దత్త విషయాలు-అయోధ్య రామయ్య.వగైరాలు.

                  దత్తవిషయము.. అయోధ్యరామయ్య..

         

   సీ.  కోదండరామయ్య కోర్కెలు దీరంగ

                              సంపదలిచ్చుచు సాకుగాత!

        కౌసల్యరామయ్య ఘనమైన కరుణచే

                        భక్తులహృదయాల వరలుగాత!

        జానకిరామయ్య జయరామ భద్రుడై

                          శ్రేష్ఠ విశ్వంభరన్  జేయుగాత!

        పట్టాభిరామయ్య ప్రభువుల డెందాల

                               నిర్మల భావాలనెరపుగాత!

            రామభక్తుల కలలన్ని రమ్యగరిమ

            సత్యమైయయోధ్యనగర సౌరుబెరుగ

            పుణ్యఫలముగ లభియించె భూమిపూజ

            చరిత మరువంగ లేనట్టి సమయమిదియ.

దత్తవిషయము...పుస్తకం.
               
             సీ: అక్షరంబులపూల హారంబదేమన్న
                  పురుషోత్తమునిజూపు పుస్తకంబు
            అజ్ఞానతిమిర సంహరణంబదేమన్న
                    ముద్దులొల్కెడురవి పుస్తకంబు
            గురువుల మించిన గురువెవ్వరన్నను
                     పూజితంబైనట్టి పుస్తకంబు
           మస్తకంబునకెప్డు మధురభోజనమన్న
                    పుష్టితుష్టినిగూర్చు పుస్తకంబు
           రత్నవైడూర్యాలు రాజ్యాలకన్నను
                      పూజితమ్మైనది పుస్తకంబు
           చిన్నల పెద్దల చింతదీర్చునదన్న
                       ముఖ్యంబు వారికి పుస్తకంబు
           చదువరి కైనను చక్రవర్తికి నైన
                       భూరితెల్వినినిచ్చు పుస్తకంబు
           "కోశముగలవాని కోవిదుడౌవాని
                    ముంగిట ముత్యంబు పుస్తకంబు
            హస్త భూషణ మైనది పుస్తకంబు
            పూర్ణ విజ్ఞాన సింథువు పుస్తకంబు
            మోదసమ్మోద భరితంబు పుస్తకంబు
            పుచ్చుకొన బాలసారెను పుస్తకంబు.

            వాణిపుత్రుడై నిరతంబు వరలగలడు.
            స్వర్గమేగిన సౌఖ్యంబె సాగుచుండు.
            పుణ్య మతులౌచు పొత్తాల పూజసల్పు
            వారికియ్యవె వేవేల వందనములు.

            అందరికి ప్రపంచ పుస్తక దినోత్సవ శుభాకాంక్షలు.

            పుస్తకంబు మనకు పూర్వపుణ్యఫలమ్ము

            హస్త మందు వెలిగి  యార్తిబాపు

            మేథకు పదనిచ్చు మేలైన మందురా

            జీవితమ్ము మార్చు చెలిమికాడు. 

            దత్తవిషయము.. గురువు..5.7.2020.
              
             సీ: నాతల్లి గర్భాన నన్నుంచ నాన్నయే
                       నాకు రూపమిడిన నలువ గురువు
              నవమాసములు మోసి భవబంధముల్గల్పి
                        యవనిని జూపిన యమ్మ గురువు
              తనరూపమంచును తాదాత్మ్యమొందుచు
                          నడతనేర్పినయట్టి నాన్న గురువు
              అజ్ఞానతిమిరాన విజ్ఞాన దీపమై
                          వెల్గులుపంచిన వేత్త గురువు
              ఛేదించినంగాని చిగురించి నవ్వెడు
                           వృక్షంబె నాకెప్డు పెద్ద గురువు
               కాలనిర్ణేతగా క్రమమైన మార్గమున్
                     రహిజూపి వెల్గెడు రవియు గురువు
               పంచమస్వరమున పలురాగముల్బాడు
                             కోయిల సైతము గురువు నాకు
               ఇదియది యననేల హృదిగల జీవాలు
                            సర్వంబు గురువులే శంకయేల?
                                     
               ఆ.వె:లఘువుల దరిజేర్చి లాలించి ప్రేమించి
               జ్ఞానభిక్షపెట్టు జగతి  గురువు
               ఆదిశంకరుండు హైందవజాతికి
               పరమగురువు సతము ప్రాంజలింతు.

దత్త విషయము... తోకముడిచిన చైనా...

        "ధోవలు"నీతికి "చైనా"
         త్రోవలు వెదుకంగజూచి తోకనుముడిచెన్
         పావన భారతభూమిని
         కావగ సింగంబులెన్నొ కాపుగనుంటన్.

పద్యము-మద్యము...

    పద్యపుసారమున్ సతము పానముజేసిన జ్ఞానవృద్ధియౌ

    మద్యముద్రావినన్ తెలివి మైకముగ్రమ్ముచు మందమైచనున్

    పద్యము హృద్యమై వెలుగ పండిత పామరులెల్ల మెత్తు రా

    మద్యము నాహహాయనెడు మందులు కొందరె చూడగానగున్

    పద్యము వ్రాసినన్ మరియు పాడిన మోదమునందురందరున్

    మద్యముద్రావినన్ తనకు మాత్రమె సౌఖ్యపు భ్రాంతిగల్గుగా

    పద్యము మానసాంబుధికి పర్వమె పూర్ణ శశాంక జ్యోత్స్నలన్

    మద్యము సర్వనాశకరమైచని దుర్భర దుఃఖహేతువౌ

    పద్యము మద్యముల్ నరుని బానిసజేయును సారముండుటన్

    మద్యము మాని పద్యరస మానుడు భావిసుఖంబులందగన్.

   బిరుదులపై మోజు.

 పండితులు మెచ్చి సత్సభన్ పండితునకు 

 ప్రేమ నిచ్చెడు నామంబు బిరుదమండ్రు.

 కవుల డెందాలు మురిపించు కవితలేని

 పిన్న కవులకు నేలొకో బిరుదుమోజు?.

వాల్మీకి గురించి....

  మరమర శబ్దమే పరమ మంత్రమువోలె విరాజమానమై

  చరచర మానసాంబుధిని చక్కని కోసలరాజవంశమే

  కరము విశేషభావముల కావ్యము రూపమునందె ఖ్యాతిమై 

  యరయగ రామనామమున కంకితమయ్యె మునీంద్రడాదటన్.

నేటి ప్రసారమాధ్యములు. 

వివిధములైన సంగతుల  విస్మయముంగలిగించు పత్రికల్

శ్రవణము దర్శనంబులను చక్కగగూర్చెడు యంత్రరాజముల్

నవరస గీతముల్వినగ నవ్య సుగీతప్రసారసాధనాల్

దివమును రాత్రులున్ నరుల దేహపుభాగముగాగ సెల్లులున్