వదలకయ్యగురువు పాదములను. ( ఆటవెలదుల శతకము)
బ్రహ్మవిష్ణుభవుల భాసురతేజంబు
మూర్తిగొన్న రూపు పుడమికాపు
గురుపదమ్మె సుమ్ము! గోప్యంబులేదురా
వదలకయ్య గురువు పాదములను.1
దైవముండు చోటు తాజూచి చూపెడు
సత్యధ‌ర్మపరుడు సౌమ్య గురుడు
సకలసుజన హితుడు సౌజన్యమూర్తిరా....వదలకయ్య2
దైవగణముల నిల తనివార పూజింప
గురువు కరుణ యొకటె తెరువుజూపు
ధరణిలోన ముఖ్యదైవంబె తానురా.....వదలకయ్యగురువు3
కాలగమన మెపుడు గమనించవలెనంచు
జ్ఞానబోధ జేసి కథలజెప్పి
మెదడు పదునుబెట్టి మేల్జూపు మేటిరా....వదలకయ్యగురువు4
జలధి పయనమందు చక్కని చుక్కాని;
చేర్చులక్ష్యములను చింతలేక
అట్టి మార్గదర్శి యాచార్యవర్యుడే........వదలకయ్యగురువు5
ప్రథమగురువు తల్లి ప్రతివ్యక్తి కెయ్యెడన్
శిరమువంచి నతులు సేయవలయు
బడిని నడుగుపెట్ట బంధమ్మె గురువగున్.....వదలకయ్యగురువు6
కాయమిచ్చి తల్లి కార్యశూరుని జేయు
జ్ఞానమిచ్చి గురువు కరుణజూపు
వారి ఋణముదీర్చు భక్తిశ్రద్ధలతోడ............వదలకయ్యగురువు7
గురువు దైవమందు గొప్పవారెవరన
దొడ్డ గురుడె యనెను తులసిదాసు
దైవమనగ నెవరొ తాదెల్పు మూర్తిరా......వదలకయ్యగురువు8
మంచిచెడులజెప్పి మానవత్త్వమునేర్పి
కులమతాలకుళ్ళు కూల్చివైచి
మదిని హత్తుకొనెడు మాన్యుండె గురువురా.....వదలకయ్యగురువు9
ఒక్కశిష్యుచేత నోటమిజెందగ
సతము కోరుచుండు సద్గురుండు
భావి జీవితంపు బంగారు దిక్సూచి..........వదలకయ్యగురువు10
ధనపుటాశలేదు దర్పంబులేదులే
వృత్తి ధర్మమనిన విసుగు లేదు
శిష్యవత్సలతను చిరునవ్వుతోజూపు.....వదలకయ్యగురువు11
శిష్యగణము లోన చేతనత్వమునింప
మదిని నమ్మినట్టి మాన్యతముడు
లోకబాంధవుండు లోతైనవ్యక్తిరా.......వదలకయ్యగురువు12
సత్త్వరజముతమము సహజాతమైనను
ప్రథమగుణమె మనకు పదిలమనుచు
శిష్యతతికి జాటు శ్రీరామచంద్రుడే.....వదలకయ్యగురువు13
గతము, నేడు, భావి కాలంబులందున
నేడు ముఖ్యమనుచు నిర్ణయించి
నిజముబల్కు గురుడు నిర్మలాత్ముండెరా....వదలకయ్యగురువు14
శిష్యుచేతివ్రాత చీకాకుగల్పింప
అక్షరంపు సొగసులలరజూపి,
నుదుటి వ్రాత మార్చు విదితవిధాతరా.....వదలకయ్యగురువు15.
గద్యపద్యభక్తి కావ్యంబులనెగాక
దేశభక్తి సంఘ దీప్తి నెల్ల
శిష్యకోటి హృదుల చిందించుఘనుడురా....వదలకయ్యగురువు16
త్యాగగుణమె పరమ ధర్మతత్త్వంబంచు
చరితలన్ని జెప్పు సౌమ్యమూర్తి
కనులముందు నిల్చు కారణజన్ముండు......వదలకయ్యగురువు17
తాను నమ్మినట్టి తర్క వేదాంతాలు
పూర్ణమహిత మనుచు మోదమలర
చాటిచెప్పునట్టి శాస్త్రాలపుట్టరా........వదలకయ్యగురువు18
లలితకళలు నరుని లాలిత్యముంబెంచు
ఫలితమదియొ గొప్ప వరమెయనుచు
వాని నాచరించు వర్ధిష్ణువాతడు........వదలకయ్యగురువు19
శిలను చెక్కి చెక్కి శిల్పంబుగామార్చు
నమరశిల్పి జక్కనార్యుపగిది
శిష్యుల హృదయాల జెక్కుచక్కని శిల్పి.....వదలకయ్యగురువు20
ఆదిగురువు శివుడు హ్లాదానమైమర్చి
నాట్యమాడుచుండ నాటి ఘోష
పరమ వేదమయ్యె పావనభారతిన్.......వదలకయ్యగురువు21
వేదనాద మదియె విస్తృత రూపమై
ధన్యు వ్యాసహృదిని ధరణినిలువ
మహిత గురువు పగిది మాన్యత్వమందెరా.....వదలకయ్యగురువు22
అంధకార సూచి ఆ"గు"కారంబగు
తన్నిరోధమది"రు" తనరుచుండు
అక్షరద్వయమది యజ్ఞాననాశంబు......వదలకయ్యగురువు23
తల్లివోలె ప్రేమ తనియజేయుచునుండు
తండ్రిపగిది కరుణ దారిజూపు
గురువు జ్ఞానియగుట గోప్యమున్ విప్పురా.....వదలకయ్యగురువు24
పాఠశాలె తనకు పావిత్ర్య బంధమ్ము
బాలబాలికాళి బంధుగణము
వారివృద్ధి తనకు వైకుంఠమనునురా.....వదలకయ్యగురువు25
తనదు సౌఖ్యమెపుడు తలపులోనుండదు
పరులసేవ యనిన బరుగులెత్తు
స్వార్ధచింతలేని సౌహార్దశీలిరా.......వదలకయ్యగురువు26
ధనము నాశజూప తలవంచడాతండు
పసిడి కాన్కలీయ పట్టువడడు
సతము మనము జూడ స్వార్ధరాహిత్యమే....వదలకయ్యగురువు27
పాఠ్యవిషయములకె ప్రాధాన్యమీయక
సంఘసేవ కరుణ స్వచ్ఛగుణము
ముఖ్య మంచుదెల్పు పూర్ణ విజ్ఞానిరా........వదలకయ్యగురువు28
శిష్యుడెందమందు చెరగనిదైవమై
స్థిరత నిల్చుమహిని క్షేమకరుడు
గురువునకును నెవరు సరిరారు ధరలోన.....వదలకయ్యగురువు29
శిష్యుచెంతకేగి శిరమును నిమురుచు
కష్టకాలమందు కలసియుండు
మానవోత్తముండు మామంచి గురువురా....వదలకయ్యగురువు30.*
తల్లిదండ్రి మురిసి తనువుప్రసాదింప
గురువు కరుణ జూపి, కొదువలేని
జ్ఞానభిక్ష నిడుచు కలలు నిజముచేయు.....వదలకయ్యగురువు31
తల్లిదండ్రులొసగు ధనమది కరుగును
బంధుగణములిచ్చు పసిడితరుగు
కరుణ గురువులిడెడు జ్ఞానంబునిత్యమౌ.....వదలకయ్యగురువు32
మంత్రికైన ముఖ్యమంత్రికైననుగాని
వైద్యునకును కళలవేత్తకైన
చిన్నతనమునుండి శిష్యత్వమే దిక్కు......వదలకయ్యగురువు33
ఆదిశంకరార్యు డార్షధర్మంబును
కలియుగాన నిల్పె కరుణతోడ
వారివారసుండె వసుధ సద్గురువయ్యె........వదలకయ్యగురువు34
మౌనముద్ర నుండు మహితతేజోరాశి
అత్రిసూతి పరమహంసయైన
దత్త వారసుండు ధన్యుండు గురువురా....వదలకయ్యగురువు35
లౌకికంబు పారలౌకికంబనురెండు
పద్ధతుల గురువులు బరగుచుంద్రు
పారలౌకికమున పరమాత్ముడొక్కడే......వదలకయ్యగురువు36
బ్రహ్మ విష్ణు భవులు బాహ్యరూపములందు
వేరుగ కనిపించు వేరుగాదు
వీరి శక్తులెల్ల తేరిచూడ గురువె.......వదలకయ్యగురువు37.
ప్రకృతి లోన నిశిత పరిశీలనంబున
జీవుల గతులెల్ల చిత్రమగును
వాని జీవనవిధి వరలె గురువుగాను......వదలకయ్యగురువు38
చీమమోయు బరువు సీమనేదాటుచు
రెండుపదుల రెట్లు మెండు శక్తి
అదియె మనకు నెప్పుడాదర్శమౌనుగా.....వదలకయ్యగురువు39
తేనెటీగ పొదుపు తీయనౌ మదుపును
శ్రమయు త్యాగగుణము సంఘటితము
వర్తనాన జూపి వరలెను గురువుగా.........వదలకయ్యగురువు40
వదలనట్టిపట్టు పనివడినేర్పును
నుర్విలోనజీవి ఉడుమనంగ
కార్యసాధనకది ఘనమైనగురువుగా...వదలకయ్యగురువు41*
నంది పట్టుదలను నైతికవిల్వలన్
ఈశుతత్త్వము పరమేశు కరుణ
గుర్తుజేయు మనకు గురువుగా సతతంబు....వదలకయ్యగురువు42
రామసేతు వపుడు రాముని సేవకై
నలుడు కట్టె నాడు నయముగాను
కార్యశూరుడౌచు కనిపించు గురువుగా.....వదలకయ్యగురువు43
సాలెపురుగు స్వీయ శ్రమనంత కరిద్రుంచ
మరల నల్లె భవుని శిరముపైన
పట్టుదలను నేర్పి పనివడి గురువాయె.....వదలకయ్యగురువు44.
ఎదుగుదలను జాటు నెత్తైనశిఖరంబు
గురుపదంబునందు గుణమునందు
సద్గుణనిధి సారసాక్షుని రూపమే...... వదకయ్య గురువు45*
కరము నుండి నాగు శిరమును దూరంగ
భవుని కొఱకు దాని బలిగనిచ్చె
భక్తితత్త్వమునను భాసిలె గురువుగా.....వదలకయ్యగురువు46
వృక్ష జాతి మనకు వేవేల రీతుల
పాఠములను జెప్పె పచ్చి నిజము
గురువు స్ధానమందు గొప్పగనిల్చెగా ......వదలకయ్యగురువు47
సర్వజీవులకును శ్వాసకు మూలమై
ప్రాణవాయువు నిడు వసుమతిజము
యోగగురువు పగిది నుత్సాహమింపార....వదలకయ్యగురువు48*
కడలి యలల జూచి కార్యశూరత్వంబు
నేర్వవలయు సతము నిష్ఠతోడ
నాచరించి చూపు నార్యుండె గురువగు....వదలకయ్యగురువు49
గునపములను దింపు క్రూరాత్ముకైనను
పరమకరుణతోడ ఫలితమిచ్చు
పుడమి గురువనంగ మోదంబుగల్గదా....వదలకయ్యగురువు50*
పాత్ర ననుసరించి పరిణామముంజెందు
లౌకికంబు జూపు లక్షణంబు
నేర్పె, జలము మనకు నిర్మల గురువౌను....వదలకయ్యగురువు51
అగ్ని శక్తిజూడ నసమానమై తోచు
జలధిని బడబాగ్ని కలచివైచు
కానరాని ప్రతిభ గౌరవ గురువుదే.... వదలకయ్యగురువు52
గాలి వలన సతము క్రమమైనరీతిగా
ప్రాణి యనుభవించి బ్రతుకుచుండు
శ్వాసజీవమైన చక్కని గురువయ్యె........ వదలకయ్యగురువు53
నభము శూన్యమైన నక్షత్రదీప్తంబు
సర్వముండి తాను గర్వపడదు
జ్ఞానధనుడు సతము గౌరవ గురువౌను.....వదలకయ్యగురువు54
ఎదుటనున్న గాని ఎదుట లేకనుగాని
జ్ఞానమిచ్చువాడు ఘనగురుండు
ఉత్తముండు ధర మహోన్నతుండు కనగ.....వదలకయ్యగురువు55
ఏకలవ్యు డొకడహీన సమాసక్తి
శస్త్రవిద్య నేర్చె స్వయముగాను
మనసునందె ద్రోణు మరిమరి పూజించి.....వదలకయ్యగురువు56
గురువు గొప్పదనము కులమందు లేదురా
శిష్యహృదయసీమ చేర; పొందు
కులము మతములన్ని గొప్పకు మాత్రమే....వదలకయ్యగురువు57
తండ్రి తనయుగోరు తనుమించు వానిగా
గురువు శిష్యు గోరు గొప్పగాను
స్వార్థ బుద్ధిలేని సౌమనస్యుడతండు..........వదలకయ్యగురువు58
ముక్తిగోరు నరుడు ముందు సద్గువును
నెంచుకొనగవలయు నిచ్ఛతోడ
ఆత్మతత్త్వమంత నాతడే చూపురా.........వదలకయ్యగురువు59
గురునిచెంత నేర్వ గొప్ప విద్యేయగు
గురువు లేని విద్య గ్రుడ్డివిద్య
జీవితాన గురువు శ్రీరామ రక్షరా...........వదలకయ్యగురువు60*
అక్షరంబునేర్ప శిక్షణాలయమందు
కఠినమైనగుణము కనగజేయు
గురువు మనసునందు కోపంబు నటనరా....వదలకయ్యగురువు61
అక్షరాలలోని అంతరార్ధములన్ని
విప్పిచెప్పు గురువు వేదవేత్త
శిష్యవత్సలుండు శ్రేయోభిలాషిరా...... వదలకయ్యగురువు62
లక్షలెన్ని యిచ్చి లౌక్యంబుజూపినా
గురుని కరుణ నీకు కుదురబోదు
భక్తి భావమొకటె భవ్యమంత్రమ్మురా........వదలకయ్యగురువు63
శిష్యవత్సలునిగ క్షేమంకరునిగాగ
మార్గదర్శకత్వ మౌనియనగ
భిన్న వేషధారి భేషైన నటుడురా...........వదలకయ్యగురువు64
మైనమట్లు కరగి మమత సమతలంచు
కరుణనింపుకొన్న కాంతిరేఖ
దివ్య సాధుభావ దీప్తుండు గురువురా...........వదలకయ్యగురువు65
చిత్తమందు ప్రేమ చిగురించు రీతిగా
విత్తనంబునాటు విబుధుడైన
కర్షకుండు గురువు హర్షాంతరంగుండు.......వదలకయ్యగురువు66
చేతి వ్రాత మరియు చిత్తంబుమార్చుచు
చిన్ని గుండె లందు చిగురుదొడుగ
జ్ఞానభిక్ష నిడెడు సౌమ్యుండు గురువురా........వదలకయ్యగురువు67
భావిజీవితంబు బంగరుబాటగా
చూడవలదటంచు సూక్తులిడుచు
ముందుచూపు నేర్పు మునిరూపు గురువురా....వదలకయ్యగురువు68
కాలచక్రమందు కరిగినక్షణములు
రావురావటంచు రక్తిదనర
శక్తి కొలదిజెప్పు శాస్తయె గురువురా........వదలకయ్యగురువు69
మహిత లక్ష్యములనె మరిమరి కోరుచు
కలలు గనుచు నీవు కాంచుమనుచు
లక్ష్యసిద్ధిజూపు లౌక్యండు గురువురా........వదలకయ్యగురువు70*
ఈసడించి పలికి యిందీవరాక్షుండు
గురుని శాపమొందె ఘోరముగను
కన్నుగానకెపుడు కలహింపబోకురా......వదలకయ్యగురువు71
గురుని మోసగించి కుపితుని జేయకు
కర్ణుడట్లుజేసి కఠినశాప
మందె; విద్యమరచి యవమానితుండయ్యె.......వదలకయ్యగురువు72
అర్జునుండు పొందె నద్వితీయపుటస్త్ర
విద్యలన్ని భక్తి వినయగరిమ
గురువుద్రోణుమదిని కోర్కెల దీర్చెను....వదలకయ్యగురువు73
కన్నవారికన్న మిన్నగా జూచును
మనసునిండ ప్రేమ మమతపండ
విశ్వమెల్ల గెల్చు విద్యనేర్పు గురుండు.......వదలకయ్యగురువు74
పారితోషికంబు పనిలేదు నాకని
పట్టుదలకె గురువు పరవశించి
అక్షరంబు నేర్పు నల్పసంతోషిరా.......వదలకయ్యగురువు75
పాఠములనెకాక పరిపరి విధముల
అనుభవాలసార మందజేయు
సాంద్రయశుడు గురుడు సాగిలిమ్రొక్కుమా ..వదలకయ్యగురువు76
కష్టమన్న జాలు కరుణాంతరంగుడై
పేదవారికెపుడు పెన్నిధియగు
సంఘసేవకుండు సాక్షాత్తు గురువురా.......వదలకయ్యగురువు77
బ్రహ్మ పగిది నూత్న పథమును సృష్టించు
విష్ణువు వలె దాని విపులపరచు
శివునిరీతి దొసగు చిదుముచుండు గురువు..వదలకయ్యగురువు78
చిక్కుప్రశ్నలెన్ని చిన్నారి వేసినన్
తృప్తిపరచు మదికి తీయగాను
జ్ఞాని ప్రశ్నవేయ జ్ఞానియై వర్తించు........వదలకయ్యగురువు79
విద్య నేర్పు ననువు వేర్వేరు విధముల
పాఠశాల గదిని వాడుకొనెడి
సున్నితత్త్వమున్నశోధకుడుగురువు.....వదలకయ్యగురువు80.*
పాదరసము వంటి ప్రతిభను సతతంబు
దాచుకొనక గురువు తపసివోలె
ప్రేమనంత పంచు ప్రియశిష్యపాళికే.........వదలకయ్యగురువు81
శిష్యగణము గలసి శ్రీగురుభక్తిమై
సర్వెపల్లిరథము సంతసాన
లాగి పరవశించె యోగంబుతమదిగా......వదలకయ్యగురువు82
కాళికాంబపాద కమలార్చనావిధిన్
రామకృష్ణ గురుడు రహినివెలిగి
నవ్యతేజమిడెను భవ్యనరేంద్రకున్...........వదలకయ్యగురువు83
రాగదూరుడైన రామకృష్ణునిజూచి
పిచ్చి వాడెయనిరి పచ్చిగాను
పరమహంసగురువు భావివిజ్ఞానిరా..........వదలకయ్యగురువు84
పుణ్యజలముజేయు బురదనీటినిగూడ
చిల్లగింజదాని చెడునువిరచి
అట్టితత్త్వమెప్పుడాచార్యునకునుండు.........వదలకయ్యగురువు85
కల్మషంబులున్న కటికనీటినిగూడ
పటిక మార్చివేయు స్వచ్ఛముగను
పటికవంటివాడె పరమ గురుండురా!.............వదలకయ్యగురువు86
చిత్తమెపుడు తనదు శిష్యునిపైనుంచి
తలచిన వెనువెంట పలుకువాడు
తలపు తలపునందు తానైనతండ్రిరా...........వదలకయ్యగురువు87
శిష్యుడెప్పుడైన చీకాకుజెందుచు
గురుని నిందసేయు గుఱ్ఱుగాను
కనలిన తన శిష్యు కౌగిలిజేర్చురా..................వదలకయ్యగురువు88
ఇనుమువంటిశిష్యు డెక్కడున్ననుగాని
కర్షణంబుజేసి కౌగిలించు
శుద్ధసత్త్వగురువు సూదంటురాయిరా..............వదలకయ్యగురువు89
డాంబికంబులేదు డాబునులేదులే
ధిషణ యొక్కటున్న తృప్తిపడును
ధిషణగల్గు గురువు దీపస్వరూపుండు.............వదలకయ్యగురువు90*
శ్రుతియె మహిత గురుడు శుద్ధ సంస్కృతి నిల్ప
భరతదేశమందు పండితులకు
పరమపూజ్యమదియె పాటించు జ్ఞానివై..వదలకయ్యగురువు91
గ్రహ సమూహమునకు రవియె రాజైనట్లు
కాలగతిని శిష్యగణమునకును
క్రాంతిదాత గురుడు ఘనమైనశక్తిరా...వదలకయ్యగురువు92
బుద్ధి గురువు పగిది పుట్టించుయోచనల్
మనసు దానిత్రోవ మసలుకొనును
ఆత్మశుద్ధి గల్గు నయ్యదె గొప్పదౌ......వదలకయ్యగురువు93
ఆర్ధశాస్త్ర నిపుణుడాత్మీయ గురువైన
శ్రీలుగురిసి మురియు శిష్యులెల్ల
కామధేనువింట కాలూనినట్లెగా..........వదలకయ్యగురువు94
మూడుకన్నులున్న ముక్కంటి కాదులే
నాల్గుమోములున్న నలువకాదు
వేయిశిరములున్న విష్ణుతల్పంబురా....వదలకయ్యగురువు95
కావ్యపరిమళాలు కమ్మగవీచినన్
రససమన్వయంబు రక్తిగొన్న
ఖ్యాతిదెచ్చుదాని కావ్యాత్మ గురువుగా..వదలకయ్యగురువు96
పాలునీరు వేరుపరచంగ శక్తిని
హంస కలిగియుండు నవనియందు
మరలనట్టి ప్రతిభ గురునకే కలదోయి.....వదలకయ్యగురువు97
కలిమహత్తుచేత మలినమ్ము గాకుండ
ప్రజలగాచుచుండు పరమ గురువు
పూజ్యపాదుడతడు పుణ్యాలరాశిరా....వదలకయ్యగురువు98
శోకసంద్రమందు సోలినశిష్యుల
గుండెధైర్యమింత కూడగట్టు
కోటగోడపగిది గురువు రక్షణనిచ్చు.. వదలకయ్యగురువు99
సహనగుణముజూడ సరితూగు గురువుగ
ధర్మజుండు దాని తప్పలేదు
కష్టమెంతయైన కౌరవసభలోన....వదలకయ్యగురువు100*
కన్నుదోయి లోని కమనీయమైనట్టి
కాంతిరేఖ గురువు కనగనిజము
కాంతిలేని కనులు కడుదుర్భరంబురా........ వదలకయ్య గురువు.101
కన్నులెఱ్ఱజేసి క్రౌర్యంబుజూపుచు
ఆ "కరోన" మనల నావహింప
వైద్యులెల్లమనకు వరదాయిగురువులే............వదలకయ్యగురువు102
అంతరిక్షశాస్త్రమాపోశనముబట్టి
రాష్ట్రపతిగజేసి రాణకెక్కె
అమరగురుడు ప్రియతమాబ్దుల్కలాముండు..వదలకయ్యగురువు103
నీ కుశాగ్రబుద్ధి నిర్మలాత్మ నియతి
గురుకటాక్ష భిక్ష మరువబోకు
జన్మజన్మలకును జాగృతి గురువురా............వదలకయ్యగురువు104
మోక్ష సాధనకిల సాక్షియే గురువయి
నీదు మతిని నిల్పు నిశ్చలగతి
నీకె నిన్నుజూపి నివ్వెరపరచురా...............వదలకయ్యగురువు105
నూరు మార్గములను తీరుగ జూపించు
దివ్యతేజకలిత భవ్యగురువు
నవ్యభావయుతుడు నవనవోన్మేషుండు........వదలకయ్యగురువు106
కన్నుదోయి కరుణ కలిగియుండెడువాడు
గుండెనిండ ప్రేమ కురియువాడు
స్వార్ధరహితజీవి స్వాభిమానుండురా..........వదలకయ్యగురువు107
నీదుగుండెగుడిని నిర్మలాత్ముగురువు
నీరజాక్షుపగిది నిల్పుకొనుము
సద్యశంబు సిరులు సౌఖ్యాలుదక్కులే...........వదలకయ్యగురువు108
ఆర్యభట్టు భారతావనియందున
శూన్యమునకు తగిన మాన్యతనిడి
విశ్వమందువెల్గె విఖ్యాత గురువుగా............వదలకయ్య గురువు.109
కంప్యుటరున ముఖ్య గణనంపుకేంద్రమై
శూన్యమొకటి వెల్గె సుందరముగ
అది గురువయి దానికంతరాత్మగమారె......వదలకయ్య గురువు110
వివిధ దేశములకు విజ్ఞానదాతలౌ
జ్ఞానవిదులగన్న కర్మభూమి
నాటిగొప్పగురువు నాగార్జునుండెగా........ వదలకయ్య గురువు 111
రామునంతవాని రఘుకులశూరుగ
కనగజేసె నాడు కౌశికుండు
గుట్టుమట్లు తెల్పు గురుదేవుడాతండె........ వదలకయ్య గురువు 112
విక్రమార్క సభను విఖ్యాతి జెందిన
సుందరోపమాన సుకృతి యైన
కాళిదాసు మనకు కవికులగురువురా......... వదలకయ్య గురువు 11౩
అంకెలాకసమున నసమాన చంద్రుడై
అవని వెల్గిన గణితావధాని
సకలజగతి గురుడు సంజీవరాయడే....... వదలకయ్యగురువు 114
(లక్కోజు సంజీవరాయశర్మ.పుట్టంధుడు. కడప జిల్లా కల్లూరు.22.11. 1907.. 2.12.1997. ప్రపంచంలో 6 వేల గణితావధానాలు చేసిన
ఏకైక వ్యక్తి.)
బ్రహ్మగుప్తనామ భారతీయగణిత
శాస్త్రవేత్త మనకు సద్గురుండు
" పెల్"సమీకరణము పేర కీర్తి బడసె..... వదలకయ్యగురువు.115
(గణితశాస్త్రంలో సమీకరణ సాధన..డయోఫాంటైన్ సమీకరణాలలో ఒక ప్రత్యేకమైన తరగతి. బ్రహ్మగుప్తుడు సా.శ.628.సమాస పద్ధతిని సాధించాడు.
చక్రవాళ మనెడు చక్కని పద్ధతిన్
గణితమందు జూపె ఘనుడు భాస్క
రుండు సారతర గురుండమల యశుండు.. వదలకయ్యగురువు116.
(భాస్కరాచార్యుడు.సా.శ.1150.చక్రవాళ పద్ధతిని సూచించారు.
ఆధునికకాలంలో ఈ సమీకరణాల సాధనకు "సతతభిన్నవాదము"ను
వాడుతారు.)
బేతవోలు గురుని ప్రియతమ సూచనన్
ఆటవెలది పాదమందుకొనుచు
శతకమల్లినాను శక్త్యనుసారంబు............ వదలలేదు గురువు .117
అంకితంబు శతకమాచార్యవర్యుకున్
పాదపూజ ప్రథిత పండితునకు
నర్పణంబు మదిని ఆత్మీయగురువుకున్....వదలలేదు గురువు118.
