణం. 

      రామ దర్శనభాగ్యమ్మె రంజకమ్ము

      జన్మ జన్మాల పాపాలు సమసిపోవు

      ధార్మికంబైన జీవన మర్మమెఱిగి

      నిశ్చలాత్మకుడై చను  నిజము నరుడు.

న్యస్తాక్షరి: సీ.తా.రా.మ. యతిస్ధానాలలో రామాయణం..ఆటవెలది. 

శివధనుస్సు విరచి సీతనుగ్రహియించి

తపము గాచనెంచి తాటక యను

రక్కసిం దునిమెను రాజసాన ఘనుడు

మాన్య రాఘవుండు మహితగుణుడు.

న్యస్తాక్షరి:  స.సే.మి.రా.  ఆటవెలది..రామాయణార్ధం.

సకలసుఖముల త్యజియించి సాధుగుణుడు

సేమమును గూర్చి మునులకు చింతదీర్ప

మిథిల రాట్సుత వాదము మెచ్చుకొనుచు

రాఘవుండేగె వనికి విరాగియగుచు.

న్యస్తాక్షరి: పం.చా.న.నం...పాదాదిని...నరసింహస్వామి వర్ణన.

పండు జన్మ  నీదు పాదమానినయంత

చారు నారసింహ!సాధువినుత!

నన్ను బ్రోవుమయ్య! నాగ శయన! శ్రీయ

నంత రూప! దివ్య! నతులొనర్తు.

పండ్లు కోర పండ్లు పదునైన నఖములున్

చారు నేత్రయుగము శార్ఞ్గయుతము

నరుడు హరియు గలసి నరసింగమాయెన

నంత తేజుడపుడు వింతజూప.

సం.గీ.త.ము. పాదాదిన ఒక్కొక్క అక్షరం ఉంచి సంగీతం గూర్చి 

సంబరంబౌను మదికెప్డు శ్రావ్యమగుచు

గీతభేదాలు జావళీల్ కీర్తనాళి

తన్మయత్వాన వినిన వైద్యంబెయగును

ముద్దుగోపాల! గోపికా మోహనాంగ! 

     

అట్లకాడ...స్పందన.

😁  అట్లకాడ  😁

మ॥
పెనమందట్లు,చపాతి,రొట్టెలను  ప్రావీణ్యమ్ముతో వేయగా,
గననా మూకుడు లోన శాకమును జాగ్రత్తన్ వెసన్ గల్పగా,
తనసంతానపుటల్లరిన్ నిలుప వాతల్ పెట్టగా జూచునా
వనితాలోకకరాబ్జమందు చెలగేవా!అట్లకాడా భలే!

ఉ॥
"మైసురుపాకు"కోయుటకు మాయురె చక్కని సాధనమ్మువై
వేసిన కూరముక్కలను వేపగబాణలియందు పొయ్యిపై
వాసిగవంటయింటనె నివాసమునుండెడి యట్లకాడ నీ
ఊసులులేనిదే గడవదొక్కదినంబును స్త్రీలకిండ్లలో!

ఉ॥
మెట్టిన యింటిలోనణగి మెల్గుచునుండెడి స్త్రీలనెత్తిపై
మొట్టుచునుండ భర్తలును, పూర్తిగనోర్మి నశించినంతనే
చట్టుననాయుధమ్మువయి చయ్యన లేచుచు స్త్రీలనెల్ల నా
రొట్టెలకర్రతో కలిసి రుద్రమదేవిగ మార్చుచుందువే!

కం॥
ఇంతులు కోపముబూనుచు
పంతముతో భర్తలపని పట్టెడివేళన్
వింతగచక్కిలిగింతల
కాంతాకరవాలమగుదు "కార్టూను"లలో!

సీ॥
పెనము,మూకుడుకెల్ల పేర్మికాడ వగుచు
నలరారుచుందువే యట్లకాడ
"వాత"వైద్యమొసగు బహుళోపకారివై
యలరారుచుందువె యట్లకాడ!
బెణుకులెన్నియొ బాపు పెద్దదిక్కువగుచు
నలరారుచుందువె యట్లకాడ!
దిష్టితీసెడువేళ దివ్యసాధనమౌచు
నలరారుచుందువే యట్లకాడ!

ఆ.వె॥
వంటయింటిలోన వర్ధిల్లు వాటిలో
ముఖ్యవస్తువులను ముందునిలిచి
చేతిసాయమగుచు చెలరేగుచుందువే
అతివతోడునీడ యట్లకాడ!
😁🙏😁🙏😁🙏😁🙏😁🙏😁
రచన:
ఎస్ సాయిప్రసాద్
9440470774