మేరికపూడి..కల్నల్ స్మృత్యంజలులు.

మేరికపూడి సీతాపతిరావు నకు నా స్మృత్యంజలి.
        పొన్నెకంటి సూర్యనారాయణ రావు. 2.07.2020.

      భాషణమాడెనా సరసభావము చిప్పిలి బంధమైచనున్
      దూషణ జేయుచున్ పరులతూలడు మేరికపూడి నాముడున్
      వేషమునన్సదా పరమవిజ్ఞతజూపెడు నాదుమిత్రు నే
      దోషము కాటువేసినదొ దూరమెయాయెను శాశ్వతంబుగన్.
  సీ : సంస్కృత భారత సారంబుగ్రహియించి

                        పంచిపెట్టిన యట్టి పండితుండు
      ఆంగ్లభాషనగల యద్వితీయప్రభల్
                        భావాన్సు జర్నల్ను బాగచదివి
      ఆధ్యాత్మిక విషయికానందమందుచు
                     మాధుర్యధుర్యుడౌ మౌనియతడు
      మితభాషణంబున స్మితవదనంబునన్
                    చణుకులు విసిరెడు జాణయతడు
 ఆ.వె:మిగుల సన్నిహితుడు మేరికపూడి శు
         భచరితుండు పరమపావనుండు
         సుగతి జెందుగాత! సుశ్లోకునకునేను
         నంజలింతు సతము నంతరాత్మ.

కల్నల్ సంతోషబాబుకు బాష్పాంజలి.
 చైనా దుశ్చర్యలపై మన వీరసైనికులకు, జాతికి స్ఫూర్తితో
          పద్యాల సమర్పణ...17.06.2020.
             చోక్షము=సమర్ధము,పరిశుద్ధము, మనోజ్ఞము.తీక్ష్ణము

         సీ:  కల్నలు సంతోషు కనరాడు మనకింక
                            తారయై గగనాన జేరెనతడు
               శరభమై చెలరేగి చైనాను చీల్చిన
                       సంతోషునాత్మకు శాంతియగుత!
               సిగ్గునెగ్గునులేక చీవాట్లు దినుచున్న
                           చైనాను చెప్పుల చఱచవలయు
               వీరసైనికులార! లేరుమీ సరిసాటి
                          చూపుడో శౌర్యంబు చోక్షముగను
               శాంతంబె వీరమై  సహనంబె క్రోధమై
                          భరతవీరుల శక్తి పడగవిప్ప
               చైనాకు నిరతంబు స్వప్నంబునందున
                       ఫూత్కార శబ్దముల్మ్రోగవలయు
               భారతావనిముట్ట ప్రాణాంతకంబంచు
                        కలతనిదురనైన తలపవలయు
               అరివీర శిరముల నవలీల ద్రుంచిన
                        బోస్భగత్సింగుల  భూమిమనది
          ఆ.వె. ధైర్యసాహసాలు ధర్మ శాంతంబులు
                   భరతమాత సొత్తు తరచిచూడ
                   శాంతికాముకులను సమరానదింపిన
                   సర్వనాశనంబె శత్రువులకు.

 గీతాచార్యునిగా సుప్రసిద్ధులైన బాపుగారికి అస్రుతాంజలి   ఘటిస్తూ, వారి కుటుంబ సభ్యులందరికీ నా ప్రగాఢ సానుభూతి తెలియ జేస్తున్నాను. బొమ్మలు చేసే బ్రహ్మ తను కొంత సేపు అపుడపుడు విశ్రాంతి తీసుకోవచ్చని రమ్మన్నాడో , లేక స్నేహ బంధం వలన ఒంటరిగా స్వర్గంలో తోచక రమణ గారు రమ్మన్నారో  మాటలు తక్కువ , చేతలెక్కువ కలవాడు కనుక ఎవరి మాట మన్నిన్చాడో  .
 మనకు విషాదం మిగిల్చి వారికి ఆనందం పంచారు.  31.08.14.న  (దివంగతులు )     .

చిత్రానికి స్పందన.(కృష్ణస్వామి.)

                   చిత్రానికి భావన.

   సీ.. భూదేవిస్పర్శ చే మోదమానసుడయి
                   ఆది వరాహరూపమరె నిచట.
          కౌమోదకీ గద ఘన సుదర్శనమది
                    పాంచజన్యంబులు పాణులమరె
          పాతాళమందలి పన్నగంబుల జంట
                     పాదమ్ములందున వరలె చూడ
          ఛత్రంబు శిరముపై చక్కగనుండెను
                      నెండతగులకుండ మెండుగాను.
   తే.గీ: ప్రభలు విరజిమ్ము సర్వమ్ము ప్రముఖ శిల్ప
            కళను చూచినంతనె మన కనులు చెదరు
            విష్ణుమూర్తి యె యీరూపు వెలసెననగ
            చెక్కె మేధావి రాతిని చేవదనర.ఫ

                గోవులపై బాలగోపాలుడు.
     సీ: దక్షిణ హస్తాన తనకిష్టమౌ లడ్డు
                   వామహస్తమునందు వరలెగోవు
          పాదాబ్జముల చెంత పరమ హంసయొకండు
                     మోమున కస్తూరి మోదమలర
          పీతాంబరంబును ప్రియమార ధరియించి
                      చిలిపి చూపుల నొప్పు చిన్ని కృష్ణ
          కంఠాన మౌక్తిక కమనీయ హారాన
                ముద్దుగొల్పుచునుండు మోహనుండు

    ఆ.వె:  శిరము పైన నుండి చిరునవ్వు తోడను
             నీదు నాదు హృదిని నిండినాడు
             మోక్షదాయి యతడు మోకరిల్లు సతము
             దుష్టపాప చయము తొలగిపోవు.

       

          పై చిత్రానికి నా స్పందన.( వానరము ...సింగము )
         కఱ్ఱయొకటె కలదు బుర్రలేదెక్కడ
         నిదురపోవు హరిని కదుపనేల?
         కానిపనులు నిన్ను కష్టాలపాల్జేయు
         వద్దు మాటవినుమ వానరంబ!..1.

       నీదుబలముతెలిసి నేర్పునమెలగుమ
         సాహసంబు వలదు శక్తిమించి
         నిద్రపోవుహరిని నీవేల కొట్టెదు
         కోతిపనులు సతము కొంపముంచు...2.

         వానరంబు నీవు వన్యమునకురేడు
         సింగమదియ నిన్ను చీల్చివేయు
         కోతిపనులవేల?కుదురుగనుండక
         హరిని జేరగలవు హరినిగొట్ట...      3.

       శివునిపై సంపూర్ణ చంద్రబింబము.

         పూర్ణచంద్రుండు శిరముపై పూవుకాగ
         లీల మౌనముద్రితుడయి హేలనుండ
         జగతి నోంకారశబ్దంబె శరణమనగ
         నాసనాశీనుడైయున్న నాత్మభవుని

         మసనమే నివాసంబుగ మసలువాని
         తరలివచ్చిన గంగను దాచినట్టి
         శక్తి హృదయ సంవర్తు నాసక్తితోడ
         గొల్తు భూతిప్రసాదంబు కొఱకు నేను.

            పై చిత్రమునకు..నా భావన.
         
         ఎన్నిమారులు చెప్పను కన్ననీకు
         బువ్వతినుమని హాయిగా బొజ్జనిండ
         స్వచ్ఛ గోక్షీర శర్కర సారమిదియ
         మాత గోరుముద్ద లెపుడు మధురతరము.

            సైకిల్.. బామ్మ..చిత్రానికి నా స్పందన.

    సీ:  పదులారు నిండియు పచ్చికమోపుతో
                           సైకిలు నడిపించు జాణయీమె
         భూమిని నమ్ముచు మోదానకృషిసల్పి
                   ముక్కారు పండించుముదితయీమె
         కండ్లకు నొకజోడు కాళ్ళకు సరిజోడు
                                చీరసోకదిలేని నారియీమె
         ఒంటరయ్యును మహోన్నత మూర్తియై తానె
                     యాదర్శముంజూపు నతివయీమె
   ఆ.వె: పచ్చగడ్డిమోపు పరమాద్భుతంబుగ
            వాహనంబు పైన సాహసాన
            నుంచి నడపు బామ్మ యుండునాయెచటైన
            భరతసీమగాక తరచిచూడ.

      సమస్య....

   బిరుదులు పొందువారె కడు విజ్ఞులు సత్కవులౌ తెనుంగునన్.

   

   సరసత నుత్తమోత్తమ రసాంచిత భావవిశేష ప్రౌఢిమల్

   వరమగుపద్యధారలును వాసిని బెంచునలంకృతుల్ విభా

   సుర పదగుంభముల్ సుకవి శూరుల మెప్పుల సత్సభాళినిన్

   బిరుదులు పొందువారె కడు విజ్ఞులు సత్కవులౌ తెనుంగునన్.

              రైతు చిత్రం....స్పందన..

          

           పారను చేతబట్టుకొని పైరుల నిత్యము సాగుచేసి-యొ

           ప్పారెడు త్యాగజీవివయి పంటల నెప్పుడుపండజేయు-సం

           స్కారపు ధన్యమూర్తి! భువి చక్కని భోజన మెక్కడోయి-శ్రీ

           కారము దుక్కిదున్నకయు కల్పులు దీయక మిన్నకుండినన్.

      రైతు.. బండి..చిత్రమునకు స్పందన.

             ధాన్య లక్ష్మియు గృహలక్ష్మి దర్పమెలర

             బండి నెక్కిరి సతతంబు భద్రమనుచు

             పంట నింటికి జేరిచి ప్రాభవముగ

             రహిని గల్గింతు ననియెను రైతుబిడ్డ.

             "నిర్మలు"నగరు కళలకు నిలయమెపుడు

             వడ్ల బస్తాలు మూటికి నెడ్లబండి

             కట్టి సాగించు సతితోన కౌలురైతు

             ముందు పగ్గాలు పట్టుచు మోదమలర.

              స్వర్ణ పుష్పాలజెక్కెడు సౌరుగల్గు

              హస్తకళలకు ప్రాభవమంతరింప

              బ్రతుకు దెరువులు వేరుగ వెతుకలేక

              "నిర్మలు"కళల రాజు కన్నీరుగార్చె.

       పై చిత్రమునకు నా స్పందన.(పడవపై తండ్రి,కొడుకు)

       గంగపుత్రుల జీవన గతులుజూడ

       వనము బోటులు చేపల వలలతోనె

       సాగుచుండును నెప్డు సంసారమందు

       మీనసంపదె వారికి మేలుగూర్చు.

          పైచిత్రానికి పద్యరూపం ..

              చిత్రమునకు నా భావన.

             ఏన్గు ముఖంబును నెంచక్క నతికించి

                         బ్రతికించియుంటను పరమతేజ!

              నీరజములనిన నీరములన నీకు 

                        నానందమొదవును నాఖువాహ!

             నాకేమొ భయమయ్య నామీద చల్లకు

                         తొండంబు పూరించి స్థూలదేహ!

              చిన్నవాడనునేను చేతులు జోడింతు

                        విడిచిపెట్టుమునన్ను విఘ్నరాజ!  

              పెద్దవాడవీవు ప్రియమైన యన్నవు

              నాదు మాట వినుము నయముగాను

              నాన్నకిష్టమయ్య నవ్యాభిషేకాలు

              చేసికొందమనఘ!చిత్తమలర.   

                     మామ..కరణం శేషగిరి రావు.

సీ :   అమ్మ సృష్టివి నీవు - అయ్య పోలిక , గజ 

              ముఖ చర్మములు మీకు ముద్దుగొలుపు

       అయ్య తేజము నేను - అమ్మ పోలిక, శక్తి 

                         అయ్యది,యరుదగునమ్మ దీప్తి ;

       ఆడుచున్నాము పెద్దమ్మ యొడిని జేరి 

                        కడుచిత్రమౌ గాదె కననిది మరి !

       ఆఖువాహనమును నద్భుత "శక్తి"యు 

                         నాకులఁ దేలగా నందమదియు 

తే.గీ : నెమలిపై నేను విహరింప నెమలి కన్ను

          నీదు తలనెక్కి కూర్చుండె నెయ్యమునను

          మన కుటుంబము ౙూచి యీ మానవులును

          బ్రతుక గలిగిన భూమియే స్వర్గమగును..!

        వినాయకుని వీడ్కోలు..స్పందన.

       కనగ నెచటైన నాన్లైను క్లాసులుండు

       వీడియోలనె పాఠాల వీక్షణంబు 

       నేను వత్తును తాతయ్య నీదువెంట

       స్నేహమయ్యెను హాయిగా చిన్నియెలుక.

              పై చిత్రమునకు నాస్పందన.

  

          కాడి కవ్వము కదురులు కలసిమెలసి

          పల్లెలందున సిరులను పంచెనాడు

          నేటి జీవన సరళిని నెమకి చూడ..,

          అర్ధమెరుగక నవియెల్ల వ్యర్ధమనును.

              పై చిత్రమునకు ..(ఆవుదూడ...స్వరూపానంద)నాస్పందన.

        వత్సమా! యిర్వురమొకటె వసుధయందు

        పూర్వజన్మాన నేనును ముగ్ధమోహ

        నాకృతిన్ గోవునైతి మహాత్ము కరుణ.

        "ఆత్మ వత్సర్వ భూతాని" యనెడురీతి

         హత్తుకొందును నామది హ్లాదమంద.

            

        నీకు వలయును క్షీరంబు నిన్ననేడు

        నాకువలయును లలితాంబ నవ్యభవ్య

        దివ్య కరుణరసాంచిత దీవనలును

        మాతృ కృపచేత మనకెప్డు మన్ననగును.

   సింహమపై వెళ్ళు పార్వతి,  చిత్రమునకు నా స్పందన...

  సీ: అగ్రభాగమునందు నాఖువాహనుడుండ

                     కార్తికేయుడువెన్క కదలుచుండ

       కేకి కొమ్మపయిన క్రిందమూషికరాజు

                      ఘూకంబునొకవైపు కొలువుదీర

       కమలవాసిని చేత కమలంబు పైకెత్త

                   హంసవాహిని వీణ హాయిమ్రోయ

        కనులవిందగుచుండ కైలాస గిరివైపు

                    కురులు విరబోసి కూరుచుండి

   తే.గీ:  సింహవాహిని జగదంబ చిద్విలాసి

            భువనములనేలు ముక్కంటి ముద్దుగుమ్మ

            సాగుచుండెను వనమున సంతసాన

            మనల రక్షించు నిరతంబు మమతతోడ.!

    చిన్ని పాప, చేట...చిత్రమునకు నా భావన..

     చెరుగ బియ్యము కొన్నిటి చిట్టితల్లి

     చిత్రము సగము మిగిలెను చేటయందు

      పనిని జేసెడు యత్నంబు భావినీకు

      యశము గూర్చును సతతంబు హ్లాదమిచ్చు.

   పై శ్రీకృష్ణ చిత్రమునకు నా ఉత్పలమాల.

        ఒక్కరి లాస్యమంత్రము మరొక్కరి హాస్యము కొంటెచేష్టలున్
        టక్కరిచూపులన్వలల ఠక్కునలాగెడు గోపికామణుల్
        అక్కజమొందురీతి యమునమ్మయె మోదవినోదమందగా
       చిక్కెను చిక్కెనో యనగ చిన్మయరూపుడు దక్కెవారికిన్.

 పై చిలిపి వలపు చిత్రానికి నా స్పందన.

        మల్లె పూలతోడ మరులనుగొల్పుచు
        పెదవి పంటనొక్కి ప్రేమజూపి
        చిలిపి వలపు విసిర, చెంతచేరకయున్నె
        షండుడైనగాని సంతసాన!

 పై శ్రీకృష్ణ చిత్రమునకు నా ఉత్పలమాల.

        ఒక్కరి లాస్యమంత్రము మరొక్కరి హాస్యము కొంటెచేష్టలున్
        టక్కరిచూపులన్వలల ఠక్కునలాగెడు గోపికామణుల్
        అక్కజమొందురీతి యమునమ్మయె మోదవినోదమందగా
       చిక్కెను చిక్కెనో యనగ చిన్మయరూపుడు దక్కెవారికిన్.

చిత్రమునకు స్పందన.

  చిలిపి చూపుల చిన్నది చీరగట్టి

  బుట్టనిండుగ మల్లియ పూలునింపి

  ఎదురు చూపుల మున్గిన దెవరికొఱకొ?

  కన్నెమనమును దోచిన కాముడెవడొ?

సమస్య: తద్దినమ్మన శుభమని తరుణి మురిసె. 

పెండ్లి యైనట్టి క్రొత్తల ప్రేమతోడి

సరసవచనాల ఘటనల చనవుతోడ

గుర్తుచేయుచు నవ్వుచు భర్తపలుక

తద్దినమ్మన; శుభమని తరుణి మురిసె. 

కృష్ణ స్వామి స్ గ్రామ చిత్రానికి స్పందన.

సీసము 

తల్లారమందున తనలేత కిరణాల 

         కబురులాడగవచ్చు కర్మసాక్షి 

పచ్చదనములిల పరచుచు గ్రామాన 

         నుత్సాహమందించునుద్భిజాళి 

ఎటువైపుజూచిన నెఱ్ఱని మట్టితో 

         కనువిందు గలిగించు కాలిబాట 

ఆలయంబులిచటహ్లాదంబు జేకూర్చ 

         ఆధ్యాత్మ శోభల నందగించె 

తేటగీతి 

ప్రకృతి సౌందర్య మిచ్చోట పరిఢవిల్ల 

మీదు కుంచియ కదలాడె మించు గరిమ 

కృష్ణసామిరో ! మనసున తృష్ణదీర 

దెంత పొగడిన చిత్రంబు ధీవిశాలి ! 

---✍--పొన్నెకంటి సూర్యనారాయణరావు .

        తేది -- 10 -- 12 --- 2017

 

        

            

     

తెలంగాణ. స్పందన.

పద్యాలతోరణం..2.06.2020.
          తెలంగాణ ఆవిర్భావ దినోత్సవం.
           నా స్పందన..మీపొన్నెకంటి.

          తూర్పుకొండల జీల్చి సందోహమెలర
          బాలభానుని పగిది సంభ్రమముగూర్ప
          ఘనము గాదెచ్చె నవ తెలంగాణ మనగ
          చంద్రశేఖరుడనియెడు సారయశుడు.

          మనసు మెదలిన భావాల మధురగరిమ
          పాట రూపాన మలచుచు పరవశించి
          నృత్య భంగిమల్ వెలయింత్రు కృష్ణుపగిది
          కవులు  గాయకతతికి మా గాణమిదియ.
         

శివతాండవం.

పద్యాలతోరణం... నేటివర్ణనాంశం..శివతాండవం.
     ..31.05.2020.

    సీ: శిరసుపై గంగమ్మ గిరగిరా తిరుగంగ
                 జూటంబుకదలాడె చోద్యమలర
         ఆకాశమేతన హద్దంచు చెలరేగ
              ఆఢమరుకమనె "నయివుణంచు"
         నాట్యభంగిమలందు నవరసాలొలికింప
                  పట్టుదప్పుచునుండె పన్నగాళి
         తకిటతోం తకిటతోం తకటతద్థిమి యంచు
                   తనువెల్ల పులకించె తాళగతుల
          పదగతుల్ శ్రుతిమించి ప్రళయభావముగూర్ప
                    కైలాస గిరియెల్ల కంపమందె
          ఒకచెంప గణపయ్య యొకపజ్జ గౌరమ్మ
                     పరవశంబునుబొంది పైకి జూడ
         ఇంద్రాది సురలు మునీంద్రాది ముఖ్యులే
                    శివతాండవంబంచు శిరమువంచ
         పదునాల్గులోకాలు పారవశ్యమునంద
                      ఆత్మావలోకియై యాడెనమ్మ!
  తే.గీ:  ఆదివారము నట్టింట హర్షమొదవ
            తాండవంబును గాంచుట ధన్యతమము
            తోరణంబున కవివరుల్ తుష్టిజెంద
            పరమ మాహేశుడిచ్చుత!వరములెల్ల.
                      శుభంభూయాత్!!!

         శివ కేశముల చిత్రమునకు..నా స్పందన.

         స్వర్ణ మయమైన మకుటంబు సాధుసాధు
         జూటముండిన నదియును శుభముశుభము
         వేషములలోనె భేదాలు వింతలన్ని
         లోకశంకరులెకద ముల్లోకములకు.

         

నిషిద్ధాక్షరి..

     పద్యాలతోరణం... నిషిద్ధాక్షరములు.. ర,య,మ,న.
        సూర్యస్తుతి. 15.05.2020.

        పగటి దైవంబ! జీవుల వాంఛితాల
        గాంచి కాపాడుచుండెడో కాలవిదిత!
        పృధివి పులకించు జాడ, సంసృష్టి జూడ
        కాంతి దాతకే వీలగు  కచ్చితంబు.

       

            పద్యాలతోరణం..4.06.2020. మీపొన్నెకంటి.
            ప,వ,న,జ.అక్షరాలు నిషేధం.. ఆంజనేయస్తుతి.

            హృదయ కమలమందు శృంగారరాముడు
            కరుణ దాగియుంట, కలలు సత్య
            మౌచు,  సీత కాంచు మార్గంబుకుదిరెగా
            సూర్య శిష్య! కీశ!శుభ్రచరిత!
         
           లంకాభీకర కీశా!
           లంకిణి మదసం హరణ!విలక్షణశూరా!
           అంకిత శ్రీరామచరణ!
           సంకటముల దీర్చుమయ్య సద్గుణగణ్యా!

       పద్యాలతోరణం..8.6.2020.
      స,ర,ల,క...నిషేధం గా...లక్ష్మీ దేవి స్తుతి.

     శుచియందు గజమునందున
     వచియించెడు భాషయందు వైభవమందున్
     ఉచితజ్ఞునవ్వు నందున
     పిచుమందపుభూజమందు వెన్నుని యువిదే.

       గ,ణ,ప,త...నిషేధాక్షరాలు.. గణపతిస్తుతి..
     
       ఎలుకవాహనమెక్కి మమ్మేలు సామి
       కరిముఖుండ!విఘ్న హరుడ!కావుమయ్య!
       నీదు దీవన లేకుండ నీశుడైన
       విజయమందడు వెనకయ్య! వేదవేద్
   

     ప,ర,వ,త..నిషేధాక్షరాలు... పార్వతి స్తుతి.
        గణనాథుగన్న జననీ!
        గుణసంభాసీ!సదమల కోమలి యంబా!
        కణకణము జగము నిండిన
        ఫణిభూషణుసాముజాణ! ఫాలాక్షుసఖీ!

              ప,ర,మ,శ. నిషేధము....పరమేశ స్తుతి.
       
          అభవ! ఓలతాంతాయుధు హంత!నాగ
          భూష ణా!భూత నాధా!విభూతి నొసగి
          కావ దయసేయు సాధుసంకలిత భావ!
          భానుడ! సదయ! కాలాంత! భవ్యగుణుడ!

          హ,న,మ,త...నిషేధాక్షరాలు.. హనుమంతునిపై పద్యం.

           

         కపిపుంగవా!సరస వా

         గ్విపుల వచోవిభవ కీశా! వీరాధీరా!

         కృపజూచి కావరావా!

         అపురూప వరప్రభావ వ్యాఖ్యాలోలా!

       శ,ర,మ,త...అక్షరాల నిషేధంతో...రామునిపై పద్యం. 

    భానుకులజుని సుగుణుని పాదధూళి

    నావ సోకిన లలనయై పోవునంచు

    కాళ్ళు కడిగియె యెక్కించి కదలిపోయె

    గుహుడు యోచించె జ్ఞానియై గుట్టునెఱిగి.

ఆటవెలది..ప్రతి. పా. మొదట..రా..రావాలి. రామ పదం ఒకేసారి రావాలి. 

    రాగభావచయము రంజిల్లుమోముతో

    రాచఠీవి వరలు రమ్యగుణుడు

    రాక్షసాంతకుండు రంగైన దైవము

    రాము సుగుణధాము రసననిలుపు.

నిషిద్ధాక్షరి: త,ర,మ,స..లు లేకుండ. శ్రీహరి స్తుతి. 

  దీనావన గోపాలా!

  నేనెందున వెదకువాడ నిశ్చల బుద్ధిన్

  గానగ నుంటిని హృదినే

  గానవిలోలా! దయాళు! కనబడు దేవా!

నిషిద్ధాక్షరి: య,ర,ల,వ...నిషేధం..విష్ణుస్తుతి. 

   మాపతీ! మధు సూదనా!మదనజనక!

   ఖగపతీ!ముని జనగణ జ్ఞాన సింధు!

   మమ్ము సతతంబు కాపాడు మమతతోడ

   నిన్ను పూజింతు సద్భక్తి సన్నుతాంగ! 

   

     

      

అమ్మ..10.05.2020.

                     అంశం. "అమ్మ". 10.05.2020.
        అమ్మ పాదారవిందములకు ప్రణామములతో
         మాతృదినోత్సవము..సందర్భంగా..
                 
   సీ:జననంపు హేతువై జగమున యశమీను
                    మామంచి దేవత మాతృమూర్తి
      పేగునబంధించి ప్రియమార కాపాడు
                    మామంచి దేవత మాతృమూర్తి
      గుర్తుబట్టుటనేర్పి కోరినవ్వులబంచు
                    మామంచి దేవత మాతృమూర్తి
      నవ్వనేర్పునెపుడు నవ్వులపాల్గాక
                    మామంచి దేవత మాతృమూర్తి
      అత్తతాతనిపించి యడుగులువేయించు
                    మామంచి దేవత మాతృమూర్తి
      తొక్కుబల్కులనేర్పి తోడుగ రెట్టించు
                    మామంచి దేవత మాతృమూర్తి
       ఓంకారమునునేర్పి యుత్తమగురువైన
                     మామంచి దేవత మాతృమూర్తి
       సంస్కార సద్గుణ సౌమ్యత్వములనేర్పు
                     మామంచి దేవత మాతృమూర్తి.
 తే.గీ:మాతృదేవత మనకున్న మహిని సర్వ
        భోగభాగ్యాల దేలెడు పున్నెమబ్బు
        పరగ  మమతసమతలంద ప్రాప్తిగలుగు
        అమ్మలేదన్న మాటెప్డు నమ్మలేము.

        ఆ.వె:అమ్మతోడు!అమ్మ యండగనుండగ
                నన్ని యున్నయట్లు హాయిగొలుపు
                ఆమెలేక జగతి యంధకారమెగద
                అమ్మ పదమెమనకు నమృతమయము.

అంతర్జాతీయ మహిళా దినోత్సవము

సందర్భంగా మహిళామళులెల్లరకు

శుభాకాంక్షలు.. 

 స్త్రీ మూర్తి సృష్టి కర్తగు

 స్త్రీ మూర్తియె త్యాగవర్తి  శేముషిదాతౌ

 స్త్రీ మూర్తియౌను జగమది

 స్త్రీ మూర్తికి వందనాలు చేయుము నరుడా.

జయరాం..స్పందన.

జయరాం ఉత్పలమాలకు స్పందన.

  కమ్మని కంఠమందు కవిగాంచినభావమె ద్యోతకంబయెన్.

  రమ్మని తోరణంబునకు రాగసురాగసుధాంబుధిన్సదా
  మమ్ముల ముంచితేల్చుడని మానితరీతినిస్వాగతింపగా
  నెమ్మినిబల్కితిన్సురభినేస్తుని మాటను గౌరవించుచున్
  కమ్మని కంఠమందు కవిగాంచినభావమె ద్యోతకంబయెన్.

   పద్యంబల్లగ వాయువేగమున  నీ పజ్జన్సదాతిర్గుటే
   హృద్యంబౌ పదగుంభనమ్ము రసముల్శోభాయమానంపు,నై
   వేద్యంబై రసనాగ్రరాణిదయచే విద్వాంసులేమెచ్చగా
   చోద్యంబందగనబ్బెనాకు సఖుడా శుభ్రాంశుతేజోనిధీ.

    [08/05 7:59 pm] జె జె. యస్: స్పందన
        ~~~~~~~
పదము పదమున కవియొక్క భావనలను
కంటి ముందట చూపె నీ  గానసరళి
తెలుగు కవితల నున్నట్టి తీయదనము
కలము గళముల నింపుగా మిళితమయ్యె .
[08/05 8:47 pm] suryanarayana rao ponneka: భావస్వారస్యమున్నట్టి పదములెంచి
   రసముచిప్పిలురీతిని వ్రాయుచున్న
   నీదు పద్యాలపరిమళ మెట్టిదన్న
   వేల మల్లెలొకసారె విచ్చినట్లు.
 
       ఈనాటి నాదత్తపది పూరణపై..

     ఆంగ్లపదములగూర్ప నాయాస పడితి
     భావమందిన పొసగవు పదములన్ని
     పదము కుదిరిన స్వారస్య మదనుతప్పు
     ఎట్లొ కూర్చితి గణములనీశుకరుణ.
[08/05 8:49 pm] suryanarayana rao ponneka: వేలమల్లెలు గుంపుగా విచ్చినట్లు.

      పద్యాలతోరణం.. పై చిత్రమునకు (ఆవు ఒడిలో పులి)
     నా స్పందన..మీపొన్నెకంటి..22.05.2020.

  మునులున్ సిద్ధులు యోగులెల్లరును సమ్మోదంబులింపారగా
  మనముల్కల్మషదూరమై కరుణ సన్మార్గంబటంచున్సదా
  దినముల్గడ్పిన భారతావనిని సందేహంబులేలన్సఖా
  ఘనమౌ ధేనువు గుండెకద్దుకొనె వ్యాఘ్రంబున్ మహోత్సాహియై.

   పద్యాలతోరణం.. కన్నయ్య..లేగ.చిత్రమునకు
     నా స్పందనలు...మీపొన్నెకంటి.30.05.2020
 
    రంగు రంగులబుజ్జాయి రమ్యమైన
    నీలవర్ణుని యొడిలోన తేలిపోయె
    మోహనాంగుడ ద్దానిని ముద్దుజేసి
    అమ్మ తాననునట్లు సమ్మోదమొసగె.
 
    గోపకాంతలు నేనెప్డు గోలచేతు
    నంచు చాడీలు చెప్పుదురమ్మతోడ
    వారినిందలు సత్యమా ? పల్కుమనిన
    లేదులేదంచు తలద్రిప్పె లేగదూడ.

     పద్యాలతోరణం.. గాంధీజీ చిత్రమునకు
       నా స్పందన.మీపొన్నెకంటి.8.06.2020.

     శాంతిపథమది శస్త్రమై సాగిసాగి
     దేహమంతయు వ్యాపించె దివ్యమగుచు
     విశ్వమానవ శ్రేయమే వేడికొనుచు
     జాతిపితయయ్యె గాంధిజీ జయమునంది.

     శాంతికాంగ్ల పదము సర్వకాయమునిండె
    గాంధితాత జూడ కారునలుపు
    హింస మనకునెపుడు హేయంబటంచును
    పలికి గాంధి మిగుల ప్రగతిగూర్చె.

    లీలామోహను బంధము

     హేలగ నను జుట్టివేయ హృదయంబెల్లన్

     పాలనుగలసిన జలముగ

     లీలంగడు తెల్లనాయె లేదితరంబున్.

     నేటి తెలుగు కవిత ...ఒక యువకవి మానసిక స్థితి.

   సంధులనిన నేడు సదవగాహనలేదు

   ఏసమాసపటిమమేమిలేదు

   భావపుష్టి జూడ పరిమితంబౌనుసూ

   తెలుగు కవితలన్న దిగులుపుట్టు.

ముందునుయ్యి వెనుక గొయ్యి...ఈ పదాలు అలాగే ఉంచి 

భారతార్ధంలో ..ఆటవెలది.

కృష్ణ మానభంగ దృశ్యంబు గాంచుచు

రాజుకెదురు చెప్ప రవరవపడు

ద్రోణ భీష్మ కృపుల దుస్థితి గమనింప

వినుడు**ముందునుయ్యి వెనుకగొయ్యి**

స్పందన: కందమునుగూర్చి కందములో...

   పందిని బొడిచిన బంటగు

   కందము నందముగవ్రాయ కవిపుంగవుడౌ

   పందెముతో కందాలను

   వందలు వేల్జెప్పుకవికి వందనశతముల్.