ఆ. వె. ఆడు వారి మాట కర్ధాలె వేరుగా
విసుగు నసుగులోనె ప్రేమయుండు
ప్రేమపంటపండ విసురులు తప్పవు
తెలిసి మసలుకొనగ తీయనగును.
21, నవంబర్ 2020, శనివారం
15, నవంబర్ 2020, ఆదివారం
కాలేజి పద్యం.
చం .కొలచెల వారు దీవనల కూర్మిని బంచ, గురూత్తముల్ సదా
సలలిత పాండితీవిభవ సారము నింపగ,నస్మదాదులే
యలుపది లేకద్రావి దగ మేదిని పంచుచు పేరునిల్పుటన్
తలపుల వారి నెల్లరను దైవసమానుల గొల్వరండహో!
12, నవంబర్ 2020, గురువారం
కరోనా కాషన్స్.
కరోన కాషన్స్...మీ పొన్నెకంటి.
ఆ.వె: బయటికేగునపుడు భద్రతకొరకునై
"మాస్కు" మరువవలదు మాన్యతముడ!
"శానిటైజు" నీకు సహజ కవచమౌను
తెలిసి మెలగుమోయి తెలివితోడ!...1
ఆ.వె: తులసి టీలు నీకు తుమ్ములు రానీవు
అల్లముగల నిమ్మ హాయిగూర్చు
ఉదయమందు ద్రావ నుత్తేజముంగూర్చు
తెలిసి మెలగుమోయి తెలివితోడ!...2
ఆ.వె: చల్లనైన వాని సరియని తినవద్దు
వేడి వంటకాలె వాడుమోయి
శీతలాన క్రిములు చెలరేగి పెరుగును
తెలిసి మెలగుమోయి తెలివితోడ!...3
ఆ.వె: బంధుజనము జూడ పర్మిషనడుగుము
ఓకె యన్న పిదప దూకుమచట
ప్రేమకన్నముందు ప్రిన్సిపల్ ముఖ్యంబు.
తెలిసి మెలగుమోయి తెలివితోడ...4
ఆ.వె: బయటి నుండి వచ్చి పరవలేదనుచును
అన్ని తాక వలదు హాని కలుగు
సబ్బు నీట కడుగు చక్కగ చేతులు
తెలిసి మెలగుమోయి తెలివితోడ!...5
ఆ.వె: మాస్కుతాకవలదు మధ్యను ప్రక్కలన్
దానినిండ క్రిములు దాగియుండు
చెవుల త్రాడు పట్టి చిన్నగ తీయుమ
తెలిసి మెలగుమోయి తెలివితోడ! ...6
ఆ.వె: చెక్క యాలకులును చిరువుల్లి పాయలు
పసుపు అల్లమెపుడు వాడుమోయి
వంటయిల్లె మనకు వైద్యశాలౌనురా
తెలిసి మెలగుమోయి తెలివితోడ!...7
ఆ.వె: ఈ కరోన మనల నేమిచేయదనకు
శబ్దమేమిలేక ఛాతిజేరి
శ్వాసకోశ శక్తి సరగున జెరచును
తెలిసి మెలగుమోయి తెలివితోడ!...8
ఆ.వె: రోజు రోజు నీవు రుగ్మతనెదిరింప
ఆత్మశక్తి పెంచుటవసరంబు
నిత్యకృత్యమనగ నేర్పుగ బెంచుట
తెలిసి మెలగుమోయి తెలివితోడ!...9
ఆ.వె: అన్ని రుగ్మతలకు నాత్మవిశ్వాసంబె
ముఖ్యమైన మందు మోదమంద
దైవభక్తితోడ తావచ్చి చేరును
తెలిసి మెలగుమోయి తెలివితోడ!...10.
అభయహస్త పద్యం.
కోవిడు టీకా క్షేమం
బేవిధ మైనట్టి బాధ వేధింపదుగా
చేవను బెంచును తనువును
తావక భయమెల్ల వీడు, తరుణీమణిరో!
రోగముతో జచ్చె పో కరోనా తుదకున్
మూగుట లేదిట జనములు
బాగుగ ధరియించుచుండ్రి బహువిధ చిక్కాల్
ఏగతియని మానసికపు
రోగముతో జచ్చె పో కరోనా తుదకున్.
ప్రక్కనే ఉన్న క్రూరమృగం...కరోనా.
సీ: కంటికి కనబడ దింటికిచేరువౌ
కారోన దెయ్యంబు కరుణమాని
బంధువులందఱి బహుదూరమంచును
దానితప్పుకొనగ దయనుమాలి
తనకౌగిలందున దాచగా యత్నించు
కపట పేమనుజూపి కన్నుగీటి
దాని వగలగని దరిజేర మోక్షంబె
తెలివితోడ బ్రతుకు తెలుగువాడ!
ఒకసారి వచ్చినన్ ఇకరాదు నాకంచు
బరవాస వద్దురా భద్రముండు
తే.గీ: నేటి దుస్థితి జూడంగ నీచమాయె
మాస్కు పెట్టిన నెగతాళి మాటలాయె
అట్టి శుంఠలమాటల మట్టుబెట్టి
జ్ఞానవంతుల మాదిరి చనుడు జనులు!
మీపొన్నెకంటి. 9.4.21.
20, అక్టోబర్ 2020, మంగళవారం
నవరాత్రులలో... గాయత్రీ దేవి.
1. గాయత్రీ దేవిగా ఈనాడు దుర్గాదేవి.. స్తుతి.
శా: కారుణ్యామృత చింతనావృత విధిన్ గాయత్రి చిద్రూపివై
సారాసారవిచార మంత్ర నిధివై సౌందర్యవారాశివై
ఘోరాజ్ఞానపుటంధకార జగతిన్ కూర్మిన్విదారించుచున్
శ్రీరంజిల్లెడు వెల్గులిమ్ము సతమున్ క్షేమంకరీ!యీశ్వరీ!
2. శరన్నవరాత్రుల లో. దుర్గామాత, అన్నపూర్ణ గా...
శా: ఆహారంబును జీవకోటి కిడి యాహ్లాదంబు గల్పించుచున్
మోహాంధత్వముబారద్రోలి కరుణన్ ముద్దార దీపించునా
సౌహార్దాది మహోన్నతంపు గుణియౌ శాకంబరీదేవి సు
స్నేహానందవరాన్నపూర్ణ మనలన్ చిద్రూపియై కాచుతన్.
3. వాణిగా ..దుర్గాదేవి. శ్రీవాణ్యై నమః
తే.గీ: పలుకుపలుకున మధువులు చిలుకజేయ
జ్ఞానశక్తియు విజ్ఞాన శక్తులీన
వేదశాస్త్రాల సారాలు వెలికిదీయ
వాణి కరుణించి నా జిహ్వ వరలుగాత!
శా: భావావేశ విలాస సంపదలు సంప్రాప్తంబులై యుండుటల్
ప్రావీణ్యంబున సత్కళావిజయముల్ పండించి మెప్పించుటల్
తావుల్జిమ్మెడు కావ్యసంపుటులు సద్ధర్మార్ధ వేదాంతముల్
నీవాల్లభ్యముగాదె వాణి! జగతిన్నేజ్ఞానికైనన్ సదా!
శరన్నవరాత్రుల లో దుర్గాదేవి.
దుర్గాదేవ్యై నమః....స్తవము.మీపొన్నెకంటి
భర్గుని వామభాగమయి భవ్యసురార్చిత కల్పవల్లివై
నిర్గుణ నిర్మలాత్మ కమనీయరసాంచిత స్వాదుమూర్తివై
దుర్గగ"నింద్రకీలమున దుస్తరపాపవిదూరశక్తివై
మార్గవివేచనన్ సలిపి మమ్ములగావుమ! తల్లిశాంభవీ!
4. దుర్గాదేవి లలితా త్రిపుర సుందరిగా....
చం లలిత మనోజ్ఞభావనలు లాలిత సత్కవితావిభూతులన్
కలరవ గాత్రమాధురులు కమ్మని కావ్యవివేచనారుచుల్
సలలిత భక్తి తత్త్వములు చక్కని గ్రంథవిలాసబంధముల్
వెలయగజేయ శక్తినిడ వేడెద శ్రీలలితాంబనెప్పుడున్.
5. దుర్గాదేవి మహాలక్ష్మి గా...
ఉ . పాలసముద్రరాజ సుతవై సురకోటి సుపూజితాత్మవై
శ్రీలకునాలవాలమయి చెన్నలరారెడు విష్ణుపత్నివై
హేలగచిద్విలాసత మహీతలమేలు కృపాంబురాశి! మా
పాలిట మాతృవత్సలత భాసురరీతిని జూపుగావుతన్.!
స,తీ,దే,వి. ఆటవెలదిలో.. లక్ష్మీ దేవి స్తుతి.
సరసిజాక్షి!కమల!సౌందర్యవారాశి
తీర్చు మమ్మ వెతలు తిరముగాను
దేవి! నీదు కరుణ దేదీప్యమానంబు
విష్ణు హృన్నివాసి! వేలనతులు.
నవమి రోజు..సిద్ధధాత్రి రూపం.,మహిషాసుర మర్దిని.
అమ్మకు వందనములతో..మీపొన్నెకంటి.
సిద్ధ ధాత్రిగ నీరూపు శ్రీలగూర్చు
నవమి రోజున నీదివ్య జవముజూపి
దుష్టసంహారివైనావు తోయజాక్షి
రాజరాజేశ్వరీ!మాకు రక్షనిమ్ము!
మహిష రూపాన మత్తిల్లి మగువయనెడు
చుల్కనైనట్టి భావాన సుందరాంగి
శాంభవిని గోర రణమున సమయజేసె
అట్టి విజయ దుర్గాదేవి నాశ్రయింతు.
అందరికి విజయదశమి శుభాకాంక్షలు.
సీ: నవవిధరూపాల నవ్యాంతరంగాల
మహిషునిజంపిన మాత!వీవు!
పదునాల్గులోకాలు భయముననిండగ
రక్షగల్పించిన రమణివీవు!
లలితలావణ్య విలాసినే కాదంచు
స్త్రీశక్తి జూపిన చెండివీవు!
దుష్టుల దునుమాడి శిష్టుల గాపాడి
తోషంబుగూర్చిన దుర్గవీవు!
విజయదశమిన ఘనమైన విజయమంది
ధర్మ వర్తనె విజయంపు మర్మమనెడు
సూక్తి చాటిన లోకైక శోభనాంగి!
అమ్మ నీకివె హారతులందుకొనుమ!
14, అక్టోబర్ 2020, బుధవారం
పచ్చి నేతిబీర భాగ్యనగరు.
పచ్చి నేతిబీర భాగ్యనగరు.
ఆ. వె. మాటకోటదాటు మన్నింప సిరిలేదు
ఎన్నికలలలోన నెన్ని హొయలొ
శేషుడైన గూడ శీర్షాలు వంచును
పచ్చి నేతిబీర భాగ్యనగరు!...1.
ఆ.వె. స్వర్ణ మయపు నగరు సాధించితిమి మేము
కీచకాధములకు రాచబాట
బిడ్డ బయటికేగ ప్రేతగమారును
పచ్చి నేతిబీర భాగ్యనగరు....2.
ఆ.వె. అధిక వర్షమైన నపురూప సంద్రమై
యలలు రేగుచుండు నందమొదవ
పడవ వలయు నాడు పయనంబు సేయగా
పచ్చి నేతిబీర భాగ్యనగరు....3
ఆ. వె. వైద్యశాలల పని వర్ణింపతరమౌనె
చిన్న కారణాన జేరనచట
ఉన్నపొలములిండ్లు నొక్కబిల్లుకె చెల్లు
పచ్చి నేతిబీర భాగ్యనగరు....4.
ఆ. వె. బంగరుతెలగాణ పలుకులందు ఘనము
పుత్తడి పయిపూత పొలుపుగాను
స్వంతపాలనమ్ము స్వర్గమ్ము మనదన
పచ్చి నేతిబీర భాగ్యనగరు....5.
సముద్రము...స్వేచ్ఛా ఛందస్సు.
ఉదధిని నతుల రత్నమ్ము లొదిగియుండు
నటులె క్రూర జలచరము లందెగలవు
రత్నసాధన కొఱకుగా రాటుదేలి
యత్నమొనరింప సమకూరు రత్నతతులు.
21, సెప్టెంబర్ 2020, సోమవారం
పోతన., గురజాడ. జాషువా. గాంధీ జీ. పొట్టి శ్రీరాములు,పి.వి.అల్లూరి, ఘంటసాల..
1. నేటి అంశం "బమ్మెరపోతనామాత్యుడు".
సీ: శ్రీరామదర్శన సిద్ధినిబొందిన
పుణ్యాత్ముడైనట్టి భూరిగుణుడు
వాణికన్నీటిని వారించి కావ్యమ్ము
రామునకిడినట్టి రమ్యగుణుడు
భాగవతంబున ప్రత్యక్షరంబును
భక్తిని నింపిన భవ్యగుణుడు
సహజకవియనెడు చక్కని బిరుదంబు
పొందిన రసరమ్య పుణ్యగుణుడు
ఆ. వె. బమ్మెరాన్వయుండు బహుపూర్వ పుణ్యుండు
పోతనాఖ్యుడైన భూసురుండు
భరతసత్కవిమణి భాగ్యంపువారాశి
సాటిలేని విమల సారయశుడు.
... తేటగీతిలో పోతనగారు.
తన్మయత్వాన శ్రీరాము తత్త్వమంత
భారతీయుల హృదయాల భద్రపఱచె
భాగవతమను పేరను భవ్యచరిత
పుణ్యచరితుండు భక్తుడా పోతరాజు...1
హలము బలమున పండించె నైహికంబు
కలము చేతను సృజియించె కవనఫలము
రెంట జాలిన పోతన మింటికెదిగి
రామ రసమును బంచెను రసనతనియ.2
నవ్య మధువున భావాలు నానబెట్టి
భక్తిరసమును బూయుచు పద్యరచన
చేయకుండిన యంతటి చిద్విలాస
పూ‌ర్ణ సాహిత్య మొదవునె పోతనార్య?.3.
2. గురజాడ.
సీ: సాంఘిక శ్రేయమ్ము సమకూర్చవలెనంచు
పాటుబడినయట్టి పండితుండు
గ్రాంథికవాదులౌ కవులను మెప్పించి
ప్రజలభాషను బెంచు పండితుండు
హేతువాదిగ మారి హిమవన్నగమ్ముగా
భావాలు పంచిన పండితుండు
"కవిశేఖరుండన్న" కమ్మని బిరుదమ్ము
భద్రమై వెలుగొందు పండితుండు
తే.గీ: వేసె సాహిత్య రంగాన భిన్నమైన
నడుగు లెన్నెన్నొ వీరుడై హ్లాదమొదవ
వారి జాడలె మనకెప్డు దారిజూపు
భావి సంస్కారపూర్ణత్వ పరిధిపంచు.
3. కవికోకిల" జాషువా గారి జయంతి .సం.గా...
తే. గీ . కులము మతనెడు క్రుళ్ళును కూల్చివేయ
అక్షరాయుధంబునుబట్టి యనవరతము
సాహితీరణ రంగాన సాగి ప్రజల
డెందముల్గెల్చిన సుకవీ! వందనములు.
తే.జీ . రాజు సుకవుల చావు బేరీజు వేసి
సుకవి ఘనుడంచు బల్కిన సూరివీవు
ప్రజల గుండెల నిండెడు భావచయము
నీదు సొంతము జాషువా! నిజమునిజము
4. అంశం..గాంధీజీ....
ఉ . ఆయుధమింతలేక పరమాద్భుత శాంతి కి మారురూపమై
గాయము రక్తపాతములు కర్కశఖడ్గవిహారశూన్యమై
దాయగునింగిలీసుప్రభుతన్హడలంగను నెట్లుజేసితో
ఓయి మహాత్మ! జాతిపిత! యున్నత భారతమాతబిడ్డరో!
5. పొట్టి శ్రీరాములు...ఆంధ్ర రాష్ట్రావతరణ:
ఆ.వె. కలసిరాష్ట్రమున్న కష్టాలకడలంచు
పొట్టివంశజుండు పోరిపోరి
ఆంధ్రులకును స్వేచ్ఛ నందించు యజ్ఞాన
తనువు సమిధజేసె త్యాగమూర్తి.
ఆదర్శ నేత...
తాను చేయు పనుల ధర్మంబు తప్పని
స్వార్ధమెఱుగనట్టి సజ్జనుండు
లలితహృదయుడైన లాల్బహదూర్వంటి
నేత దొరకగలడె నెమకిచూడ!
వాగ్గేయకారుడు... త్యాగరాజు.
సరళ సంగీత సాహిత్య సార కీర్త
నాళి రచియించి రాగాలనాలపించి
యయ్యె వాగ్గేయకారుడు త్యాగరాజు.
పూర్వజన్మంపు పుణ్యంబు ప్రోదిగాగ.
కీ.శే. మాజీ ప్రధాని,పదునారు భాషల పుంభావ సరస్వతి,
తెలగాణ మాగాణపు కల్పవృక్షము పాములపర్తి
నరసింహారావు గారి శతజయంతి సందర్భముగా
"అక్షరాంజలులు." 28.6.2020.
1.సీ: అంబుధి జేరిన యార్ధిక రంగమున్
కమఠమై కాచిన కైటభారి
ఆర్ధికమంత్రి గా స్వార్ధరహితమైన
పాలన నెఱపిన పరమశివుడు
సంభాషణలయందు చాతుర్యమందున
కిటుకుల నెఱిగిన కృష్ణుడతడు
జ్ఞానమూర్తి యగుచు నైపుణిన్గడియించి
వాసిగాంచిన యట్టి వాణిభర్త
తే.గీ: మూడుమూర్తుల "నరసింహమూర్తి"యతడు
స్ఫూర్తి దాతగ వెల్గె సత్కీర్తిబొంది
చెక్కుచెదరని నిక్కమౌ యుక్కుమనిషి
నిత్య సంస్తుత్యుడైన మనీషియతడు.
2.సీ: పంచెకట్టున వెల్గి పదునారు భాషల
నాపోశనన్బట్టు నాంధ్రుడెవడు
తెలగాణబిడ్డడై తేజంబుజూపి ప్రా
ధాన్యుడైనట్టి యా ధన్యుడెవడు
మోమున చిరునవ్వు మునిచంద్రుపగిదిని
భావాల విలసిల్లు భవ్యుడెవడు
వేదాంత సూక్ష్మాల విజ్ఞత జూపి వి
వేకియౌ విశ్రాంతవీరుడెవడు
ఆ.వె: నూరు వత్సరముల నారనితారయై
నింగి వెల్గు మహిత నియతమూర్తి
"పీవి" గాక వేరు పేరులబనియేల
పుణ్యభారతాంబ ముద్దుబిడ్డ.
3.ఆ.వె: నాగఫణి వరుండు నవ్యప్రధానినో
ప్రశ్నవేయుడనగ బదులువలికె
మౌన భాషణాన మహిత శక్తిని జూప
పద్యమల్లుమనియె హృద్యముగను
4.ఆ.వె: ప్రశ్నవేయుటందు ప్రజ్ఞను జూపిన
నారసింహు జూచి నాగఫణియె
విస్తుబోయి వారి విజ్ఞాన దీప్తికి
పద్యమల్లె మౌన భావమునకు.
5.ఆ.వె:ప్రశ్నలెన్నియిడిన ప్రాజ్ఞతజూపించి
నవ్యరీతి బల్కు భవ్యగుణుడు
"పీవి నారసింహు" ఠీవిని నుతియింప
నాదిశేషుతరమె!వాదమేల?
6.ఆ.వె: విమలకీర్తి గన్న వేదాంతియాతడు
కవులు మెచ్చుకొనెడి కవియతండు
సరసరాజనీతి చాణిక్యుడాతడు
స్వార్ధరహితుడైన సాధుగుణుడు.
పద్యాలతోరణం... దత్తవర్ణన: అల్లూరి సీతారామరాజు.
నా వర్ణన: మీపొన్నెకంటి.7.05.2020.
సీ: ఆంగ్లేయశునకాల యసువులు బాపంగ
చెలరేగి దుమికిన సింగమీవు
భారతావని కంట వరదయైపాఱిన
కన్నీరుదుడిచిన ఘనుడవీవు
స్వాతంత్ర్య సంగ్రామ సంఘాలు నడిపించి
మన్నెంపు పులివైన మనిషివీవు
"రూధర్ఫరుడు"నకు రోషంబు రుచిజూపి
యుద్ధంబు సల్పిన యోద్ధవీవు
తే.గీ: నీదు కన్నుల రేగిన నిప్పుకొలిమి
ఆరదేనాడు భారతవీరులందు
అందుకోవయ్య జోహార్ల నమరచరిత!
నీకు సాటిగ నెవరుంద్రు నీవెసాటి.
గానగంధర్వ...ఘంటసాల గారి వర్ధంతి సందర్భముగా.
(జననం) 1922.డిశంబర్.4.---1974 .పిబ్రవరి.11.
సీ: కరుణరసాన నీ గళముకంపమునొంద
కన్నీరుగార్చులే కఠినులైన
వీరరసంపు వైవిధ్య ముంజూపిన
కనులరాలునునగ్ని కణములెన్నొ
శృంగారభావనల్ చిందించి పాడంగ
చిత్తాన మొలకెత్తు చిలిపివలపు
హాస్యరసంబును నలవోకపలికింప
కడుపుబ్బ నవ్వుల కళలువిరియు
తే.గీ. ఓయి స్వరమాంత్రికుండ!మహోన్నతుండ!
ఘంటసాలగ సత్కీర్తి మింటవెలిగె
జాతి గర్వించె నీదగు జన్మ చేత
గానగంధర్వ! నీసరి కనగనీవె.
సీ: సంగీత శాస్త్రాన సామర్ధ్యమున్నట్టి
యున్నతోన్నతులున్న నుండుగాక
వాగ్గేయకారులై వైవిధ్య రీతులన్
చోద్యాలు చూపిన చూపుగాక
పసితనమాదిగా పాండిత్యముంజూపు
ఉద్దండులుండిన నుండుగాక
జంత్రగాత్రములందు జాణత్వముంజూపు
ఉత్తములుండిన నుండుగాక
సుధలుకురియించు త్వద్గళశోభలెన్న
హాసదరహాస సుప్రభా వేసమెన్న
దేశభక్తిని ప్రకటించు ధిషణజూడ
నీకు సాటివి నీవయ్య నిర్మలాత్మ!
కీ.శే. అటల్ బిహారి వాజ్ పేయి గారికి అశ్రునీరాజనాలు.
అటలు బీహారి సత్కవి యమరుడయ్యె,
ఇంద్ర సభలోన కవులెల్ల మంద్రమైన,
భార విహ్వల హృదయాల పజ్జజేర,
స్వాగతించిరి సురలెల్ల సభకు నిపుడు.
5, సెప్టెంబర్ 2020, శనివారం
గురువు.
గురువు.
ఆ.వె. సర్వెపల్లివారి సద్యశస్ఫూర్తిగా
నొజ్జలదినమంచు నోహొయనగ
చేసిరైదు తేది సెప్టెంబరందున
వర్షవర్షమెల్ల హర్షమొదవ.
మ. అకలంకంబగు నక్షరంబులను సర్వార్ధ్హార్ధ సిద్ధంబుగాన్ ,
సుకరంబయ్యెడి రీతిగా మదికి సంస్తూయాత్మపాండిత్యమున్,
సకలంబున్ దయజూపి నేర్పిన గురుస్స్వాముల్ విచారింప.నా
కొకరా యిద్దర ముగ్గురా నలుగురా యున్నార లెందెందరో .
సీ. క్రమశిక్షణాన్విత గమనంబు నేర్పిన
గురువుల మేమెప్డు మరువలేము.
పాఠ్యాంశముల్గాక పరమాత్మ జూపిన
గురువుల మేమెప్డు మరువలేము
సద్భావసాహిత్య సౌహిత్యమూర్తులౌ
గురువుల మేమెప్డు మరువలేము
పద్యంబునెప్పుడు హృద్యంబుజేసెడు
గురువుల మేమెప్డు మరువలేము
దేశభక్తి మదిని దీపింపజేసిన
గురువుల మేమెప్డు మరువలేము
పెద్దలబూజించు ప్రేమను నేర్పిన
గురువుల మేమెప్డు మరువలేము
మహితుల చరితలన్ మదికెక్కజెప్పిన
గురువుల మేమెప్డు మరువలేము
తల్లిదండ్రి గురువు దైవంబులన్నట్టి
గురువుల మేమెప్డు మరువలేము
మాతృసంస్థనెపుడు మరువరాదనియెడు
గురువుల మేమెప్డు మరువలేము
తే.గీ: వివిధ రూపాలనలరెడు వేదమూర్తి
బాలబాలికలన్నను పరవశించి
జ్ఞాన దీపాలు పంచు విజ్ఞానమూర్తి
అర్పణముసేతు నతులను నహరహమ్ము.
ఆ.వె. విద్యలన్ని నేర్పి విజ్ఞత కల్గించు
గురుని పాదరజము శిరముదాల్చ
నంతకన్న ఫలము నవనిని లేదురా
వదలకయ్య గురువు పాదములను.
ఆ.వె. నిదుర లేచి యెవడు నిస్టాంతరంగుడై
గురుని నామ జపము కూర్మి సలుపు
నట్టి వాడు పొందు నఖిల సౌఖ్యమ్ములు
వదలకయ్య గురువు పాదములను.
ఆ.వె. శిష్యకోటి మతుల చీకట్లు తొలగించి
దివ్య బోధనలను దీప్తు లిచ్చి
ధిషణ జూపు గురువు దేవుని రూపురా
వదలకయ్య గురువు పాదములను.
ఆ.వె. బాల బాలికాళి బహువిధ శిలలౌను
ఊహలెల్ల గురుల ఉలులు సుమ్ము .
ఉన్నత గురు కృషియె ఉత్తమ శిల్పాలు
వదలకయ్య గురువు పాదములను.
ఆ.వె. దైవ దర్శనంబు దయతోడ చేయించి
ముక్తి త్రోవజూపు పుణ్యమూర్తి .
గురువు పేర మనకు గోచరిన్చునుగాదె
వదలకయ్య గురువు పాదములను.
ఆ.వె. ఎరుక కులజుడైన ఏకలవ్యుండు-తా
గురుని దైవమట్లు కూర్మి నమ్మి
విశ్వమందు కరము విఖ్యాతి నార్జించె
వదలకయ్య గురువు పాదములను.
ఆ.వె. మైనమట్లు కరగి మహి కాంతులీనెడు
గురుని త్యాగ గుణము మరువరాదు .
అనుసరించి వాని కానన్దమీయరా
వదలకయ్య గురువు పాదములను.
ఆ.వె. తండ్రి పగిది నిన్ను దండించు నొకమారు
తల్లివోలె ప్రేమ తనుపుచుండు
విద్య నేర్పు గురుని వింత వేషాలురా
వదలకయ్య గురువు పాదములను.
భాగ్యనగర వాణికి పట్టాభిషేకం
భాగ్యనగరంలోని కల్చరల్&అసోసియేషన్,రాఘవేంద్రకాలని, సి,బ్లాక్, కొండాపూర్ వేదికగా, సంస్థ ప్రసిడెంట్ శ్రీ జూపల్లి శ్రీనివాస రావుగారు ది.30.10.2022(ఆదివారం)ఉ.గం.10.00లకు పతాకా విష్కరణ, సభాధ్యక్షత బాధ్యతలను నిర్వహించగా, కార్యదర్శి శ్రీ ఏ. సురేంద్రరెడ్డి గారి విజయోత్సవ తోడ్పాటుతో తడవర్తి బాపయ్య ఉన్నత పాఠశాల, ధూళిపూడి పూర్వవిద్యార్థులు నూతి సాయి సోదరులు, తదితర ఆత్మీయ విద్యార్థినీ విద్యార్థుల బృంద సంపూర్ణ సహాయ సహకారములతో వారి విశ్రాంతాంధ్రోపాధ్యాయులైన శ్రీయుతులు జొన్నలగడ్డ జయరామ శర్మకు, పొన్నెకంటి సూర్యనారాయణ రావుకు, శ్రీమతి వెలగపూడి నాగమల్లి పుష్పలతకు, ధూళిపూడి
పూర్వవిద్యార్థి, అష్టావధాని శ్రీయుతులు చింతలపాటి బుచ్చి వెంకటప్పేశ్వర శర్మకు దంపత సమేతముగా ఘన సన్మానములను దుశ్శాలువ, సరస్వతీ మూర్తి తో అనిదంపూర్వముగా నిర్వహించిరి. అచటికి వచ్చిన పూర్వ విద్యార్థుల గుండెలోతులు నిండిన ప్రేమానుభవాలు, సభక్తికముగా ఆనందాశ్రువులతో పొంగిపొర్లిన సంభాషణలు ఆకట్టుకొనినవి. వారి మధురానుభూతులు అనుభవైక వేద్యములే కాని బోధ్యములు కావు. ఈ సంతోష సమయమున ‘‘ జననీ జన్మభూమిశ్చ స్వర్గాదపి గరీయసీ ’’ అని పాఠశాల పూర్వ విద్యార్థులు వఝ గోపాల కృష్ణమూర్తి, కత్తుల వెంకటేశ్వరరావు ప్రభృతులు గ్రామముతోను పాఠశాలతోను ఉపాధ్యాయుల బ‌ృందముతోను గల స్వానుభవములను కవితాత్మకముగా వ్రాసి సభను పంచుకొన్నారు.
ఈ అపూర్వ సన్మానము ‘‘ వాణి పాద మంజీరములకు జరిగినట్లు భావించు చున్నామని సన్మాన గ్రహీతలు తమ ఆనందమును కృతజ్క్షతలను పద్యముల రూపమున వ్యక్తపరచిరి. ఈ రీతిగా మాతృభాషను, ఉపాధ్యాయులను జీవితాంతం మరచిపోకుండ గౌరవించుకొనే సంప్రదాయాన్ని పాటించిన ధూళిపూడి పూర్వ విద్యార్థులు ఎల్లవేళలా అభినందనీయులే, ఆదర్శప్రాయులే.
శుభం భూయాత్!
ఆశీః పద్యసుమాలు.
ఇంతటి చోద్యంబు నెవ్వారు చేయంగ
వినలేదు కనలేదు వేదికలను
ఇంతటి ప్రేమయా? యీఛాత్రులకునెల్ల
"అమ్మభాష" యనిన నాదరంబు
ఇంతటి గారవ మింత పీయూషమ్ము
"తెలుగు"నందని మీరు తెలిసివలచి,
కొంతలో కొంతగ కొమ్మ పల్కులరాణి
పాదారవిందాల పట్టుమమ్ము
"భాగ్యనగరా"న మాకు సౌభాగ్యమలర
పూర్వ విద్యార్థులెల్లరపూర్వముగ
సూత్ర బంధిత కుసుమాల శోభపగిది
చేరి సత్కరించిరిట ఆశీస్సులివియె.1.
ఎంత యెదిగిన నొదుగుటే యింగితమని
ఇట్టి పరమార్ధ మెరుగుచు పట్టుదలను
మూలములనెల్ల మరువని మూర్తులగుచు
మీరలుండుట సంతసమిడును మాకు.2.
మరువలేనట్టి ప్రేమను మాన్యతలను
"శిష్యగణమె"ల్ల మోదాన చేరి యిచట
పంచినారలు బుధులెల్ల పరవశింప
నాయురారోగ్య భాగ్యాల నలరుడయ్య!3.
తల్లి పాలు ద్రావ తరియించు జన్మంబు
మాతృ భాష పలుక మమతలొలుకు
నన్న విషయమెరిగి ఆంధ్రభోజుడు నాడు
తెలుగు లెస్స యనియె ధీరుడగుచు.4.
వదలక మమతలు మీరలు
పదిలముగా నుండుడయ్య పరమార్ధమదే
సదమల భావ పూర్ణపు
నెదలోపలె నీశుడుండు నెయ్యుడెయగుచున్.
భాగ్యనగరం. శుభాశీస్సులతో
మల్కాజిగిరి విశ్రాంతాంధ్రోపాధ్యాయుడు
30.10.22. పొన్నెకంటి సూర్యనారాయణ రావు.
29, ఆగస్టు 2020, శనివారం
ప్రభవాది వత్సరాలు...1-30.,
శార్వరి నామ ఉగాది శుభకామనలు..25.03.2020.
చం:పుడమికి నింగికిం దనువు పుల్కలు రేపగ నేడు శార్వరే
తడయక కాలుమోపినది ధర్మప్రపూరితరాగబంధముల్
గడుసరితోడబెంచి తనకౌశలమొప్పగ నెల్లజీవులన్
కడు ముదమంది దివ్య శుభకామన లెల్లను పొందు కైవడిన్.
ఉ:భానుని లేతకాంతులను భామిని గాంచక వేగలేచి-తా
మానితరీతి సభ్యులను మక్కువ మీర సభక్తికంబుగన్
ఆనగ షడ్రసంబులను హాయిగ భావి సుభాగ్యసంపదల్
కానగగోరు మాన్యులను గాచుత! శార్వరి యెల్లవేళలన్.
ఉ:క్రొత్తవి లేజిగుళ్ళుదిని "కో"యనె కోయిల గున్నమావిపై
మెత్తని పద్మకర్ణికల మెల్పుగజేరెను షట్పదావళుల్
చిత్తములెల్లమారినవి జీవనయానపు చిద్విలాసమై
హత్తుకపోయెగా జగము హాయిగ శార్వరి రాక పర్వమై.
ఉ:కన్నెలు బాలికల్ మరియు కాటికి సిద్ధమెయైన నారులన్
కన్నులకావరానజెడి కాముకఘోర పిశాచబృందమై
ఉన్నతశీలసంపద మహోన్నతరీతి నటించు కూళలన్
వెన్నులువిర్వ శార్వరి ప్రవేశముజేయుమ కాళికాంశవై.
ఉ:హద్దులలోననున్న కడుహ్లాదముగూర్చును నట్టిభావనల్
ముద్దులుమూటగట్టి ఘనభూషణభూషితుజేయు నెమ్మదిన్
సుద్దులుసెప్పి వంచనకుజూచెడు దుష్టనికృష్ట జీవులన్
పెద్దలగల్పు శార్వరి యుపేంద్రసమానులెయైన వారినిన్.
చం: శుభముల నీనుగాత!నవ శోభిత శార్వరి ధర్మవర్తనన్
విభవము నందగోరి కడు విజ్ఞత ధర్మ సువేదవిత్ర్పభా
సభలను రంజిలన్ విమల శారద దీవన బల్కువారినిన్
అభయమొసంగి కాచునల నార్తివిదూరుల సజ్జనాళినిన్.
శార్వరి(ఉగాది) సందేశం.25.03.2020
చం: గడపను దాటరాదనెడు కాలమునేటికి దాపురించెగా
గడపగ నెట్లుజాలుదును కౌతుకమొప్పగ నొంటరంచు-నీ
వడలుచునుండబోకుమ! నవాభ్యుదయంబును జాతినింపగా
తడయక యోచనల్సలుపు దానవరూపి"కరోన"జంపగా!
ఉ: ఏగకు వేపపూత కొఱకేగకు బైటికి మావికొమ్మకై
ఏగకు బెల్లమున్దొరకు నేమొయటంచు పచారికొట్టుకై
వేగముతో"కరోన" ఘన భీకర విస్తృత మారణాస్త్రమై
రోగులబెంచవచ్చునదె రూపునుమాన్ప ప్రతిజ్ఞ బూనుమా!
ఉ:"శార్వరి"నేనుగాబలుకు చక్కని సూక్తులనాచరింపుమా!
పర్వములేవియైన మనబాగునుగోరుచు వచ్చునట్టివే
గర్వముమాని మానవుడ!క్రమ్ముకువచ్చు"కరోన"రక్కసిన్
ఖర్వముజేయుమయ్య!ఘనకార్యమునీదగు విశ్వమందునన్.
ఉ: కోకిలలెల్ల తెల్లముగ కూయుచునున్నవి పంచమంబునన్
వ్యాకులపాటుతో దిశలబాడుచునుండెను షట్పదంబులే
వేకువజామునుండి కడు విజ్ఞత జీవులు వానిబాసలో
నీ కఠినంపు రక్కసి "నుమేశ!తొలంగగ జేయుమంచనెన్.
ఉ: భావనలోనె షడ్రుచులుపండగ "పండుగ జేసికొండికన్
జీవనయాత్రలో పరమశ్రేయము నందగ భక్తిభావనన్
భావి సుమార్గదర్శమయి భవ్య సదున్నతి నందజేయగా"
కావగ"శార్వరే"బలికె కమ్మని సుద్దు"లుగాది పర్వమున్"
ప్రభవ. 1.....సంవత్సరము గురించి.3.04.2020.
ఉ:ప్రాభవమంద స"త్ప్రభవ" భాగ్యమునందితివయ్య భారతిన్
వైభవమందుమా!సరస వాజ్ఞ్మయరీతుల కైతలల్లుచున్
లోభము మోహమున్మదము లుప్తముజేయుచు జీవితాంతమున్
శోభనమూర్తి కేశవుని శోధన సల్పుమ భక్తితత్త్వమున్.
ఉ:శోధనజేయు మాధవుని సుందరరూపుని వైభవాల-నా
రాధనజేయ నీ "ప్రభవ" రంజిల జేసెడు గాధలెన్నియో
బాధలవెన్నియో ధరణి భౌతిక తత్త్వ విచారమెద్దియో
మేధకు తోచి మార్గమును మేలుగజూపును మానవోత్తమా!
తే.గీ."ప్రభవ"మందుట నరునిగ వైభవంబు
ఎన్ని జన్మల సుకృతమదేమొగాని
సార్ధకంబును జేయుమ సరసమతిన
ధర్మ చింతనె ముక్తికి దారిజూపు.
తే.గీ.కరుణ సద్ధర్మ తత్త్వాలు గౌరవాలు
మేలు కీడులు సంవృత మిశ్రమాలు
కనగ నరునకు ననుభవ కర్మఫలము
"ప్రభవ"మందిన ప్రతిజన్మ ప్రాభృతమ్మె.
తే.గీ.ఉత్తమోత్తమ జన్మంబె యుర్విలోన
నరుని జన్మమె యనదగు తరచిచూడ
"ప్రభవ"మందిన జీవన పరిధిలోన
జన్మరాహిత్య యత్నంబు సల్పుమయ్య.
@ పద్యవర్షం.3. ప్రమాది.
ఉ: నీవ! ప్రమాది!వచ్చితివ, నిర్ణయమైనది పేరు బల్కుటన్
జీవుల ప్రాణముల్ తరచు చేర్చుదువంట ప్రమాదమార్గమున్
కావున మమ్ము సత్కరుణగాంచుచు దివ్యప్రమోదమందగా
తావక నామమున్ మలచి ధార్మికరీతిని ఖ్యాతి జెందుమా!
ఉ: జీవనయానమెల్లెడల చిన్మయభక్తి విశేషసాధనన్
పావన బంధముల్గలిగి వారును వీరను భేదభావముల్
లేవనుభంగి సేవలను రేబవలుంబచరించు వారికిన్
దీవనలిచ్చు సంతతము దివ్య "ప్రమాది" ప్రమోదమందగా.
@పద్యవర్షం.4." యువ ".
మ: మనదౌ భారతదేశమందు"యువ"తే మాన్యత్వముంబెంచగన్
ఘనమౌ సూచనలిచ్చె ప్రేముడి వివేకానందుడాత్మీయతన్
వినయంబొప్పగ వారి సూక్తులను నెవ్వేళన్సమీక్షించినన్
కనగా సాధ్యమె దివ్యశక్తులను ప్రఖ్యాతంపు విశ్వంబునన్.
ఉ: ఉక్కునుబోలు కండలును నుజ్జ్వలభానుసమానతేజమున్
తక్కువగాని విక్రమము ధర్మప్రవృత్తియు సాధుశీలమున్
అక్కునజేర్చుకో గలిగి యాదరమొప్పగ పేదవారినిన్
చక్కగజూచు నా "యువ"త శక్తియె ముఖ్యము భారతాంబకున్.
ఆ.వె : నేటి "యువ"త! మీరు మేటియౌ చిచ్ఛక్తి
కాన భరతమాత ఖ్యాతి బెంచ
సింహవిక్రమాన చిచ్చపిడుగులై
గుంటనక్కల నిల గూల్చుడయ్య!
తే.గీ: ఓ"యువ"తరమ! జ్ఞాన మహోదయంపు
శ్రీ విశేష శేముషులెల్ల చేరగలవు
విక్రమింపుడు నేర్చిన విద్యలెల్ల
సఫలమౌనట్లు నిరతంబు చక్కగాను.
తే.గీ: "యువ"త కర్తవ్య దీక్షత నుగ్రులగుచు
శత్రు సంహారముంజేసి శాంతిగూర్ప
భారతావని నెలకొను భద్రమెపుడు
లేచి రారండు వేవేగ లెంకలగుచు.
@పద్యవర్షం.5... విభవ....
చం:"విభవము"పూర్వపుణ్యఫల విస్తృతరూపము,దీని పంచెగా
నభవుడనేక రీతులుగ జ్ఞాన విశేషవిలాససంపదన్
ప్రభవముచెంది మానవులు వైభవమొప్పమహోజ్జ్వలంబుగన్
శుభములదూగునట్లు,వరసుందరరూపము వెల్గునట్లుగాన్.
సీ: మానవుడందెడు మానావమానాలె
విభవదారిద్ర్యాల వివిధ గతులు
పూర్వజన్మలలోన పుణ్య పాపంబులె
సత్ఫల దుష్ఫల సరళి వచ్చు
అనుభవించగ దప్ప దయ్యయి కాలాల
ఏడేడు జన్మాల వీడబోదు
మనుజ జన్మము నందు మానవత్వముకల్గి
విభవంబు పంచుటే విజ్ఞతగును
ఆ.వె: చేసినట్టి కర్మ చెడని పదార్ధమై
వెంటవచ్చు గాన వేగిరమ్ము
పుణ్య కర్మజేసి పొందుమ సౌఖ్యమ్ము
సంఘమెల్ల నీకు సాగి మ్రొక్కు.
సీ : సిరిసంపదలు గల్గి స్థిరముగానుండుట
వీక్షింపనొక్కటి వైభవంబు
కమ్మని భావాల కావ్యంబులన్ వ్రాసి
విజ్ఞులౌటయె యొక్క వైభవంబు
రణరంగమునగెల్చి రాజ్యంబుచేపట్ట
బాహుబల విజిత వైభవంబు
చిత్ర శిల్పకళల శ్రేయంబునందుట
భవ్య సుందరమైన వైభవంబు
తే.గీ : ఇట్టి వైభవ సుఖముల నెట్టివేసి
ప్రథమస్థానంబునందును ప్రస్ఫుటముగ
మంచి యారోగ్య భాగ్యంబె మానవునకు
సర్వ వైభవ విభవమ్ము సారసాక్ష!
@పద్యవర్షం.6. తారణ.
ఉ:ఓనవతారణా!శుభమహోన్నతవైభవ సర్వసంపదల్
దానము ప్రేమభావనలు ధైర్యము త్యాగము సంప్రదాయపున్
జ్ఞానము ప్రజ్ఞయున్ సకలకామ్యములిచ్చికృపాంతరంగవై
దీనుల కావుమమ్మ వినుతించెద సర్వహితమ్మునెంచుచున్.
ఉ:రాముని సీతనున్మరియు లక్ష్మణ మూర్తుల సేవకుండవై
క్షేమముగాపవిత్ర సుర సేవిత గాంగజలాన నావపై
ధీమతి తారణన్సలుపు తీయని బంధమదెంతభాగ్యమో
శ్రీ మహితా!గుహా!యలమహేంద్రునికన్నను నీవెమిన్నయౌ.
ఉ:తారణయేయగున్మనకు తప్పక యింటనె నిల్చియుండుటల్
తారణయేయగున్మనకు తప్పక మాస్కుధరించియుండుటల్
తారణయేయగున్మనకు దగ్గర దగ్గర నుండకుండుటల్
తారణ సూత్రముల్ యివియె తప్పుకొనంగ*కరోన*మారినిన్.
@పద్యవర్షం. 7.వ్యయ
చం:వ్యయమునుజేయగావలదువచ్చినభాగ్యమదంతయున్సఖా
భయమునుగల్గియుండవలె భద్రత గోరుచు భావికాలమున్
నయమది యార్ధికంపు సమజ్ఞానము జీవికయందుజూడగన్
రయముగ్రహింపగావలయు రాజిలునిట్టి వివేకసూత్రముల్.
ఉ:వచ్చిన సంపదన్ తగిన వార్షిక యోచనభావపూర్ణులై
నచ్చిన రీతి గావ్యయము నాణెపు జీవనవృద్ధికై సదా
మెచ్చెడుతీరుజే యవలె మేలుగ పేదలనుద్ధరింపుకై
ముచ్చటగూర్పపెట్టవలె మోదమువారిముఖాన వెల్గగా.
ఉ:చేయకు దుర్వ్యయంబెపుడు శ్రేయముగూర్చెడు సంపదాళినిన్
చేయకు దుర్వ్యయంబెపుడు చిత్తమునందలి యోచనాళినిన్
చేయకు దుర్వ్యయంబెపుడు శ్రీమతిజెప్పిన తొట్రుపాటునన్
చేయుము భావికాలమున బంగరుబాటలువేయునూహలన్.
@పద్యవర్షం.8.ఈశ్వర...రక్షణ, బుద్ధి,దైవం.
ఉ: మానవ జీవితంబున బ్రమాదము పజ్జనె పొంచియుండి క
న్గానని రీతిగన్సతము కౌగిలినీయగ జూచుచుండుగా!
పూనుము ధర్మకార్యముల మోదమునన్బెరవారు మెచ్చగన్
దీనజనోద్ధృతే వరము దివ్యమహేశ్వరు చింతనంబునన్.
ఉ: ఈయగ సంతసించును,మహేశ్వరుడంచు దలంచుచున్సదా
పాయని దానధర్మముల ప్రబ్బిన భక్తిని పేదసాదకున్
హాయిగజేయుమా కలుగు నంచితరీతి విశేషపుణ్యముల్
దోయిలియొగ్గి సర్వులును తోషణమందెదరయ్య నిచ్చలున్.
ఉ:కాంచు మహేశ్వరత్వమును కాయముగల్గినజీవకోటికిన్
పంచుమ ప్రేమతత్త్వము విభావసు డాకిరణాలపోలికన్
సంచితమై ప్రభావమది సాగును జన్మల పుణ్యరాశియై
కుంచితమానసంబెపుడు కూడదు హానికి మూలమయ్యదే.
@పద్యవర్షం..9. మన్మథ
ఉ: పుట్టుక మానవుండయిన పుర్వదియైనను మానసంబదే
గుట్టుగ మన్మథాస్త్రములు కోరికలన్మొలిపించి పెంచుచున్
పట్టుగ బంధమేసి తనపంతము నూటికినూరుపాళ్ళుగా
బెట్టుగ కూర్చుచున్ జగతి ప్రేమమయంబుగజేయునంతటన్
చం:జగతిని నెల్లజీవులును సౌఖ్యముగోరుటసాజమే కదా
ప్రగతి పథానుసారులయి భావికిమార్గము జూపువారలై
సుగతులగూర్చునట్టి వరసూనులనందగ కృత్యమయ్యదే
వగలనుబెంచు మన్మథుని పాదములంటినతీరుకోరికల్.
చం:మనసు మధించుశక్తిగల మన్మథుడాపరమేశు మౌనమున్
సునిశితవైఖరిన్ జెరచ సుందరతన్కుసుమాయుధమ్మునన్
బనివడి వేసి శీఘ్రగతి బార్వతిపై మరులొల్కజేయగా
కనుగొని నీలకంఠుడల కాముననంగునిజేసె కృద్ధతన్
@పద్యవర్షం. 10.జయ.
చం:జయమును బొందగోరుటన చక్కనియోచనయెల్లవారికిన్
నయమును ధర్మమార్గమును జ్ఞానవిచక్షణ సాహసంబు, ని
ర్భయమును కార్యసాధనముపాయము దీక్షయు గల్గియున్ననే
ప్రియముగజేరు.కేవలము వేడుకమీర స్మరింపవచ్చునే?
ఉ: రాజులు శత్రురాజులను రంగమునందునగెల్వనేగుచున్
తేజమెలర్ప సైన్యతతి దిక్కులు నాల్గునుబిక్కటిల్లగన్
ఆ జయశబ్దమెల్ల ఘనమౌనటు మోదముతోడ మాటికిన్
రాజితకీర్తిపొంద ననురాగముతోననుచుంద్రు వేడ్కమై.
మ: దసరాపర్వమునందు చిన్నతనమున్ ధానుష్కవేషంబునన్
రసమాధుర్యపుపద్యగానములతో రాజిల్ల నింటింటిలో
నసమానంబుగ బెంచినట్టి హనుమన్నా జై జయధ్వానముల్
రసవంతంబయి జ్ఞప్తిరాగ మధు రోల్లాసంబులై దోచెడిన్.
@పద్యవర్షం. 11. విక్రమ. బలము,తెలివి,ఎదుగుదల.
సీ:చీనిదేశపు నేత సిగ్గిడితనముతో
భారతావని తప్పు బట్టుచుండె
వైరసు సృష్టించి వంకలుజెప్పుచు
నాధిపత్యార్ధమై యరచుచుండె
మాట సత్యములేదు మానవత్వములేదు
సంస్కారహీనమై సాగుచుండె
దేశదేశాలపై తిరుగు లేదనునట్టి
ధీరత్వ ముంజూపి తిరుగుచుండె
తే.గీ:ధర్మమొక్కటె సరియైన దారియనుచు
తప్పి చరియింప ముప్పులు తప్పవనుచు.
చీనిదేశంపు గర్వంబు చీల్చి వేయ
విక్రమముజూపు భారత వీరపుత్ర!
ఉ:విక్రమవంతుడొక్కడె యభీష్టము మేరకు రాజ్యపాలనన్
సక్రమ మార్గమున్సలిపి శౌర్యముజూపుచు శత్రుదేశము
న్నాక్రమణంబుచేసికొని యందలమందున హాయినుండి బ
ల్చక్రముదిప్పుచున్మురియు సార సుశోభిత చక్రవర్తియై.
సీ:మంచుకొండలలోన నించుక వెరువక
కావలికాయునా ఘనుడెవండు
తనవారినందరి త్యాగంబు జేయుచు
కొండగుహలలోన నుండునెవడు
శత్రుసేనలకెప్డు శరభమై కనిపించి
నిద్దుర పోనీని నెయ్యమెవడు
భరతమాత పొగడు బంగరు బిడ్డగా
విఖ్యాతిగన్నట్టి విక్రముండు.
తే.గీ:ఎవడు ఎవడని యిటనట వెదుకవలదు
"జైజవాన"ని సత్కీర్తి శాస్త్రి వలన
పొంది యున్నట్టి యరుదైన ముద్దుబిడ్డ
భారతీయుల పాలిటి ప్రాణదాత!!
ఉ:రమ్మభినందనా!భరత రత్నమ!వీరకిశోరమై తగన్
దమ్మును జూపి పాకునకు దర్పమడంచిన విక్రమాన్వితా
ఇమ్మహి భారతీయుడొకడేకద శాంతియుశౌర్యదర్పముల్
చిమ్మెడు ధైర్య శాలి,ఘన శ్రేయము గూర్చిన ధన్యజీవివే.!
తే.గీ:సింహ విక్రమంబు చిరుతవేగంబును
పావురాయి తెల్వి పరగశాంతి
కలిగియున్నవాడె ఘనభారతీయుడౌ
తెలిసి మెలగుమోయి తెల్లవాడ!
పద్యవర్షం .. 12. కీలక
ఉ:మేలగు కార్యముల్సలిపి మించిన ప్రేమనుజూపుచుండి,స
మ్మేళనముల్ సదా జరిపి మేల్కొనజేయుచు సంఘసేవలం
గాలము వెళ్లబుచ్చుననఘాత్ములు నేడిల కీలకంబగున్
శ్రీలును మేళ్ళుగూర్చుగద చేతన గల్గిన వారి చర్యలే.
ఉ:సారము గల్గు నూహలను చక్కగ బంచెడు తల్లిదండ్రులే
నేరము జేసినారని వినీతుల విజ్ఞుల దూరముఞ్చచుటల్
ఘోరము జేయుచుండిరిటు కొందరు మూర్ఘత స్వార్ధ బుద్ధితో
వారిని నాదరించుటది బంగారు బయటకు కీలకంబగున్ .
@పద్యవర్షం. 13. బహుధాన్య.......
మ: అహహా!వచ్చెను క్రొత్తవత్సరమటంచాయా ప్రదేశంబులన్
బహుధాకర్షణ వైఖరిన్మలచి యింపౌనట్లు సద్భావనన్
మహదానందము జెందుచున్మసలగా మమ్మున్విలోకించుచున్
బహుధాన్యంబది యిచ్చుగాత!సుఖముల్భవ్యంపుశ్రేయోనిధుల్.
కం: బహుధాన్యంబుల రాశులు
మహనీయత బెర్గి యీవి మాన్యతలబ్బున్.
మహదానందము గల్గును
నొహొహో యని కీర్తి వచ్చు నున్నతశ్రేణిన్.
కం: బహుధాన్యంబులు పండగ
నహరహమును రైతుబిడ్డ లాశగజూడన్
సహనమునుజంపి వానలు
ప్రహరణ మునుజేయుచుండె పంతముతోడన్.
@ పద్యవర్షం..14. భవ.
సీ:సంగీత సాహిత్య సౌహిత్యభాసుడై
విద్యలవెల్గొందు విజ్ఞడెవడు?
శిల్ప విన్యాసాల జీవమ్మునింపుచు
మహిని కీర్తినిగన్న మాన్యుడెవడు?
మట్టిని మథియించి మాన్యాలబంగారు
పంటలపండించు ప్రథితుడెవడు?
శిలలబోలినయట్టి శిష్యుల దరిజేర్చి
చైతన్య దీప్తుల జేయునెవడు?
మంచుగడ్డలలోన మరణంబు నెంచక
భారతావనిగాచు భద్రుడెవడు?
శాస్త్ర విజ్ఞానంపు సాంకేతికత లెల్ల
సార్ధకమొనరించు సాంద్రుడెవడు?
సాంఘిక సేవలన్ సతతంబు తారాడు
కార్యార్ధియైనట్టి ఘనుడెవండు?
రమ్యంపు పాలనన్ రాజ్యంబు నడిపించి
విష్ణ్వంశ సంభవ వీరుడెవడు?
తే.గీ:వాడె వాడెపో ఘనమైన వాడిచూపు
భరతమాతకు ప్రియమైన పట్టియతడు
భవము సార్ధకమైనట్టి పరమయోగి
స్తుతులకందని సౌశీల్య శుభ్రయశుడు.
ఆ.వె:భవము జీవి పాప ఫలమువలనగల్గు
అన్ని జన్మలగన మన్ననవని
నరునికొండె చెల్లు నాలోచనంజేయ
సార్ధకంబు సేయ సాగుమయ్య.!
@ పద్యవర్షం..15.సర్వధారి.
చం:సకల జనంబులన్మరియు జ్ఞానవిహీనపు ప్రాణికోటినిన్
వికల మనస్కతాభరితవేదన లన్సుఖ పారవశ్యమున్
ప్రకటిత వీరశౌర్యముల బ్రాంజలి సల్పెడు భక్తియుక్తులన్
ఒకటననేమి సర్వమును నోరిమి మోతువు"సర్వధారి"రో!
ఉ:ఇంటికి పెద్ద తానయి మహేశుని రూపుగ "సర్వధారి"యై
కంటికి రెప్పవోలె తను కాచుచు పిల్లల,ధర్మచారిణిన్
మింటినిజేరుమోదముల మేదిని జీవనయాత్ర జేయు నా
పంటవలంతి బిడ్డడటు వర్ధిలు సశ్యము గాదెనిండుటన్.
ఆ.వె:సర్వధారి రావె సర్వంబు భరియింప
పేదసాదలుబడు వెతలనాపి
కష్టఫలము నిమ్ము కలుములనింపుచు
భావికాలమంత పదిలపఱచ.
@ పద్యవర్షం..16.పరాభవ.
ఉ:మానవుడైనవాడు తగు మాన్యతగూర్ప చరించగావలెన్
న్యూనతజేయజూచిన మహోగ్రతజూపును ధూళియైన తా
పూని శిరంబునెక్కికడుమోదమునందును భీకరంబుగన్
కాన పరాభవించుటకు గాలును దువ్వుటకూడదెన్నడున్.
ఉ:గౌరవభావనన్ మసలి కావగ యత్నము జేయగావలెన్
వారలు పేదలైన ధనవంతులె యైనపరాభవించుటల్
నేరము ఘోరమౌనుగద నిర్మల సద్గుణ భావసంపదల్
తోరముగాగనందవలె తుష్టినిపుష్టిని బొందగోరినన్.
@ పద్యవర్షం..17.వికృతి.
ఉ:జీవనయానమున్ సలుప శ్రేయమొనర్పగ జాలు ప్రకృతిం
గావగ మానవుండు నిజకార్యముగా మదినెంచగావలెన్
ధీవరుడయ్యు స్వార్థ పర తీవ్రతలొంగుచు క్రూరుడైచనన్
భూవలయంబు తా వికృతమొందు యథేచ్ఛగ జృంభణంబునన్.
చం:పలువిధ యంత్రశాలలను పారెడు దుష్టరసాయనంబులం
గలుపుచు స్వాదునీరముల గల్మషమందగ జేయభావ్యమా?
ఫలితము ఘోరమై వికృత వర్తనలీభువి విస్తరించుగా
లలితమనస్కులౌచు సకలావని శ్రేయమునెంచగావలెన్.
@పద్యవర్షం. 18. సిద్ధార్థి.
శా.చేతంబంతయు హ్లాదమొప్పధరణిన్ సిద్ధార్ధి యేతెంచగా
ప్రాతఃకాలమునందె లేచి జనులా భద్రాత్మకుందల్చుచున్
భూతంబుందరలింపజేసి సుఖసమ్మోదమ్ములేతెంచగా
ఖ్యాతింజెందగ భావి యోచనలతో గాంచంగజూచెన్సుమా.
శా.ఆసిద్ధార్థుడుచావు రుగ్మతల మోహాంధత్వముంగాంచి, యే
గాసిల్లెన్మృదుభావ వర్తియయి నిష్కామంపు తత్త్వంబులే
వాసింగూర్చును భక్తిభావయుతమై వర్ధిల్లు బ్రహ్మంబుగా
నాసల్జంపుటె శ్రేయమంచుబలికెన్నత్యంత కారుణ్యమున్.
@ పద్యవర్షం.. 19. విజయ.
చం:విజయము నందగోరినను విజ్ఞత దక్షత కార్యశూరతల్
నిజముగ నుండితీరవలె నేస్తమ!యయ్యవివృద్ధబాంధవుల్
సుజనుల ప్రేమభావనల శోభదలిర్పగ నేర్వగావలెన్
భజనలు జేసినన్ మనకు భాగ్యము భోగములేల యబ్బురా?
ఆ.వె:విజయగర్వమంది విర్రవీగుట చేటు
వినయ గుణము సతము విలువపెంచు
సంఘమందు నుచిత స్థానంబుగోరిన
మనసు లెరిగి బ్రతుక మమతబెరుగు.
ఉ:జీవిత గమ్యమున్ విజయశీలత ముఖ్యము నెల్లవారికిన్
పావన సద్గుణంబులవి పాదులెయౌను కుటుంబమంతకున్
భావనలెల్ల స్వచ్ఛమయి భద్రతగూర్చు మహోదయంబుగన్
కావున మానవా! సతము గౌరవపాత్రుడవై చరింపుమా!
@ పద్యవర్షం..20.ఆనంద.
ఉ:సార వివేచన్గవిత సౌరభముల్ వెదజల్లు సత్కవుల్
చేరగ మోక్షమార్గమును శ్రీహరి కీర్తనజేయు భక్తులన్
ధీరత వీర విక్రమత దేశముగాచెడు త్యాగమూర్తులన్
వారల భక్తి శౌర్యముల బాడగ సంతసమొప్పు నెప్పుడున్.
ఉ:అందము జూచి కొందరికి, హాసవిలాస విశేషమోహమౌ
చందముజూచి కొందరికి, సారసలోచన యోరచూపు సం
బంధము జూచి కొందరికి, బంగరుసొమ్ములు దాల్పగా మహా
నందము జిహ్వకో రుచియనంగను మానవనైజమేకదా!
సీ:పరమాత్మ ధ్యానంబె పావిత్ర్యమనియెంచి
యానందమందుదురందులోన
గ్రంథపఠనమదె గౌరవంబనియెంచి
యానందమందుదురందులోన
సత్కళోపాసనం జరియించి తరియించి
నానందమందుదురందులోన
షడ్రసోపేతమౌ చవులూరు తిండియం
దానందమందుదురందులోన
జిహ్వ జిహ్వకు రుచివేరె చెల్లునటులె
పుఱ్ఱె పుఱ్ఱెకు పుట్టెడు బుద్ధి వేరు
ఏది కాదనినను నెవ్వరొప్పరిలను
ఎవరి సంతసమెచ్చటో యెరుగలేము.
@ పద్యవర్షం..21.ధాత.
ఉ:చేతలలోన చేతుల విచిత్రపు జాడ్యము దాగియుండి తా
మూతులు మూయువారికడ మోదముతో దరిజేరకన్ సదా
కోతిని మించిపై కెగిరి క్రుంగగదీయుచు నుండె నిద్ధరన్
"ధాత"గమారి కన్గొనుమ దానికి మందును భారతీయుడా!
ఉ:భూతలమందు జీవులకు పూర్వపు కర్మఫలావశేషమే
రాతలు భిన్నమై వరలి రమ్యవినోదులు కొందరైనచో
వేతన జీవులై మనుచు వేదనజెందెడు కొందరుందు రా
"ధాత"విలేఖనా సుకృతి ధర్మము నేరికి దాటశక్యమౌ?
ఉ:"ధాతవు" గమ్ము సత్కవన ధారల కావ్యమనోజ్ఞ సృష్టి-సం
"ధాతవు" గమ్ము దుర్జనుల దారిమరల్చుచు జ్ఞానదాయివై
"ధాతవు" గమ్ము పేదలకు ధైర్యమనోబల శ్రేయమీయగన్
"ధాతవు" గమ్ము సజ్జనుల ధార్మిక జీవనయానమందున్.
తే.గీ:"ధాత"నామంబు దలచిన ధైర్యముడుగు
భీకరంబైన కరువున బెద్ద సంఖ్య
భరతదేశాన ప్రజలను పట్టిమ్రింగి
త్రేన్చినట్టిది మరువము దీనినెపుడు.
తే.గీ:ధర్మ సృష్ఠికి నీవిల "ధాత"వగుము
తరణమొనరింప పేదల "ధాత"వగుము
కళల జీవమువోయు సం"ధాత"వగుము
తుష్ఠి పుష్టి గూర్చ శుభ వి"ధాత"వీవె.
@ పద్యవర్షం.22. ప్రమోది
ఉ:జీవుడు కష్టనష్టముల చిత్రముగా విధి నిర్ణయంబుగా
నావ ప్రయాణముంగడపు నావికు రీతిని జేయుచుండుగా
కావగ శ్రీహరే కరుణ క్రన్నన జూప విభాసమానుడై
యే వగలేకయున్ సతమహీన సుశాంత ప్రమోదియైచనున్.
ఉ:వచ్చె ప్రమోది వత్సరము వందనముల్ దగ సల్పగావలెన్
తెచ్చెను శాంతిసౌఖ్యములు తీయని హాసవిలాసభావముల్
నచ్చిన రీతిగా మనము నైతికజీవన సాహచర్యముల్
అచ్చపు జుంటితేనియల నానినతీరున హాయినుందుమా!
తే.గీ:ఈ ప్రమోది సంవత్సర మీవసంత
లక్ష్మి సర్వజనాళికి రమ్యభావ
నిర్భర సుఖపరంపర నియతిగూర్చి
రక్షసేయుత! సతతంబు రమ్య గరిమ.
@పద్యవర్షం..23.విరోధి.
ఉ:చక్కని స్నేహభావనలు సౌమ్యమనస్కత బంధుతత్త్వముల్
పెక్కురతోడి స్వచ్ఛమగు ప్రేమసమన్విత భాషణంబులున్
నిక్కపుమార్గదర్శనము నీమముతోడి చరించుచుండుటల్
దిక్కులనింపు సద్యశము ధీనిధియైన "విరోధి" కెట్లగున్?
ఉ:మనము గ్రహించియున్సుగుణమాన్యుల భాసురజీవితంబులన్
దినమొకరీతిగా చెరచి తీరని చింతల చిచ్చువెట్టు నా
కణకణమన్ "విరోధి" గని గ్రన్నన మార్చిన శాంతిమార్గమున్
వినయము ప్రేమతత్త్వములు విస్తృతమౌను జగమ్ముమెచ్చగన్.
కం:నీవే "విరోధి" వైనను
దావేమియు నీయమయ్య,తామసగుణముల్
కావేవి హితకరమ్ములు
కావుమ! స్నేహాన మమ్ము కాలవిభాసా!
తే.గీ:శరణు వేడ "విరోధి" నేన్ పరమప్రేమ
నభయమిచ్చెడు తత్త్వంబు శుభమటంచు
వేదశాస్త్రాలు ఘోషిల్లె విస్తృతముగ
భరతదేశపు విఖ్యాతి పరిఢవిల్ల.
ఉ:దూర విరోధు లెవ్వరును దుష్కృతముల్సలుపంగ లేరెటన్
పారములేని వార్ధి బడబాగ్నులెయౌ మన లోనిశత్రువుల్
పోరున రూపుమాపి భువి పుణ్యచరిత్రుడవై మెలంగనన్
తీరును గష్టనష్టములు దీప్తములౌగద కీర్తి చంద్రికల్.
@పద్యవర్షం..24. సాధారణ.
శా:ఈ "సాధారణ"వత్సరంబికను సుశ్శ్రీకార భాస్వంతమౌ
వాసంతంబుగ నిల్చుగాక! నిలలో వైక్లబ్య రాహిత్యమై
ఆసాంతంబగు సౌఖ్యమిచ్చి మది భవ్యంబైన హ్లాదంబునన్
ధీసర్వంబునుభక్తి పూర్ణమయమై తేజంబు గల్పించెడిన్.
కం:ఓ "సాధారణ" వత్సర!
మాసంసారంబులనిల మానితరీతిన్
త్రాసముజేయుమ నిరతము
దాసుడ ప్రార్ధింతునిన్ను దయజూడుమికన్.
@పద్యవర్షం..25.క్షయ.
చం:క్షయమును జేసికొమ్మికను సర్వదురంతవికారభావనల్
క్షయమును జేసికొమ్మికను కామమదోత్కట దుర్గుణమ్ములన్
క్షయమును జేసికొమ్మికను క్రౌర్యవిదార మహాపకారముల్
జయమిడునట్టి వర్తనము శాంతిని దాంతినిగూర్చునిచ్చలున్.
ఆ.వె:ప్రథమవత్సరంబు ప్రభవయై ప్రభవించె
రెండనంగ విభవ పండెసిరులు
చివరిక్షయము గూర్చిచింతించ వలదులే
క్షయము సల్పుదుష్ట కర్మతతిని.
ఆ.వె:ప్రభవ మందుటెటుల పరమాత్ము సత్కృపో
క్షయముకూడ వాని కరుణవలనె
పుట్టిగిట్టుటలవి పుణ్యపాప ఫలాలు
తరిగిపోవుదనుక తిరుగుచుండు.
@పద్యవర్షం..26. స్వభాను.
ఉ:ఏపని జేయబూనినను నీశుడె సర్వముచూచునంచు తా
దాపునకైన నేగక సదా కృపగోరుచు మందబుద్ధితో
కోపముజూపగా దగదకుంఠిత దీక్షను కార్యదక్షుడై
ఆపరమాత్మసాక్షిగమహత్కృషి చేయ స్వభానుతేజమౌ.
కం:నమ్మిన స్వభాను తేజము
కమ్మనిభాగ్యంబులబ్బి కమనీయంబౌ
ఇమ్మహి పరబలమేదియు
వమ్మయి సాఫల్యమిడదు వంతలదెచ్చున్.
@పద్యవర్షం..27. శుక్ల.
స్వచ్ఛత, తెల్లదనము, పారదర్శకత.
ఉ:తెల్లని దేహకాంతులును తెల్లని మేడలు కొల్లయౌ సిరుల్
ఉల్లము సంతసంబడని యున్నత శ్రేణులు వమ్ముసోదరా!
తెల్లని మానసంబులును తేటగుమాటల ప్రేమభావముల్
ఎల్లరు మెత్తురయ్య పరమేశుని సత్కృప దక్కునెప్పుడున్.
తే.గీ:శుక్ల వర్ణాననుండును చూడకొంగ
శుక్ల వర్ణంబె హంసయు సూరివర్య!
క్షీరముంద్రావి హంస తా నీరముంచు
మించు నటనల బకమది మీలదినును.
@పద్యవర్షం..28.సౌమ్య.
నెమ్మదితనము,బుద్ధిమంతుడు,సహృదయత.
ఉ: పేదల పెన్నిధై నిలచి ప్రేమగ వారల జీవితాలలో
మోదము నింపి సంపదలు పూర్ణవిభాసిత సద్గుణంబులన్
సాధనగూర్చువాడెగద సౌమ్యమనస్కుడు. సంఘసేవలన్
వేదనలన్నియున్ పరమ విజ్ఞత దాటుచు కీర్తిగాంచుగా.
కం:నెమ్మదితనమది శ్రేయము
కమ్మని ఫలితంబులీను కార్యములందున్
అమ్మయు నాన్నయు నిరతము
సమ్ముదమున గఱపుచుంద్రు సంతుకునెపుడున్.
తే.గీ:బుద్ధిమంతుండు యోచించు సిద్ధికొరకు
బుద్ధిహీనుండు పరకాంత పొందుగోరు
జన్మజన్మల కర్మానుసారముగను
పుట్టి యనుభవింత్రు నరులు గిట్టుదనుక.
తే.గీ:అభము శుభములు తెలియని యతివలనక
కన్నుగప్పిన కామాన తెన్నుదప్పి
మానవాకార మృగములై మసవబోక
సౌమ్య హృదయతన్ మెలగ దుశ్చర్యలడగు.
తే.గీ:సౌమ్యమైనట్టి మనసున్న సాధుజనుల
సత్త్వహీనులుగానెంచి చౌకసేయ
జమ్మిచెట్టున దాగిన జ్వాలవోలె
విక్రమింతురు వారె బెంబేలుపడ
తే.గీ:ప్రజల జీవనయానంబు పరిఢవిల్ల
ఆయురారోగ్య భాగ్యాల నతిశయింప
ప్రభుత సన్మార్గవర్తియై వరలుచుండ
శుక్ల వత్సర మిడుగాత! శోభలెల్ల.
@పద్యవర్షం..29.సర్వజిత్
అందరిని గెల్చిన వాడు, అంతశ్శత్రువులను గెల్చినవాడు.
కోర్కెలు జయించిన వాడు , ఏదైనా సాధించగలవాడు.
ఉ:కామము లోభక్రోధములు కర్కశమై మనమందుదాగి, యా
ప్రేమను పొంగనీవుగద భేద విలోకన దుష్టభావనన్
సేమము గాదటంచునవి చిత్తమునం దొలగించి వేయుచున్
నీమము పాటిసేయు గణనీయుడు మాన్యుడు "సర్వజిత్త"గున్.
చం:సతతము పేదసాదలకు చక్కని సాయములందజేయుచున్
మతమను భేదభావములు మానసమందున జేరనీయకన్
వెతలను డుల్చివేయుచును విజ్ఞతనొప్పెడు వాడె"సర్వజిత్"
శతముసహస్ర వర్షములు సంస్తుతి నందును నెల్లవారిచేన్.
పద్యవర్షం@30.దుందుభి.
చం. జనకుని సత్సభన్ దరిసి శంభుని వింటినిబట్టగోరి , యా
ముని కనుసైగకున్ నిలిచి పూర్ణయనుజ్ఞను బొంది వేగమై
వినయము భక్తి శౌర్యముల విజ్ఞతజూపుచు ద్రుంచివేయగా
ఘనముగ దుందుభుల్ మొరసె కంజదళాక్షుని బ్రస్తుతించుచున్.
ఉ:రాముడు దుందుభిన్ కరము లాఘవమొప్పగ పాదతాడనన్
తామసభావమొక్కెడను దర్శనమీయని తాత్త్వికత్వమున్
కోమలతన్ సుదూరముగ గూలగద్రోసి పరాక్రమంబునున్
నీమముతోడజూపి స్తవనీయుడె యయ్యెను నద్వితీయుడై.
దీనికి సబ్‌స్క్రయిబ్ చేయి:
పోస్ట్‌లు (Atom)
-
షష్టి పూర్తులు , సహస్ర చంద్రదర్శన శాంతిహోమాలు అవసరాలా ? ఆడంబరాలా ? ప్రపంచ దేశాలు మన దేశానికి మోకరిల్లేది మన ఆర్ధిక సంపదను చూ... -
వదలకయ్యగురువు పాదములను. ( ఆటవెలదుల శతకము) బ్రహ్మవిష్ణుభవుల భాసురతేజంబు మూర్తిగొన్న రూపు పుడమికాపు గురుపదమ్మె సుమ్ము! గోప్యంబులేదురా వదలకయ్య...
-
శ్రీరామ శతకము.... **కరుణ జూడుమ శ్రీరామ పరమపురుష!**మకుటంతో శ్రీరామ శతకము...పొన్నెకం...