సీ. రామాయణమెగదా! రాజిల్లు దివ్యమౌ., గాయత్రి మంత్ర ప్రకాశమగుచు
రామాయణమెగదా! రాణించును పవిత్ర ., సరసపాత్రల చిత్రశాలయగుచు
రామాయణమెగదా! రవణిల్లు రసరమ్య., కర్ణపేశలమైన కవనమగుచు
రామాయణమెగదా! రహియించు నైకార్థ., వర్ణాల బింబించు స్ఫటికమగుచు
తే. గీ. అరయ రామాయణమెగదా! ఖ్యాతికెక్కు
పుడమిలో నిత్య నవ్యతా స్ఫూర్తి నిడుచు
లోకపుం బోకడల నెల్ల రూపుగొన్న
భవ్య రామాయణము గద్యకావ్య రీతి
అలరుగాదొకో! ‘‘సూర్య’’ప్రభాత్మమగుచు. 1
ఉ. గేయము భావపింఛమయ కేకి యనందగు శ్లోకమే శ్రవః పేయము పుట్టపుట్టు కృతి వెల్గుల నీనెను తెల్గు ‘‘సూర్య నా
రాయణు ’’గద్యరూపమవురా! సముదాత్తము గ్రాంథికైక భా
షీయముగా పఠింపదగి, శ్రేయమిడున్ దరమే! నుతింపగన్.2
ఆ.వె. దివ్యమైన ‘‘సాహితీ గవాక్షాం’’ధ్రప్ర
భా’’ఖ్య పత్రికన్ ప్రభాత కాంతి
స్ఫూర్తిమంతమగుచు‘‘సూర్య"ప్రభ వెలింగె
పేర్మితోడ జనుల కూర్మిగొనుచు.3
మ. మరువన్ శక్యమె? ఆంజనేయుని సుధీమచ్ఛక్తి, సుగ్రీవు భా
స్వరమౌ రాజసభక్తి, ఆ భరతు సౌభ్రాత్రానురక్తి ప్రభల్
వర కైకేయి ప్రయోజనాత్మ భవితవ్య ప్రాభవోద్దీప్తి, యె
ల్లరకున్ నిత్యము దర్శనీయమిట ‘‘సూర్యారామ’’కావ్యంబునన్.4
ఆ.వె. శిష్ట గాయకుండు, చిత్రకారుండు భా
షాప్రవీణ సఖుడు, సరసమూర్తి
వ్రాయు రామ కథయె గ్రంథమౌ వేళ ‘‘రా
మడుగొ’’సంగు నుతుల నుడుల కడలి. 5
అభినందన. ఆచార్య బేతవోలు రామబ్రహ్మంగారు.
మిత్రులు శ్రీ పొన్నెకంటి సూర్యనారాయణరావుగారు గుంటూరు కె.వి.కె.సంస్కృత కళాశాలలో భాషాప్రవీణ ఫైనల్ ఇయర్ చదువు
తున్నప్పుడు నేను ఆ కళాశాలలో లెక్చరర్ గా (1970..71) ఉద్యోగంలో
చేరాను. యేలూరిపాటి అనంతరామయ్యగారు అప్పుడు ప్రిన్స్పాల్.
క్రొత్తగా చేరిన కుర్ర లెక్చరర్ కి ఫైనల్ ఇయర్ తరగతులు బోధనకు ఇవ్వరు. నాకూ ఇవ్వలేదనే గుర్తు. వీరి తరగతిలో ముద్దా లీలా మోహన రావు, రామడుగు, సూర్యనారాయణ, గుం.శి.కో.రావు,
ప్రభృతులు ఉండేవారు. వీరి తరగతికి వెళ్లి పాఠాలు చెప్పిన తీపి గుర్తు ఏదీ నాకు లేదు. వీరందరు జ.మా.శ, శ్రీ,శా, కో.సీ.రా, మ.వీ.శ
(మల్లంపల్లి వీరేశ్వర శర్మ)చెరువు సత్యనారాయణ శాస్త్రిగారు వంటి హేమా హేమీల దగ్గర ఐదేళ్లపాటు విద్యను అభ్యసించారు.
వీరందరు నన్ను కూడ గురువుగా సంభావించడం నా పురాక‌ృత శుభాధిక్యం. అంతకన్నా ఇది వీరి ఉత్తమ సంస్కారానికి నిదర్శనం. అది వీరి గురువుల బోధనలవల్లా వీరి చదువుల వల్లా వీరు చేసిన సాహితీ సాధనల వల్లా వీరికి లభించిందని నా విశ్వాసం.
అందున ఈ సూర్యనారాయణరావు గారు శ్రీమద్రామాయణాన్ని ఉపాసించిన భాగ్యశాలి. ఉపాధ్యాయ వృత్తిలో తరించామని సంతృప్తిపడి ఊరుకోకుండా తమ విద్వత్తును అటు సాహిత్యానికి ఇటు సమాజానికి ఉపకారకంగా సద్వినియోగం చేస్తూ గురు ఋణం తీర్చుకొంటున్న సంస్కారవంతులు. నాజరు జీవితచరిత్రను పద్యకావ్యం చెయ్యడం ఒక తరహా సేవకాగా, శ్రీమద్రామాయణాన్ని ఇలా సూర్యశ్రీరామం పేర యథామూలంగా సకల జన సుబోధకంగా ఇతివృత్తానికి తగిన ఉదాత్త వచన రచనాపాటవంతో లోకానికి అందించడం ఋషిరుణ విమోచకమైన పరమపావన సేవ.
అందుకని సూర్యనారాయణరావుగారిని మనసారా అభినందిస్తూ వీలుచేసుకొని మరీ ఇలా నాలుగు ముక్కలు రాస్తున్నాను. ఇక్ష్వాకు వంశానికి మూలపురుషుడి పేరు పెట్టుకున్న ఈ సూర్యనారాయణుడు రామనారాయణుడి చరితాన్ని మరీ ముచ్చట గొల్పింది.
అలనాడు విశ్వనాథవారన్నట్టు మరల ఇదేల రామాయణం అని ఎవరైనా అడిగితే చెప్పడానికి ఈ సూర్యశ్రీరామాయణంలో చాలా విశేషాలున్నాయి. దృష్టి భేదాన్నిబట్టి ఆయా అనువక్తలు ప్రస్తావించనివీ, అరగొరగా చెప్పినవీ, అన్యథాకరించినవీ, ఇలాంటి విశేషాలెన్నో ఈ వచన రచనలో కనిపిస్తాయి. అనువక్త చాలా జాగరూకుడై భక్తి శ్రద్ధలతో దీన్ని రూపొందించాడు. ఉదాహరణకు ఒకటి మనవి చేస్తాను.
గౌతముడు అహల్యను అసలు ఎందుకు శపించాడు?దీన్ని చాలా
మంది ధైర్యం చాలక దాటవేశారు. అలాగే ఏమని శపించాడు? అనే దానికి కూడా ఎన్నో పాఠాంతరాలు సినిమాలు పాటలును. వాల్మీకి ఆ మహర్షి నోట పలికించిన శాపాన్ని యథాతథంగా మనముందుంచారు ఈ సూర్యనారాయణగారు. కథాపరంగా , సంఘటన పరంగా ఉత్తరకాండతో కలిపి అంతట ఉన్న అనేక విశేషాలను వీరు పాఠకులకు అందించారు.
అలాగే ‘‘పంచోచేల్లోకనాయక;’’ వంటి జ్యోతిశ్శాస్త్ర రహస్యాలనూ,ఆచమనమంటే అర చేతిలో మినపగింజ మునుగునంతటి నీరు తీసికొని త్రాగుట ( మాషమజ్జన పరిమిత శుద్ధోదకాని) వంటి సదాచార విశేషాలనూ, దివ్య వత్సరాలు, మానుష వత్సరాలు వంటి కాల గణన సంప్రదాయాలను అనేకానేకం యథావసరంగా వీరు పొందుపరిచారు.
తెలిసిన కథా విశేషమే అయినా , తెలియని కమామిషూలనెన్నింటినో జతగూర్చటం వీరి ఈ సూర్యశ్రీరామం ఒక విశిష్టతను అవశ్య పఠనీయతను సంతరించుకొంది. ఈ నాటి పాఠకుల తాజా వచన రామాయణాన్ని చదివి చరితార్థులవుతారని ఆశిస్తున్నాను. ఇంతకు మునుపు ఈ రచయిత .. రాయకూడనివి రాసి ఉంటే ఆ దోషం తొలగిపోయి ఈ రామాయణ రచనతో వీరి జన్మ ధన్యమయ్యిందని సంభావిస్తున్నాను. సెలవు.
మీ బేతవోలు రామబ్రహ్మం.
శ్రీ శోభకృత్తు, కామునిపున్నమి.
24.03.2024.
సంకల్ప సిద్ధుడు. జొన్నలగడ్డ జయరామ శర్మ.
1. శ్రీరామ రామ రామని , నోరారగ సంస్మరింప నుర్వీజనులన్
చేరును శుభములు కొల్లగ , వారిన్ కాపాడు సతము వైకుంఠుండే.
2. అవని నాదర్శ వర్తన కాటపట్టు , పారమార్ధికమునకును పట్టుగొమ్మ
శ్రేయదంబౌను జాతికి జీవగఱ్ఱ ,మార్గదర్శక మెపుడు రామాయణమ్ము.!
3.పుణ్యపురుషుల కీభూమి పురిటిగడ్డ, వారి చరితలు జాతికి వన్నెగూర్చు
పుణ్యభూమిని ధార్మిక బుద్ధి సడల, మారుచుండెను కలియుగ మహిమయేమొ!
4. నీతి మార్గానుసారికి నీడలేదు, మాయదారుల చేష్టలే మన్ననాయె
పెద్దవారల సుద్దులు పెడకు ద్రోయు, మాయదారుల మార్పు రామాయణమ్ము
5. రామచరితమ్ము నెందరో రమ్యఫణితి, వివిధ సాహిత్య రీతుల వెలయజేయ
మిన్నకుండక రచియించె ‘‘పొన్నెకంటి’’, ‘‘సూర్యశ్రీరామ’’మను పేర సుకృతమిద్డి.
6. సుఖము శాంతము సౌభాగ్యశోభ దనర, నీతి నియమానుసారాన నెల్లజనులు
ధర్మమార్గాన వర్తిల్ల దలచి వ్రాసె, రామచరితమ్ము ‘‘సూర్యనారాయణుండు’’.
7. ఆశయాలకు ననువుగా నాదరించి, దయయు సత్యము శౌచము ధర్మబుద్ధి
వీడకుండగ శ్రీరాము వేడుకొనిన, రామరాజ్యము జగతిని రాకయున్నె?
8. కాలవశమున కాయంబు గాయమైన, వీసమైనను జంకక విసుగులేక
కౌసలేశుని నామమే శ్వాసగాగ, పూనుకొన్నట్టి రచనను పూర్తిజేసె.
9. ఆదికావ్యాను సరణ పునాది యనుచు, సంయమీంద్రుని పదముల జాడనరసి
సరళమౌ కథనమ్ము సాగిపోవ, దైవసత్కృప నొందుచు ధన్యుడాయె.
నివాసము. కొండాపూర్. అభినందనలతో, సాహితీ మిత్రుడు
చరవాణి. భాషాప్రవీణ, జొన్నలగడ్డ జయరామ శర్మ..
విశ్రాంతాంధ్రోపాధ్యాయుడు.
మహిత శ్రీసూర్య శ్రీరామమ్.- నవరత్నమాలిక
Inbox
Search for all messages with label Inbox
Remove label Inbox from this conversation
ఓం నమో శ్రీరామాయ.
మహిత శ్రీసూర్య శ్రీరామమ్.
నవరత్నమాలిక.
మిత్రులు శ్రీ పొన్నెకంటి సూర్యనారాయణరావుగారు అకుంఠిత దీక్షతో వాల్మీకి రామాయణమును సర్వజనాహ్లాదకరంగా తెలుఁగు భాషలోనికి సరళమైన శైలిలో అనువదించుట ముదావహము. అవసరమగుచోట కథను కొంచెము వివరించుచు, కథాగమనమును మందగింప చేయునను చోట వర్ణనాదులను తగ్గించి అనువదించి, పండిత పామర రంజకముగానుండుటకై వీరు తీసుకొనిన శ్రమను మనసారా అభినందించుచున్నాను.
ఉ. అక్షయమైన మంగళ సమంచిత నామము రామనామమే
రక్షణ సజ్జనాళికని భ్రాంతిననూదిత మాంధ్ర భాషకున్
మోక్ష మనోజ్ఞ మార్గముగ పూర్తిగ చేసిరి పొన్నెకంటి స
చ్చిక్షణ మానవాళికిది శ్రీకరమీ కమనీయ కావ్యమౌన్.
చ. ఉరుతరమైన సద్గతి ననూదితమైన విధంబు చూడగా
విరిసిన తెల్గు మల్లియ, సువిస్తర వర్ణన లందు సూక్ష్మతన్,
గురుతర భావనాళికి నకుంఠిత భావ ప్రకల్పనంబునన్,
సురుచిర సుందరాన్వయ సుశోభితమీ యనువాదమెన్నగా.
చ. మహితులు, పామరుల్ కనగ మాన్యతనొప్పెడు సౌమ్యమర్గమున్
సహిత ప్రశంసలందఁదగు చక్కని పద్ధతినాంధ్ర భాష స
న్నిహిత మనోభిరామము వినిర్మితి సత్పరివర్తనోద్ధతిన్,
మహితుఁడు చేసె దీనినిసమంచితరీతిని పొన్నెకంటెయే..
మ. నరులై పుట్టిన వారికిన్ దెలియ శ్రీనారాయణుండీ భువిన్
వరమై రామ కథా నిధానమయి సంవర్ధింపగా జేయఁగా
నిరపేయంబుగ రామనామ సుధనే నిత్యంబు గ్రోలంగ నీ
పరతత్వజ్ఞుఁడు పొన్నెకంటి బుధుడే భక్తిన్ తెనింగించెగా.
శా. మోదంబొప్పఁగ జానకీ పరిణయంబున్తెల్గులో నేర్పునన్
శ్రీదంబంచును పొన్నెకంటి మదులం జేరన్ మనోజ్ఞంబుగా
బోధామోదముగాగ వ్రాసిరి మహా పుణ్యంబునే పంచగా!
శ్రీ ధాత్రిన్ వరలున్ శుబాకరముగా శ్రీ సూర్య శ్రీరామమై.
శా. శ్రీరామాకృతి, రామచంద్రుని కృపన్, శ్రీరామ వాఙ్నైపుణిన్,
ధీరోదాత్త మహత్ ప్రవృత్తమును, సు స్నేహార్ద్ర సచ్చిత్తమున్,
పారంపర్య మహోజ్వలత్ప్రకృతమున్ భాస్వంత సౌశీల్యమున్
ధారాపాతముగా కవీంద్రుఁడనువాదంబున్ ప్రసాదించిరే!
శా. రామా రామ యనంగనే దురితముల్ ప్రక్షళనంబై మహ
త్క్షేమంబున్ గలిగించు, నిక్క మనుచున్ దేదీప్య మానంబుగా
శ్రీమద్రామ చరిత్ర సద్రచనతో చిత్తస్థ చాంచల్యమున్
ప్రేమన్ బాపగ చూచి వ్రాసి తెలుఁగున్ తేజంబు చొప్పించిరే!
ఉ. మార్గము రామ పాదములు మాన్యులకంచు పఠించు వారికిన్
స్వర్గ సుఖంబు భూమిపయి శాశ్వితమంచు మనంబు నెంచి యీ
మార్గము నెన్ని సూరకవి మాన్యుఁడు తెల్గున వెల్వరించె దు
ర్మార్గ విదూర మర్గమిది. రామ కథాసుధ గ్రోలుఁడందరున్..
చ. యమి నుత రామ నామ పరమామృత తత్వ వివేక పూర్ణ సం
క్రమిత మనోజ్ఞ భావ పరికల్ప్య మహాంధ్ర కృతానువాద మీ
ప్రముదిత రామ సచ్చరిత. ప్రస్ఫుటమైన యథార్థ గాథ భా
వముననె దీనిఁ గన్న శుభ వర్ధనమౌన్ శ్రిత మంగళంబగున్..
ఆ సీతారాముల చల్లని చూపులు వీరికి ఎల్లప్పుడు అండగా ఉండుగాక.
చింతా రామకృష్ణారావు.
తే. 08 - 6 - 2017.
భాగ్యనగరము.
