వినాయక చవితి శుభాకాంక్షలు.

    విఘ్న దేవునికి .విన్నపము ,  శుభాకాంక్షలు .

    విఘ్నంబు లెన్ని గల్గిన
    దఘ్నంబు జేసి రయమున దయతో గాచున్
    విఘ్నాధి పతిన్ , భక్తుల
    నిఘ్నున్ గోరుదు శ్రేయము నే నందరకున్  .

 వినాయక చతుర్థి శుభాకాంక్షాలు/ 17.09. 15. 

గణనాధుని సేవ.  గుణమణులకు త్రోవ.

                     సూర్య శ్రీ..27.08.25.

గణనాధుపాదసేవను

గుణమణులైవిద్య లంది కోవిదులగుచున్

అణువణువు భక్తి పూర్ణత

ప్రణవాంకితతత్త్వమందు ప్రజలిద్ధరలోన్.1

గరిక పూజకె ముదమందు ఘనముగాను

మోదకంబుల నర్పింప మ్రొక్కు దీర్చు

నాల్గు గుంజిళ్ళు దీసిన నైష్టికముగ

కరుణ జూపించు దైవంబు గణపతయ్య! 2

ఎట్టి కార్యంబు ఘనత చేపట్టుచున్న

చిట్టి గణపతి సేవను చేయవలయు

ఈశుడైనను తుదకు రమేశుడైన

కార్యసాఫల్యమందగ ఖచ్చితముగ.3

మట్టి గణపతి నీనాడు పట్టుబట్టి

తెచ్చి పూజించి సద్భక్తి తిరిగి పంప

పంచభూతమ్ములానంద పరవశమయి

దీవనాళిని పంచు దేదీప్యముగను.4.

అంబ ముఖపద్మ వికసితహర్షరవిగ

ఖ్యాతిగాంచిన గణపయ్య కరుణకొఱకు

సతము ప్రార్ధింతు మది నిండ శ్రద్ధతోడ

రండు గళము గల్పుడు భక్తి   రక్తిదనర!5